اوتگن “شنبه” کونی توشدن سونگ، مسافر تاشیووچی ایکی موتر کابل شهری نینگ غربی‌ده پارتله‌ب و نتیجه‌ده ۷ کیشی هلاک و باشقه ۶ کیشی یره‌لنگن ایدی.
شونینگدیک، اوتگن هفته “یکشنبه” کونی ایکی تونس موتر کابل غربی‌ده هجوم آستیگه قرار بیریلیب و نتیجه‌ده ۵ کیشی هلاک و باشقه ۱۶ کیشی یره‌لنگن ایدی.
نیچه ییل‌دن بویان شهری موترلرده یوز بیره‌دیگن پارتلش‌لر اهالی‌نی خواطرلنتیرگن و یشاوچی‌لر باریب-کیلیش‌لری اوچون قنده‌ی نقلیه واسطه‌دن فایده‌لنیش‌لرینی بیلمه‌یدیلر.
کابل یشاوچی‌لریدن بیری زهرا حسینی نینگ ایتیشیچه، نیچه ییل آلدین کاستر موترلر هجوم آستیگه قرار بیریله‌ریدی و انه‌شوو سبب، تونس موترلردن فایده‌لنیش‌گه قرار قیلگنلر و حاضرده تونس موترلر هجوم آستیگه قرار بیریله‌دی.
زهرا نینگ ایتیشیچه، هر کون باریب-کیلیش و شهری نقلیه واسطه‌لردن فایده‌لنیش همکارلری آره‌سیده بولگن قیزیق بحث‌لردن دیر.
کابل یشاوچی‌لریدن باشقه بیری حسنیه نینگ ایتیشیچه، نیچه مدت‌دن بویان کابل شهری نینگ امنیتی وضعیتی خواطرلنترووچی دیر و کوپراق کابل غربی یشاوچی‌لری هجوم آستیگه قرار بیریله‌دی.
حسنیه نینگ ایتیشیچه، پارتلش‌لرده هزاره‌لر جان‌لرینی قولدن بیره‌دیلر، دولت و خلق ارا جماعه‌سی اولرنینگ خوفسیزلیگی‌نی تامین‌لش اوچون عملی شکلده سعی و حرکت قیلمه‌یدی.
کابل غربی‌ده جایلشگن سیدالشهدا مکتبی هجوم آستیگه قرار بیریلگنیدن سونگ، جمهورلیک ریاستی ایکینچی اورین باسری سرور دانش کابل غربی نینگ خوفسیزلیک ریجه‌سینی جمهور رییس‌گه ارایه قیلگن.
جمهورلیک ریاستی ایکینچی اورین باسری نینگ مصلحتچی‌سی محمد هدایت نینگ سلام‌وطندارگه ایتیشیچه، اوشبو ریجه ولایتی کینگش اعضالری، گذر وکیل‌لری، محل یشاوچی‌لری، امنیتی نهادلر و عالم‌لر مصلحتی اساسیگه تیارلنگن.
جناب هدایت نینگ ایتیشیچه، اوشبو ریجه نینگ بیرقطار بولیم‌لری عملگه آشیریلماقده، لیکن کته شهرلرده تروریستی گروه‌لرنینگ کوپه‌یگنی ناتینچلیک‌لر دوام تاپیشی‌گه سبب بولگن.
جمهور رئیس‌گه ارایه قیلینگن امنیتی ریجه‌گه کوره، پولیس و ملی خوفسیزلیک تشکیلاتی کوپه‌یشی، محل یشاوچی‌لری نینگ خوفسیزلیک‌نی تامین‌لشگه دخیل بولیشی و پولیس پوسته‌لری نینگ کوپه‌یتیریلیشی کیره‌ک.