بوگون (سه‌شنبه ۱۴- دلو) زهره رادیوسی نینگ مسؤللری و ایشلاوچی‌لری، قندوز ولایتی خبرچی‌لری و خبرچی‌لرنی سقله‌ش کمیته مسؤللری بیر ییغین اوتکزیب، بو رادیو قیته‌دن فعالیت گه باشله‌شی اوچون محلی اداره و رسانه‌لردن حمایت قیلوچی نهادلرنینگ مالی یاردم بیرمه‌گنیدن خواطر بیلدیریشگن.
زهره رادیوسی نینگ مسؤلی محسن احمدی سلام وطندار گه ایتیشیچه، زهره رادیوسی ۱۸ ییلدن بویان فعالیت قیلماقده و بو جریانیده ایکی مرته نشراتی اوسکونه‌لری اوغیرلنیب و تخریب ایتیلگن.
جناب احمدی گه کوره، بیرینچی مرته میلادی ۲۰۱۴ نچی ییلده اوشبو ولایت طالبان گروهی نینگ نظارتی گه اوتیش پیتده نشرات اوسکونه‌لری یوقالگن و ایکینچی مرته ایسه جدی آیی نینگ ۲۶- کونی جمعه نمازینی اوقیگن کیشی‌لر غضب‌لنیب زهره رادیوسی نینگ اوستیگه هجوم قیلیش بیلن، نشرات اوسکونه‌لرینی تخریب قیلیشگن.
جناب احمدی نینگ کوپه‌یتیریشیچه، اوشبو رادیو تخریب ایتیلگنیدن ۱۸ کون اوتگن، لیکن محلی اداره و رسانه‌لردن حمایت قیلوچی نهادلر هیچ قندی مالی یاردم قیلمه‌گن. جناب احمدی گه کوره، رادیو نشرات گه باشلمه‌گن، لیکن ایشلاوچی‌لر آیلیک قولگه کیلتیریه‌دیلر و انه شوباعث محلی حکومت و رسانه لردن حمایت قیلوچی نهادلردن یاردم ایتیشی نی کوته‌دیلر.
انه شوحالده، شمال-شرق زونیده‌گی خبرچی‌لر کمتیه‌سی نینگ مسؤلی شهباز صابری گه کوره، زهره رادیوسی تخریب ایتیلگنیدن کیین، خساره‌لرنی تیکشیریب محلی حکومت و رسانه‌لردن حمایت قیلوچی نهادلرگه تاپشیرگنلر، اگرده محلی حکومت و رسانه لردن حمایت قیلوچی نهادلر زهره رادیوسی نی مالی حمایت قیلمه‌گن حالده، خبرچی‌لر و محلی رسانه‌لر یاردمی بیلن اوشبو رادیونی قیته‌دن قوریش اوچون پول توپلش گه باشله‌یدیلر.
لیکن قندوز ولایتی نینگ محلی مسؤللری بو خصوصده فکر بیلدیرمه‌گن.
ایتیش لازم که بوندن ۱۸ کون آلدین «فیروز کوهی» مسجدی امامی نینگ تبلیغی بیلن یوزلرچه نماز اوقوچی کیشی غضب‌لنیب، زهره رادیوسی اوستیگه هجوم قیلیب رادیونی تخریب قیلگن ایدیلر.
