چین نینگ محصولات و فناوری بیرینچی کورگزمه‌سی، افغانستان صناعت و سوداگرلیگینی قوللب_قوتلش مقصدیده، اسلامی امارت و چینا_تاون شرکت نماینده‌لری نینگ حضوری بیلن بوگون کابل ده آچیلدی.
چینا_تاون شرکت باشلیغی یومنی هاوس، اوشبو کورگزمه‌نی آچیش مراسیمیده ایتیشیچه، صناعت و تجارت و ایکی مملکت آره‌سیده همکارلیک و حسنه مناسبت‌لر بولیمیده افغانستان ده سرمایه یاتقیزیش و اقتصادنی قوللب_قوتلش مقصدیده مذکور کورگزمه یولگه قوییلگن.
بیزلرنینگ فیسبوک صحیفه‌میزگه باش اورینگ!
جناب هاوس نینگ کوپه‌یتیریشیچه، افغانستان نینگ صناعت و اقتصادی دن اوز حمایت‌لری گه دوام بیره‌دی. اونینگ ایتیشیچه: «افغانستان صناعت و تجارتی دن حمایت قیلیش مقصدیده بو گَل کورگزمه کابل ده یولگه قوییلیشیدن خورسند میز، چین هردایم افغانستان ده سرمایه یاتقیزیش اوچون سعی و حرکت قیله‌دی.»
شهرلرنی قیته قوریش وزیرلیگی نینگ سرپرستی حمدالله نعمانی گه کوره، اوتگن ۲۰ ییل ده افغانستان ده صناعت‌نی قوللب قوتلش و ترقیاتی اوچون اساسی ایشلر بولمه‌گن، ناتینچ‌لیک و اوروش باعث صناعت و اقتصاد زیان کورگن.
جناب نعمانی برچه سوداگرلر و سرمایه یاتقیزووچیلردن، افغانستان گه کیلیب و سرمایه یاتقیزیشنی سوره‌یدی. اونگه کوره: «بیر آی چینا_تاون شرکتی بیلن ایشله‌دیک و صناعت نی قوللب قوتلش اوچون بو کورگزمه‌نی یولگه قوییش مقصد تلاش قیلدیک، بو گَل کورگزمه‌لر یولگه قوییلیشی و صناعت بولیمی حمایت بولیشی و اهالی‌نی ایش بیلن تأمینلش اوچون سعی و حرکت قیله‌میز و صناعت ترقیاتی و حمایتی اوچون باشقه پروژه‌لر نظرگه آلینگن.»
باشقه تاماندن زعفران تجاری نفیسه دانش، مملکت اقتصادی ترقیاتی و تجارت ساحه‌سیده اوشبو کورگزمه یولگه قوییلیشینی اونملی اوقیب ایتیشیچه، افغانستان طبیعی منبع‌لر گه بای بیر مملکت دیر و اولکه صناعتی حمایت بولگن تقدیرده، افغانستان اقتصادی بای بیر مملکت گه اوزگریشی ممکن.
نفیسه دانش نینگ ایتیشیچه: «بوگون مملکت ییگیت‌لری تشقی اولکه‌لر گه قنچه‌لیک عذاب کوریش‌لرینی کوریب توریب میز، بیز تجارلر افغانستان ده ایش شرایطینی یره‌ته آله‌میز، موجود کانلردن فایده‌لنیش گه کوچیمیز ایته‌دی.»
او باشقه سوداگرلردن، افغانستان گه کیلیب و مملکت آبادانچیلیگی و ترقیاتی همده اقتصادی نقطه‌ی نظردن اوزینی اوزی تأمینلش مقصدیده بو ییرده سرمایه یاتقیزیش‌لرینی طلب قیله‌دی.
شونینگدیک تجارت و سرمایه یاتقیزیش اتاق‌لر نینگ مدیره هیأت عضوی احمد ضیا عظیمی شینوزاده، مملکت صناعتی قوللب_قوتلنیشی اوچون مذکور کورگزمه آچیلیشیدن خورسندلیک بیلدیریب و اسلامی امارت‌دن افغانستان ده سرمایه یاتقیزیش اوچون باشقه تجارلرنی تشویق قیلیش‌لرینی طلب قیله‌دی.
بیزلرنینگ توییترده هم تعقیب قیلینگ!
حاضرگی اقتصادی و امنیتی وضعیت گه بناً، مملکت صناعتی و تجارتینی قوللب_قولش اوچون بو کبی نمایشگاه‌لر اوتکزیلیشی اونملی دیر و ایش زمینهلری یره‌تیلیشی خصوصیده تاثیرچن بولیشی ممکن.
ایتیش کیره‌ک که، اسلامی امارت رسمی‌لری و مذکور شرکت مسئوللری نینگ چیقیشی چاغیده، اوشبو کورگزمه یقینیده نیچه اوق سیسی ایشیتیلدی، بیراق خوفسیزلیک مسئوللری بو موضوع‌نی تصدیقلب، شخصی دشمن‌لیک سبب آتیشمه بولگنینی ایته‌دیلر.
