افغانستان سابق جمهوررئیسی حامد کرزی ینگی‌لیکده ایران صدا و سیما آژانسی بیلن کابل‌ده اوتکزگن صحبتیده ایتیشیچه، مملکت بویلب اسلامی امارت حاکمیت گه ایریشیشی بیلن، افغانستان فقرالری حاضرگچه دایمی ثبات و تینچلیککه قول تاپه آلگن‌لری یوق دیر.
جناب کرزی نینگ اورغولشیچه، آمریکا و باشقه تشقی مملکت‌لر اوتمیش ۲۰ ییلده افغانستان اهالیسی‌نی کتته مصیبت و دردلر گه روپه‌رو قیلدیلر. اونینگ تأکیدلشیچه آمریکا و باشقه قطار تشقی مملکت‌لر افغانستان‌ده ترورچیلیککه قرشی کوره‌ش شعاری بیلن کیلگن ایدیلر؛ بیراق افغانستان اهالیسی گه بویوک ضرر ییتیشتیردیلر.
بیزلرنینگ فیسبوک صحیفه‌میزگه باش اورینگ!
حامد کرزی نینگ ایتیشیچه: «آمریکا نینگ تروریسم گه قرشی کوره‌ش شعاری افغانستان خلقی نینگ کتته مصیبت‌لر گه روپه‌رو قیلدی، آمریکا نینگ تروریسم گه قرشی کوره‌ش شعاری عکسینچه نتیجه بیردی، افغانستان اهالیسی نینگ تورر اوی‌لر بمباردمان بولیب و ویران ایتیلدی و بو مملکت خلقی اوشبو هجوم‌لر گه هلاک بولدیلر.»
باشقه تاماندن مملکت سابق جمهور باشلیغی، اسلامی امارت مخالف گروه‌لری گه مراجعت قیلیب، اساسی قانون گه تن بیریب و لویه‌جرگه‌نی یولگه قوییش بیلن، مردمی بیر دولت‌‌نی شکللنتیریش گه امیدوارلیک بیلدیرگن.
شونده‌ی بیرحالده، سیاسی ایش بیلرمان‌لردن قطاری جناب کرزی نینگ سوزلری‌نی تصدیق‌لب ایتیش‌لریچه، اوتمیش ۲۰ ییلده تشقی قدرتلر نینگ حضوری بیلن، افغانستان‌ده میلیارد‌لر دالر صرفلندی؛ لیکن اوشبو مملکت‌ده هیچ قنده‌ی اساسی ایش صورت تاپمه‌دی.
سیاسی ایش بیلرمان نورشاه نورانی نینگ ایتیشیچه، افغانستان‌ده صرفلنگن پول‌لر گه توجه قیلینگن صورت‌ده، حاضرگچه بو مملکت خودکفالیککه ایریشمه‌گن. اونینگ ایتیشیچه، افغانستان‌ده ترورچیلیککه قرشی کوره‌ش اوچون آمریکا و اونینگ متحد‌لری حضوری فایده‌سیز بیر شکلده یکونلندی.
بیراق سیاسی ایش بیلرمان‌لردن قطاری جناب حامد کرزی نینگ ینگی صحبت‌لریدن تنقید ایته‌دیلر. اولر نینگ ایشانچی‌گه کوره، افغانستان‌ده ۲۰ ییل‌لیک آمریکا و باشقه مملکت‌لر نینگ حضوری کوپینچه فایده‌لی ایدی. مملکت‌ده سیاسی مسئله‌لر ایش بیلرمانی شجاع معاشر نینگ ایتیشیچه، کرزی نینگ جمهورلیک ریاستی جریانی‌ده افغانستان‌ده ناتینچ‌لیک و قیین‌چیلیکلری بار ایدی؛ لیکن جناب کرزی اوشبو قیین‌چیلیک حقیده و غرب مملکت‌لر نینگ فایده‌سیز حضوری حقیده هیچ بیر نرسه دیمر ایدی.
بیزلرنینگ توییترده هم تعقیب قیلینگ!
او جناب کرزی نینگ صحبت‌لرینی اوتمیش حکومت دوره‌سی قیینچیلیکلرینی حل قیلیش و اونی ایکی یوزلیک سیاست و عوام فریب‌لیک عنوان قیلگن.
مملکت نینگ سابق جمهوررئیسی حامدکرزی، ۲۰۰۱-ییل ۵- دسامبر‌ده بن قراری اساسیده، مذکور ییل نینگ ۲۲- دسامبر تاریخی‌ده برهان الدین ربانی‌دن کیین، افغانستان نینگ وقیتینچه‌لیک رئیس جمهوری صفتیده تنلندی. او ۲۰۰۴ و ۲۰۸-ییل‌لرده ایککی دور افغانستان نینگ تنلنگن جمهور باشلیغی اوله‌راق وظیفه بجردی.
ایتیش کیره‌ک که افغانستان جمهورلیک تیزیمی تشکیلی اوچون کرزی ییتکچیلیگیده ۱۲ ییل باشقریلگن تیزیم، آمریکا جنگری اوچاق‌لری آرقه‌لی شکل آلدی.
