رسانه‌لرده ترقه‌لگن گزارش‌لر اساسیده، سونگی بیر آی‌ده مملکت بویلب کمیده ۳۱ جنایی واقعه یوز بیرگن که، سکیز واقعه اوتگن آی نینگ باشی‌ده و ۲۳ واقعه ایسه مذکور آی نینگ سونگی کونلری، یعنی ۲۴-دلو‌دن ۷-حوت‌گچه یوز بیرگن که بو، جنایی واقعه‌لر نینگ ایکی برابر کوپه‌یگنی نی کورسته‌دی.
مملکت نینگ تورلی ولایت‌لریده ۸-دلو‌دن ۷-حوت‌گچه یوز بیرگن مذکور واقعه‌لر نتیجه‌سیده، ۴۲ کیشی هلاک بولگن.
خوست اوتگن آی‌ده بیش جنایی واقعه بیلن کوپینچه رقم نی اوزی گه اختصاص بیرگن. ۲۴-دلو جنایی بیر واقعه‌ده اوچ کیشی و شونینگدیک ۳-حوت هم تورت کیشی تورت جنایی واقعه نتیجه‌سیده هلاک بولگن. مذکور جنایی واقعه‌لردن تورت ته‌سی نینگ سببی، قومی جنجل‌لر و بیرته‌سی ایسه عایله‌وی زوره‌وانلیک ایکن.
پروان اوتگن آی‌ده تورت جنایی واقعه بیلن ایکینچی اورین نی ایگه‌لگن. پروان ده ۱۸-دلو و ۶-حوت ناتانیش کیشی‌لر حشمت‌الله و عنایت‌الله اسم‌لی ایکی کیشی نی اولدیرگنلر و ۲۴-دلو ایسه اوشبو ولایت‌ده قلندر‌خان اسم‌لی بیر ایرکک سینگلی‌سی نی اولدیرگن و شونینگدیک جاری ییل ۶-حوت هم شیرین‌آغا اسم‌لی ایرکک بالته بیلن اولدیریلگن.
پروان ده جنایی جرم‌لر قربانی‌لریدن بیری نینگ ایناغه‌سی عبدالواحد نینگ ایتیشیچه: «اوشبو قضیه عامل‌لری جزالنمه‌گنی صورت‌ده، اوشبو دولت اوتگن دولت‌دن نیمه فرقی بوله‌دی؟ فقیر اهالی‌میز. باغ گه باره‌میز بوگون بونی اولدیردیلر، ایرته باشقه بیر کیشی اولدیریله‌دی. بو کبی واقعه‌لردن توسیق بولینمه‌گنی صورت‌ده، دوام تاپیشی ممکن.»
بیزلرنینگ فیسبوک صحیفه‌میزگه باش اورینگ!
شونینگدیک کاپیسا ده ۹-دلو و ۴-حوت ایکی جنایی واقعه یوز بیریب و ایکی کیشی هلاک بولگن.
قربان بولگن‌لردن بیری نینگ ایناغه‌سی محمد‌صابر نینگ ایتیشیچه: «ایکی اوق باشی گه و بیر اوق ایسه جانی گه تیگیب و اولدیریلگن. بی‌چاره اهالی‌میزو حاضرگی حکومت‌دن قاتل‌لر نی تانیب و جزالنتیشی نی ایسته‌یمیز.»
سونگی آی‌ده کاپیسا یانیده، غزنی، فاریاب، بامیان، لوگر و بلخ ولایت‌لریدن ایکی جنایی واقعه رسانه‌لرده ترقه‌تیلگن که، اوشبو واقعه‌لر نتیجه‌سیده ۱۷ کیشی هلاک بولگن.
شونینگدیک اوشبو گزارش‌ده ثبت بولگن باشقه واقعه‌لر، بغلان، کابل، جوزجان، ننگرهار، سرپل، قندهار، پکتیا و سمنگان دن گزارش بیریلگن دیر.
سونگی آی‌ده یوز بیرگن جنایی واقعه‌لردن کوپینچه‌سی نینگ عامل‌لری، ناتانیش قوراللی کیشی‌لر و شونینگدیک واقعه‌لردن کوپینچه‌سی اوغریلیک، قومی و عایله‌وی جنجل‌لر سبب یوز بیرگن.
عین حالده، اوتگن هفته جریانیده جنایی واقعه‌لر کوپه‌یشی، یشاوچیلر نی جانی و مالی امنیتی خصوصیده خواطرلنتیرگن.
سونگی کون‌لرده کابل شهریده قوراللی اوغریلیک بیلن روپه‌ره بولگن خالد ناصری نینگ ایتیشیچه: «اوتگن چهارشنبه کونی ایرتنگ چاغی اونینچی ناحیه‌ده جایلشگن بی‌بی رقیه کوچه‌سیده نان‌وای‌خانه گه باره‌دیگنیم چاغده، ایکی موتر‌سایکل‌لی قوراللی کیشی مینی توخته‌تیب و موبایلیم بیلن پولیم نی آلدیلر و عکس‌العمل کورستگنینگ پیتده، سینی اولدیره‌میز دیدیلر.»
شوندهی بیرحالده، ایچکی ایشلر وزیرلیگی مسئوللری سونگی هفته‌لرده جنایی جرم‌لر کوپه‌یگنی تصدیق یا-ده رد قیلمه‌ی بیراق ایتیش‌لریچه، بو توغریده کوپینچه شکایت‌لر نی قولگه کیلتیرگنلر. اوشبو وزیرلیک سوزلاوچیسی اورین‌باسری بسم‌الله حبیب نینگ سلام‌وطندار گه ایتیشیچه: «بیر آی جریانیده، کابل نینگ تورلی منطقه‌لریده قتل، قوراللی اوغریلیک و اوی‌لر نینگ اوغیرلینیشی کبی جنایی جرم‌لر گه تیگیشلی۱۰۰دن آرتیق کیشی نی تانیب و قولگه آلگنلر.»
باشقه بیر تامان‌دن، خوفسیزلیک ایش بیلرمان‌لر جنایی واقعه‌لر گه قرشی کوره‌ش و قشاق‌لیک اوشبو واقعه‌لر کوپه‌یگنی گه سبب بولگن دیگن. خوفسیزلیک ایش بیلرمانی صادق شینواری نینگ ایتیشیچه: «قشاق‌لیک اوشبو واقعه‌لر گه سبب بولگن و شونینگدیک جنایی جرم‌لر برابریده درست و مسلکی قرشی کوره‌ش یوق که انه شوو سبب، قتل‌لر و جنایی جرم‌لر کون اوتیشی بیلن کوپه‌یگن دیر.»
بیزلرنینگ توییترده هم تعقیب قیلینگ!
شوندهی بیرحالده، جنایی واقعه‌لردن زیان کورگنلر و قربان بولگنلر نینگ عایله‌لری، دوسیه‌لری نینگ زمانی‌ده تیکشیرلمه‌گنیدن شکایت قیله‌دیلر. کابل غربی‌ده‌گی یشاوچی سهیلا سلطانی نینگ ایتیشیچه، ایناغه‌سی نینگ اولدیریلگنی و اونینگ سرمایه‌لری اوغیرلنگنی‌دن تورت آی اوتگن؛ بیراق حاضرگچه اولر نینگ دوسیه‌لری تیکشیریلمه‌گن.
اونینگ کوپه‌یتیریشیچه: «اوشبو واقعه‌دن قریب ۴ آی اوتگن. هیچ کیم مذکور قضیه نی تیکشیریب و بیزلر گه کمک قیلمه‌دی.»
شو بیلن بیرگه، افغانستان عالی محکمه مسئوللری نینگ ایتیش‌لریچه، اوتگن اوچ آی‌ده مملکت بویلب محکمه‌لرده ۸۰ اوغریلیک دوسیه و قریب ۲۰۰۰ قتل دوسیه ثبت بولگن.
افغانستان عالی محکمه سوزلاوچیسی عنایت‌الله نینگ سلام‌وطندار گه ایتیشیچه: «اوتگن اوچ آی‌ده مملکت محکمه‌سیده ۸۰ اوغریلیک قضیه‌سی ثبت بولگن که، بو آره‌ده ۵۹ قضیه تیکشیریلگن و شونینگدیک ۲۱ قضیه خصوصدیه هم ایشلر نینگ دوامی بار. شونینگدیک اوشبو مدت‌ده ۱۹۸۳ قتل قضیه‌سی ثبت بولگن که اولردن یریمی حل بولگن.»
ایتیش کیره‌ک که، اسلام امیر‌لیگی جنایی جرم‌لردن توسیق بولیش اوچون، نیچه مرته مملکت نینگ ولایت‌لریدن قطاریده جنایی جرم‌لر گه عیب‌لنگن کیشی‌لر گه قصاص نی اجرا قیلگن دیر.
