فاریاب ولایتی‌ده‌گی باغ‌دارلردن قطاری نینگ ایتیشلریچه، اوشبو ولایت‌ده موسومی یاغینگرچیلیکلر و مناسب آب-هوا سبب، اوتگن ییل گه قره‌گنده اوزوم حاصلاتی سیزیلرلی درجه‌ده کوپه‌یگن. مذکور باغ‌دارلر بو ییل حاصللری نینگ ۸۰ فایزگه قدر کوپه‌یگنی نی بیان قیلیب؛ بیراق ساتیلیش اوچون بازار یوقلیگی و قیمت‌لر کمه‌یگنی خصوصیده خواطر بیلدیرگنلر.
فاریاب ولایتی شیرین‌تگاب تومنی‌ده‌گی باغ‌دارلردن بیری عبدالخلیل نینگ ایتیشیچه، ۳۰ جریب گه یقین اوزوم‌زاری بولیب و بو باغ‌ده ۲۰دن آرتیق تورده اوزوم ییتیشتیریله‌دی. عبدالخلیل اوزوم‌زارلری حاصلاتی کوپه‌یگنیدن خورسند دیر؛ بیراق بازار یوقلیگی و اوزوم بیلن مه‌ییز قیمتی کمه‌یگنی اونینگ خواطرلنیشی گه سبب بولگن.
او، فاریاب ولایتی میمنه شهری بازاریده بیر سیز تازه اوزوم نینگ ۱۰۰-۱۵۰ افغانی گه ساتیلیشی و باغ‌دارچیلیک خره‌جتلری نینگ تولمه‌سلیگینی بیان قیلیب و کوپه‌یتیریشیچه: «هر ییلی پاکستان گه کریت بولیب و اوزوم صادر بوله‌ر ایدی، بیراق بو ییل ایسه پاکستان بیر کون یول نی آچه‌دی و اون کون یاپه‌دی. شو رقم اون کون آچیق بولسه بیر آی یاپیله‌دی. بو اوزوم‌لر پاکستان گه کیتیب و کیین ایسه پاکستان اسمی آستیده هندوستان یا-ده عربستان کبی مملکتلر گه صادر بوله‌ر ایدی. حاضر بازار یوقلیگی دهقانلر اوچون بیر قیین‌چیلیک دیر.»
بیزلرنینگ فیسبوک صحیفه‌میزگه باش اورینگ!
شونینگدیک فاریاب ولایتی قیصار تومنی‌ده‌گی باغ‌دارلردن باشقه بیری نجم‌الدین نینگ ایتیشیچه، ساووقخانه و مه‌ییز ییتیشتیریلیشی اوچون جای یوقلیگی، مملکت‌دن تشقی گه اوزوم صادر بولمسلیگی، سوو کم‌لیگی و باغ‌دارلر نینگ قوللب-قوتلنمه‌سلیگی اولر برابریده‌گی جدی قیین‌چیلیکلردن دیر.
نجم‌الدین نینگ کوپه‌یتیریشیچه: «بو ییل اوتگن ییلگه قره‌گنده حاصلات یخشی، لیکن ساتیلیش یخشی ایمس و کوپ آز. کوره‌سیزلر که دهقانلر بازار گه اوزوم کیلتیریب و ساته آلمه‌ی اولتیرگن. بازار گه کیلتیرگنیمیزده بیر سیرینی ۱۵۰ افغانی ایسته‌یدیلر. اهالی وضعیتی یخشی ایمس و بازار یوق. اسلام امیرلیگی‌دن تشقی مملکتلر بیلن معامله قیلیشینی ایسته‌یمیز که ییتیشتیریلگن اوزوم و مه‌ییز تشقی مملکتلر گه کیتسین و اهالی وضعیتی یخشی‌لنسین.»
مذکور باغ‌دارلر محلی و مرکزی مسئوللردن ایچکی و تشقی بازارلرده اولر نینگ تولیدلری ساتیلیشی اوچون زمینه یره‌تیلیشینی ایسته‌گنلر.
شونده‌ی بیرحالده، ایکینیچیلیک بوییچه ایش بیلرمانلریدن قطاری اوشبو ولایت‌ده تازه میوه اینیقسه اوزوم اوچون مناسب بازار یوقلیگی و قیمت کمه‌یگنی خصوصیده‌گی خواطرلرنی تصدیق‌لب و ایتیشیچه، باغ‌دارلر و دهقانلر نینگ قوللب-قوتلنمه‌سلیگی، اولرنینگ ایکینیچیلیک خصوصیده قیزیقیشی کمه‌یشی‌گه سبب بوله‌دی.
فاریاب ده ایکینچیلیک بوییچه ایش بیلرمانلریدن بیری حفیظ‌الله پشخانی نینگ ایتیشیچه، مذکور ولایت‌ده قریب ۱۵۰ مینگ ۹۷۰ هکتار اوزوم‌زار بار که ییل‌ده ۳۰۰ مینگ متریک تُن گه یقین اوزوم ییتیشتیریله‌دی.
بیزلرنینگ «ایکس» ترماغی ده هم تعقیب قیلینگ!
اونینگ کوپه‌یتیریشیچه، حکومت مملکت‌ده میوه نینگ ییغیم-تیریم موسومی‌ده، ایکینچیلر و باغ‌دارلر گه تولیدلری ساتیلیشی اوچون آسایشته‌لیک یره‌تیلیشی مقصد، وارداتی میوه‌لر گه سالیق نینگ کوپه‌یتیریشی کیره‌ک. «ماشاءالله بو ییل تولیدلریمیز کوپ، حاصلات اوتگن ییل گه قره‌گنده کوپ یخشی ایدی؛ بیراق ساتیلیش اونچه‌لیک یخشی ایمس. اسلام امیرلیگی صادرات خصوصیده اهالی و افغانستان‌لیک سوداگرلر بیلن همکارلیک قیلیشی کیره‌ک. بو رقم اهالی اقتصادی هم یخشی بوله‌دی و حکومت گه هم یخشی بوله‌دی. سالیق و تکس‌دن بیر درآمد بوله‌دی و شونینگدیک دهقان بیلن اهالی همده تدبیرکار گه هم بیر همکارلیک بوله‌دی.»
عین حالده، فاریاب ولایتی ایکینچیلیک، سووغاریش و چاروه‌چیلیک ریاستی نینگ رواجلنتیریش عمومی مدیری غلام فاروق، مذکور ولایت‌ده اوزوم حاصلاتی کوپه‌یگنی نی تصدیق‌لب ایتیشیچه، جاری ییل‌ده اوزوم حاصلاتی ۳۸۱ مینگ متریک تُن پیش‌بینلیک بولگن که اوتگن ییل گه قره‌گنده ۴۷ فایز کوپه‌یگنی نی کورسته‌دی.
جناب فاروق قوشنی مملکتلر بیلن ترانزیتی یوللر نینگ یاپیقلیگی نی فاریاب ده ییتیشتیریلگن اوزوم صادراتی خصوصیده‌گی جدی قیین‌چیلیکلردن بیلیب و کوپه‌یتیریشیچه، مذکور ریاست اوشبو ولایتده‌گی دهقانلر قیین‌چیلیگی نی مرکزی مسئوللر بیلن شریک قیلگن. «قیغو بیلن هر ییلی بو بولیم‌ده عمومی استراتیژی و ستندرد ساووقخانه یوقلیگی اوزوم قیمتی نی کمه‌یتیره‌دی که بو توغریده ایکینچیلریمیز و باغ‌دارلریمیز نینگ شکایتی کوپ دیر. فاریاب ایکینچیلیک ریاستی جاری ییل‌ده اوشبو ولایت مرکزی میمنه شهری و قیصار تومنی‌ده ستندرد بویوک بیر ساووقخانه قوریلیشی خصوصیده سعی‌وحرکت قیلماقده.»
شونینگدیک فاریاب ولایتی ایکینچیلیک، سووغاریش و چاروه‌چیلیک ریاستی نینگ رواجلنتیریش عمومی مدیری گه کوره، اوتگن ییل‌لرده ایکینچیلیک ریاستی موسسه‌لر هماهنگ‌لیگیده، بو ولایت نینگ تورلی بولیم‌لریده ۴۰۰دن آرتیق ستندرد مه‌ییزخانه قورگن که جاری ییل‌ده هم مذکور ولایت نینگ بیر قطار تومن‌لریده ۲۰ ته مه‌ییزخانه و ۱۰ ته اوزوم‌زار قوریلیشی ممکن.
ایتیش کیره‌ک که، قاره، آق، سایبی، لعل بی‌دانه، حسینی، قره‌زاغ ، شهابی، خلیلی و شینگل‌خانی مشهور اوزوم تورلریدن حساب‌لنه‌دی که فاریاب ولایتی‌ده ییتیشتیریله‌دی.
