سلام‌وطندارنینگ نسایی-ولادی سکیز متخصص شفاکاری و حامله‌لیک‌نی تجربه قیلگن ۳۰ عیال بیلن اۉتکزگن صحبتی اساسیده، افغانستان‌ده ساغلیق‌نی سقلش وزیرلیگی و طبی نهادلرنینگ ریجه‌لری، حامله‌دار عیاللرنینگ قیینچیلیک‌لری گه بوتونلی جواب قیتره آلمه‌گن‌لیگیدن درک بیره‌دی.
شفاکارلر بو ریجه‌لرنی اونملی بیلسه‌لرده، بیراق اولرنینگ ایشانچی گه کوره، باله و آنه‌لرنینگ اولیم درجه‌سی، توغمه ناگران چقهلاقلر و ساغلیق مرکزلر گه مراجعت قیله‌دیگن کسللرنینگ احوالی گه قره‌گنده، بو ریجه افغانستان‌ده‌گی عیاللرنینگ قیینچیلیک‌لرینی حل قیله آلمه‌گن.
اوشبو گزارش‌ده نسایی-ولادی سکیز شفاکاری بیلن صحبت اۉتکزیلگن، اولرنینگ همه‌سی مملکت‌ده عیاللر گه اونچه‌لیک طبی خذمت کورسه‌تیلمه‌‌یاتگنینی تصدیقلب و بو معما ولایت‌لر همده مملکت‌نینگ اوزاق منطقه‌لریده کوپراق بولگنینی اېتگنلر.
نسایی-ولادی شفاکاری سحر بزرگ مهر گه کوره: «آنه‌لر حاضرگه قدر کوپینچه قیینچیلیک‌لر بیلن روپه‌ره دیر؛ اوزاق منطقه‌لرده عیال شفاکاری و مسلکی خادم آز دیر و بعضی جای‌لرده اصلا یوق و حامله‌دار عیاللر طبیات خذمت‌لریدن فایده‌لنه آلمه‌یدی و آنه‌لرنینگ اولیم درجه‌سی کوپ دیر و بو دستورنی کېنگه‌یتیریش درکار.»
نسایی-ولادی شفاکارلریدن باشقه بیری فریده رهانینگ ایتیشیچه: «آنه‌لر حتا ولادت آره‌سیده فاصله‌نی قنده‌ی رعایت قیلیشنی بیلمه‌یدی؛ حتا چقه‌لاقلرنینگ آوقت‌لش و تربیه بیریشینی بیلمه‌یدی. بو زمان‌ده بوله‌دیگن آگاهی‌لیکنی مین اصلا کورگنیم یوق. یالغیز اولیم اېمس، آنه‌لرنینگ آگاهی‌سیزلیگی طفیلی ناگرانلیک قیینچیلیگی بار. ساغلیق‌نی سقلش وزیرلیگی و خلق‌ارا ساغلیق‌نی سقلش تشکیلاتیدن اوزاق منطقه‌لرده متخصص کیشیلر ایشگه آلینیشنی اېسته‌ی من.»
نسایی-ولادی متخصص‌لری‌نینگ ایشانچی گه کوره، حامله‌دارلیک پیتیده آنه‌لرنینگ ساغلیغی گه دقت قیلینمسلیگی اولرنینگ اولیمی گه سبب بولیشی ممکن؛ شونی اوچون افغانستان‌ده حامله‌دارلیک پیتیده طبی قاعده‌لر رعایت اېتیلمسلیگی اوچون آنه‌لرنینگ اولیمی گه گواه‌میز.»
آنه‌لرنینگ کسل‌لیگی یا-ده اولیم درجه‌سی باله‌لری‌نینگ ساغلیغی، تیریکچیلیگی و روحی اوستیگه سلبی تأثیر قوییب و نهایت جمعیت گه تأثیر قیلیشی ممکن دیه تأکید اېته‌دیلر، اوشبو متخصص‌لر. اولرنینگ ایشانچی گه کوره، آنه‌لر حامله‌دارلیک پیتیده عایله اینیقسه ایری تامانیدن قۉللب-قوتلنیشی کېره‌ک.
بیزلرنینگ فیسبوک صحیفه‌میزگه باش اورینگ!
نسایی-ولادی شفاکاری پروین زاهد عزیزنینگ ایتیشیچه: «حامله‌دارلیک‌دن اول مراقبت‌لر، نسایی-ولادی شفاکاری گه مراجعت قیله‌دیگن بیرینچی قدم دیر و شفاکارنینگ مصلحت‌لری حقیده ریجه توزسینلر، اۉز و جنین‌نینگ سلامت‌لیگی اوچون یخشی آوقت‌لنیش و ویتامین‌لرنی حامله‌دارلیک‌دن اوچ آی اول باشله‌سینلر و یخشی وزن‌لرینی سقله‌سینلر.»
باشقه تاماندن، چېگره تانیمس شفاکارلر تشکیلاتی، سلام‌وطندار گه یوللـه‌گن متنی پیامیده، افغانستان‌نینگ ساغلیق‌نی سقلش تېزیمی حددن آشه منبع تقچیلیگی بیلن روپه‌ره دیر و افغانستان‌ده‌گی خاتین-قیزلرنینگ احتیاجلرینی تأمینله‌ی آلمسلیگینی اېتگن. مذکور تشکیلات گه کوره، کوپینچه موردلرده کسللر اینیقسه عیاللر و باله‌لر کیچیک‌تیریلیب ساغلیق مرکزلر گه آلیب باریله‌دی و احواللری مرکب‌لشه‌دی.
چېگره تانیمس شفاکارلر، افغانستان‌ده عیال شفاکارلری اینیقسه نسایی-ولادی و چقهلاقلر بولیمیده شفاکارلر آزلیگی، بو مملکت‌نینگ ساغلیق تېزیمینی قیینچیلیک بیلن دوچ قیلگن باشقه عامللردن بولگنینی اېتگنلر.
بیزلرنینگ «ایکس» ترماغی ده هم تعقیب قیلینگ!
چېگره تانیمس شفاکارلرنینگ بامیان و هرات اوچون طبی خذمت‌لرینی هماهنگ قیلووچیسی ژولی پاکیرو، سلام‌وطندار گه یوللـه‌گن متنی پیامیده ایتیشیچه: «افغانستان‌ده احوال اینیقسه خاتین-قیزلرنینگ اقتصادی احواللری، استعدادلرینی آشیریش اوچون تشقری چیقیش‌لری گه یره‌تیلگن چېکلاو، تعلیم و نادولتی تشکیلات‌لرده ایشله آلمسلیک قیین دیر. بیز بیله‌میز که افغانستان‌ده عیال شفاکارلری آز دیر. بو افغانستان‌ده طبی مراقبت‌لر اوستیگه تأثیر قویه‌دی، چونکه نسایی-ولادی و بعضی وقت‌لر باله‌لر بولیمی عیاللر اوچون مخصوص محل بوله‌دی.»
شونینگدیک، سلام‌وطندارنینگ حامله‌دارلیک‌نی تجربه قیلگن ۳۰ عیال بیلن اۉتکزگن صحبتی اساسیده، مملکت‌نینگ کتّه شهرلریده تیریکچیلیک قیله‌دیگن بو عیاللرنینگ بعضی‌لری حتا آگاهی‌سیزلیک و طبی خذمتلردن یخشی فایده‌لنه آلمسلیک باعث، همان طبی قیینچیلیک‌لر بیلن روپه‌ره دیر.
تخارلیک ذکیه گه کوره: «ولادت پیتی یقین بولگنده یوک تاشووچی حیوان (ایشک) بیلن کلینک باره‌من و کلینک‌گه اېتگن حالده خون‌ریزلیک تاپه‌من، کوپ ضرر کوردیک (یول گه نیچه چقه‌لاغنی قولدن بیردیک) بیر چقه‌لاغیم یول گه دنیا گه کېلیب و اولدی.»
کابل یشاوچیسی پلوشه‌نینگ ایتیشیچه: «بو ایکّینچی مرته حامله‌دارلیگیم دیر، بوندن آلدین گرده و مثانه قیینچیلیگیم بار اېدی بیراق شفاکار گه مراجعت قیلمه‌دیم.»
بو عیاللر، حامله‌دارلیک پیتیده ساغلیق قیینچیلیک‌لری گه اشاره قیلیب ایتیشلریچه، یشش اوی‌لری و ساغلیق مرکزلر اورته‌سیده‌گی مصافه کوپ، قتناو یوللر بوزوق‌لیگی و حامله‌دارلیک‌دن اول مراقبت‌لر حقیده آگاهی‌سیزلیک، حامله‌دارلیک پیتیده تورلی کسل‌لیکّه چلینیش‌لری گه سبب بولگن.
بامیان یشاوچیسی فرزانه گه کوره: «ساغلیق مرکزلردن فایده‌لنه آلمسلیک و یخشی آوقت‌لنه آلمسلیک باعث توییب آوقت‌لنمسلیکّه چلیندیم.»
شو بیلن بیرگه، عیال حقوقی فعالی حسنا رئوفی‌نینگ ایشانچی گه کوره، عیاللرنینگ ساغلیق حقوق‌لریدن محروم‌لیگی اولرنی جمعیت‌ده تأثیرچن رولی اوستیگه سلبی تأثیر قویه‌دی. «عیاللرنینگ ساغلیق حقوق‌لریدن محروم‌لیگی جمعیت‌ده یخشی فعالیت قیله آلمه‌ی و افغانستان‌ده انسان حقلری احوالینی چتاق قیلیشی ممکن. عیاللرنینگ طبی حقوق‌لریدن فایده‌لنه آلمسلیگی نه‌فقط اقتصادی بلکه فرهنگی، سیاسی تېنگ‌سیزلیکّه آلیب باریشی ممکن.»
شونینگدیک، حقوقی مسئله‌لر بیرمانلری، ساغلیق خذمتلردن فایده‌لنیشنی بیر مملکت فقرالری‌نینگ دستلبکی حقی بیلیب و عیاللر گه بو حق بیریلیشی گه تأکید اېته‌دیلر. اولرنینگ ایشانچی گه کوره، ساغلام عیاللر، ساغلام عایله‌نینگ اساسچیسی دیر.
حقوقی مسئله‌لر بیلرمانی محمدرحیمی، عیاللرنینگ قیینچیلیک‌لرینی حل قیلیش اوچون ساغلیق مرکزلر یوق‌لیگینی انسانلرنینگ دستلبکی حقی ایاغ آستی بولیشی گه ایشانه‌دی. اونینگ کوپه‌یتیریشیچه: «هر بیر انسان‌نینگ حقی دیر، عیال و ایرکک‌لیگی یوق. عیاللرنینگ حقی ایرکک‌لر بیلن تېنگ اینیقسه دستلبکی ساحه‌لرده. ساغلیق و سلامت عیاللرنینگ طبیعی حقی دیر، بیر عیال کسل بوله‌دی، حامله‌دار بوله‌دی و اولرنینگ قیینچیلیگی حل اېتیلیشی اوچون ساغلیق مرکزلر بولیشی کېره‌ک، عکس‌حالده انسانی دستلبکی حق ایاغ آستی بوله‌دی.»
بوتوغریده سرپرست حکومت ساغلیق‌نی سقلش وزیرلیگی‌نینگ ایشلری و اقداملری حقیده معلومات تاپیشنی اېسته‌دیک: بیراق کوپینچه سعی-حرکتلر بیلن اولگوره آلمه‌دیک.
خلق‌ارا ساغلیق‌نی سقلش تشکیلاتی‌نینگ معلوماتی اساسیده، اروپا اتفاقی میلادی ۲۰۲۴-ییل‌ده خلق‌ارا ساغلیق‌نی سقلش تشکیلاتی گه ۱۶ میلیون یورو و افغانستان‌ده یوقوملی بولمه‌گن کسل‌لیک جمله‌دن سرطان همده آنه‌لر، چقهلاقلر، باله‌لر و اوسمیرلر گه یخشی خذمت کورسه‌تیش یخشی‌لنیشی اوچون بیرلشگن ملتلر تشکیلاتی‌نینگ جمعیت صندیغی گه ۱۵ میلیون یورو اختصاص بیرگن بیرحالده، افغانستان‌ده عیاللر طبیات خدمت‌لریدن فایده‌لنه آلمسلیک‌دن نالیماقده‌لر.
اوشبو گزارش اساسیده، افغانستان‌ده آنه‌لر و چقه‌لاقلرنینگ اولیم درجه‌سی، دنیا مقیاسیده اېنگ یوقاری درجه ده دیر؛ هر ایکّی ساعت ایچیده بیر آنه حامله‌دارلیک و توغیش بیلن باغلیق آلدینی آلیش ممکن بولگن قیینچیلیک طفیلی حیاتینی یوقاته‌دی.
