اساسی قانون‌نی عملگه آشیریش ایشلری بوییچه ایرکین کمیسیون مسؤللری بوگون «دولت نینگ خلققه حساب بیریش» برنامه‌سیده بیر ییل جریانیده عمل گه آشیرگن ایشلری حقیده معلومات بیرگن.
اساسی قانون عملگه آشیریلیش ایش‌لرینی تیکشیروچی کمیسیون اعضاسی محمد عارف حافظ نینگ ایتیشیچه، هجری قویاش ۱۳۹۹ نچی ییل مالی بودجه‌سیده، اساسی قانون نینگ ۳۰ ماده‌سی وزیرلیک‌لر، عدلی و قضائی نهادلر، معارف وزیرلیگی و باشقه نیچه اداره شامل دولتی و خصوصی اداره‌لر عملگه آشیریشده سوز بیرگن ایدی، لیکن مذکور اداره‌لر اساسی قانون ماده‌لری قندی عملگه آشیریلگنی خصوصیده لازم معلومات‌لرنی بیرمه‌گن.
حافظ جناب‌لری گه کوره، اوشبو نهادلرنینگ یاردم ایتمه‌گنی باعث، هجری قویاش ۱۳۹۹ نچی ییلده آلینگن پلان‌لر عمل گه آشیریلیش ده ایریم توسیق‌لر بیلن روپه‌ره بولگن.
عین‌حالده اوشبو کمیسیون، دولتی اداره‌لردن اساسی قانون عملگه آشیریلیشی خصوصیده یاردم ایتیش‌لرینی سوره‌گن.
باشقه بیر تاماندن بوگون عالی محکمه هم بیر ییل‌لیک گزارشی‌نی خلق بیلن شریک قیلگن. عالی محکمه مسؤللری نینگ ایتیش‌لریچه، هجری قویاش ۱۳۹۹ نچی ییلده ۴ مینگ و ۲۱۳ اولیم قضیه‌سی، ۵ مینگ و ۱۷۲ اوغیرلاوچیلیک قضیه‌سی، ۱ مینگ و ۴۸۹ جنسی زوروانلیک قضیه‌سی، ۱ مینگ و ۵۲ اداری فساد، رشوه و اختلاس قضیه‌سی، ۱ مینگ و ۱۵ آدم اوغیرلش و آدم قاچیریش قضیه‌سی، ۵ مینگ و ۴۱۷ عیاللر و باله‌لرگه قرشی زوروانلیک قضیه‌سی و ۶ مینگ و ۴۵۰ مخدره ماده‌لرقاچاق ایتیلیش قضیه‌سی تیکشیریلگن.
عالی محکمه نینگ اداری ایشلری بوییچه آمری جاوید رشیدی ایتیشیچه، اداری فساد گه عیب لنگن ۸ وزیردن ۲ وزیر نینگ دوسیه‌سی تمام‌لنگن و قالگن ۶ وزیر نینگ دوسیه‌سی تیکشیروو آستیده دیر.
عالی محکمه گه کوره، اوشبو اداره نینگ ۴۱ ایشلاوچیسی رشوه آلیش، ساخته‌کارلیک و اسناد اوغیرلش گه عیب لنیب اوشلنگن و دوسیه‌لری تیکشیروو آستیده دیر.
عالی محکمه تامانیدن ترقه‌تیلگن گزارش گه کوره، اداری فساد گه عیب‌لنگن عالی شورا نینگ اوچ قاضی‌سی جمهور رئیس بویروغی بیلن ایشدن آلینگن.
عین‌حالده اوشبو اداره تامانیدن ترقه‌تیلگن گزارش گه کوره، هجری قویاش ۱۳۹۹ نچی ییلده ۸ قاضی و ۳ اداره ایشلاوچیسی ایریم واقعه‌لر سبب اولدیریلگن و ۱ ایشلاوچی یره‌لنگن و ۴ قاضی و ۱ اداره ایشلاوچیسی اوغیرلنگن.
