ساغلیق‌نی سقلش وزیرلیگی رسمی‌لری نینگ آگاه‌لنتیریش‌لریچه، کرونا ویروسی جدی توتیلمه‌ی و ساغلیک توصیه‌لر رعایت قیلینمه‌گن صورتده، وضعیت نینگ یمان بولیشی ممکن.
بوگون “شنبه” ساغلیق‌نی سقلش وزیرلیگی سرپرستی وحید مجروح نینگ خبری بیر ییغینده کرونا ویروسی وضعیتی‌نی خواطرلی عنوان قیلیب ایتیشیچه، یشاوچی‌لر ساغلیک توصیه‌لریگه دقت قیلمه‌گن صورتده، بوتون یشاوچی‌لرنی اوشبو ویروس‌گه چلینیشی ممکن.
اونینگ ایتیشیچه، کون-اوتیش بیلن کرونا ویروسی‌گه چلینگن‌لر و قربان بولگن‌لرنینگ سانی کوپه‌یماقده دیر.
ساغلیک توصیه‌لرنی رعایت قیلیش، اجتماعی فاصله سقله‌نیشی و ماسک دن فایده‌لنیش ساغلیق‌نی سقلش وزیرلیگی تامانیدن تاکیدلنگن موضوعلر جمله‌سیدن دیر، لیکن اوشبو وزارت مسوول‌لریگه کوره، مذکور موضوعلر اهالی تامانیدن نظرگه آلینمه‌یدی.
کرونا ویروسی‌گه چلینگن‌لرنینگ سانی کوپه‌یگنی و وضعیت خواطرلنترووچی بولگنی سبب، مملکت ۱۶ ولایتیده تعلیمی مرکزلر، مکتب‌لر و بیلیم یورت‌لر کیلسی ایکی هفته گه‌قدر باغلنگن.
ساغلیق‌نی سقلش، عالی اوقوو یورت‌لر و معارف وزیرلیگی تامانیدن اوتکزیلگن قوشمه خبری ییغینده، مذکور نهادلر نینگ مسوول‌لری مکتب‌لر و تعلیمی نهادلر کیلسی ایکی هفته گچه تعطیل ایتیلگنی‌نی تصدیق‌لگنلر.
عالی اوقوو یورت‌لر وزیری عباس بصیر نینگ ایتیشیچه، کرونا ویروسی‌گه توسیق بولیش اوچون ساغلیق‌نی سقلش وزیرلیگی توصیه‌لریگه دقت قیلیش کیره‌ک.
عین‌حالده، معارف وزیرلیگی سرپرستی رنگینه حمیدی نینگ ساغلیق‌نی سقش وزیرلیگی قرارینی تصدیق‌لب ایتیشیچه، مکتب‌لر و تعلیمی مرکزلر کیلسی ایکی هفته گه‌قدر باغلنگن دیر.
کابل، غزنی، هلمند، قندهار، لوگر، ننگرهار، پکتیا، پروان، میدان‌وردک، پنجشیر، بلخ، لغمان، بدخشان، کاپیسا، قندوز و نیمروز ولایت‌لریده کرونا ویروسی نینگ اوچینچی تولقینی ترقه‌لگنی سبب، مکتب‌لر، بیلیم یورت‌لر و تعلیمی مرکزلر باغلنگن دیر.
شونینگدیک، ساغلیق‌نی سقلش وزیرلیگی تامانیدن بیریلگن آمارلرگه کوره، اوتگن ۲۴ ساعت جریانیده کرونا ویروسی‌دن ۶۵۴ ینگی ایجابی واقعه قید ایتیلیب و بو ویروس‌گه چلینگنلردن ۲۰ ته‌سی دنیا دن اوتگن.
