کیله‌سی بیر هفته‌گچه افغانستان وضعیتی گه دایر بیرلشگن ملتلر تشکیلاتی نینگ میزبان‌لیگی بیلن دوحه ییغیلیشی یولگه قوییلیشی کوتیله‌دی؛ بیراق بیرلشگن ملتلر تشکیلاتی تامانیدن اوشبو ییغیلیش ترکیبی و نهایی آجنداسی حقیده ایضاح کیریتیلمه‌گن. ایشانچ‌لر اساسیده دوحه ییغیلیشی ده افغانستان ده همه‌شمول حکومت شکللنیشی، افغانستان اوچون بیرلشگن ملتلر تشکیلاتی نینگ مخصوص وکیلی ایتیب تعیینلنیشی و اسلام امیرلیگی تامانیدن انسان حقلری رعایت ایتیلیش مسئله‌لری بحث گه آلینه‌دی.
اسلام امیرلیگی گه کوره، دوحه ییغیلیشی ده اشتراک ایتیش اوچون چمه‌سی ایکی مرته افغانستان اوچون بیرلشگن ملتلر تشکیلاتی باش کاتبی نینگ مخصوص وکیلی روزا اوتونبایوا و افغانستان اوچون بیرلشگن ملتلر تشکیلاتی مخصوص هماهنگ قیلووچیسی فریدون سینیرلی اوغلو تامانیدن تکلیف بولگن، لیکن بو ییغیلیش ده اشتراک قیلیش یا که قیلمسلیک اوچون حاضرگچه نهایی قرار آلمه‌گن.
بیزلرنینگ فیسبوک صحیفه‌میزگه باش اورینگ!
اسلام امیرلیگی سوزلاوچیسی ذبیح‌الله مجاهد نینگ سلام‌وطندار گه ایتیشیچه، دوحه ییغیلیشی ده اشتراک قیلیش یا که قیلمسلیک قرارنی تشقی ایشلر وزیرلیگی آله‌دی.
سیاسی مسئله‌لر ایش بیلرمانی عزیز استانکزی، سونگی ایکّی ییل ده اسلام امیرلیگی و دنیا آره‌سیده‌گی فرقلی فکرلر گه اشاره قیلیب ایتیشیچه: «فکریمچه سرپرست حکومت نماینده‌لری بو ییغیلیش ده اشتراک قیلمه‌یدی؛ چونکه بعضی مناسبت‌لر بار شونی اوچون اولر بی‌فرق بولیش‌لری ممکن.»
دوحه کیله‌سی ییغیلیشی قنده‌ی اوتکزیلیشی اوچون منطقه و دنیا بویلب آواز بیریش‌لر باشلنگن. بروکسل ده بیرلشگن ملتلر تشکیلاتی نینگ نماینده‌لیگی، دوحه ییغیلیشی اوتکزیلیشی اوچون کیله‌سی کون‌لرده ۱۰ مملکت وکیللری نینگ میزبانی بولیب و اورته آسیا بیش مملکتی هم دوحه ییغیلیشی حقیده بحث ایتیش اوچون اوشبو هفته ایچیده ییغیلیش اوتکزیش‌لری کوتیله‌دی.
بیزلرنینگ «ایکس» ترماغی ده هم تعقیب قیلینگ!
برچه‌سی بیلن، ایش بیلرمان‌لردن بیرقطاری سونگی ایکی ییل ده افغانستان وضعیتی گه دایر بیرلشگن ملتلر تشکیلاتی نینگ سابق ییغیلیش‌لری نتیجه‌سیز یکونلنیشی و افغانستان خصوصیده مملکت‌لر آره‌سیده‌گی قرشی‌لیکلر گه اشاره قیلیب، دوحه ییغیلیشی ایجابی نتیجه بیریش گه ایشانمه‌یدیلر.
«افغانستان ملت واحد همبسته‌لیک جریان» رهبری محمدزلمی افغان‌یار پوپل نینگ ایتیشیچه: «بیرلشگن ملتلر تشکیلاتی اونلب ییغیلیش اوتکزدی؛ لیکن هیچ بیری نتیجه بیرمه‌دی. بو ییغیلیش ده کیم‌لر قتنشه‌دی؟ افغانستان نینگ حقیقی وکیلی هم اشتراک ایته‌دیمی یاکه ۲۰ ییل حکومت قیلیب و حاضر چیت‌ایل ده بولگنلر؟ بو ییغیلیش نی بیرلشگن ملتلر تشکیلاتی خوفسیزلیک کینگشی گه اعضا مملکت‌لر جمله دن روسیه، چین، امریکا، فرانسه و انگلیس باشقره‌دیلر. بو اولکه‌لر افغانستان وضعیتی اوچون کیلیشمه‌گونچه بو کبی ییغیلیش‌لر نتیجه بیرمه‌یدی.»
ایتیش کیره‌ک، افغانستان وضعیتی گه دایر دوحه بیرینچی ییغیلیشی میلادی اوتگن ییل نینگ بیرینچی می ده یاشیرینچ شکلده اوتکزیلدی و مذکور ییغیلیش ده اسلام امیرلیگی بیلن دنیا نینگ قنده‌ی همکارلیک قیلیشی بحث گه آلینگن مهم مسئله‌لر دن ایدی.