بلخ ساغلیک ریاستی نینگ اعتیاد مرکزلری مسئوللری، بو ولایتده مخدره ماده گه چلینگنلرنینگ سانی کوپه‌یگنیدن خبر بیریشگن.
بلخ ده مسئول نهادلرنینگ معلوماتی اساسیده، بو ولایتده حاضر عیاللر و باله‌لر شامل ۴ مینگ کیشی مخدره ماده گه چلینگن، کیم بولردن کمیده ۲ مینگ ته‌سینی خیابانی معتادلر تشکیل بیره‌دی.
مخدره ماده گه چلینگن نی دارولش ۱۰۰ یاتاقلی کسلخانه‌‌ده، ییگیتلر و کیکسه‌لر ترتیب‌لی شکلده چوکی‌لرده اولتیریب و داکترلرنینگ سوزلری گه قولاق توتیشه‌دی.
بولردن ۲۳ یاشر سید احمد ناملی بیر ییگیت نینگ ایتیشیچه، ۱۶ ییل دن بویان مخدره ماده گه چلینگن. بلخ ده اعتیاد نی ترک قیلیش مرکزیده، سپورت، تعلیماتی برنامه‌لر و روان نی دارولش گه علاوه، کسل‌لرگه ایش و کار هم تعلیم بیریله‌دی.
۳۷ یاشر سید امیر نینگ هیرویین و شیشه استعمال قیلیشی گه ۱۰ ییل دن کوپ بوله‌دی. اونینگ ایتیشیچه، بو ماده دن قولله‌نیش اونگه کوپ عادی بولگن. اونینگ کوپه‌یتیریشیچه، مخدره ماده نی ترک قیلیش کوپ قیین دیر، بیراق او بو مرته جدی قرار آلگن.
شونینگدیک بلخ ده عیاللرگه خاص اعتیاد نی ترک قیلیش ۷۰ یاتاقلی مرکزده، روان نی دارولش گه علاوه، اسلامی بیلیم، نقاش‌لیک، موسیقه، خیاط‌لیک و گل تیکیش تعلیمات بیریله‌دی.
پسته‌گل مخدره ماده گه چلینگن عیاللردن بیری دیر کیم کمیده، بیر آی آلدین دارولنیش اوچون بو مرکزده کیلتیریلدی. اونینگ ایتیشیچه، بیر ییل دن بویان مخدره ماده گه یوز کیلتیرگن و بو مرکز گه کیلگندن بویان اوتمیش گه کوره وضعیتی یخشی‌لنگن.
شونینگدیک عیاللرگه علاوه، باله‌لرهم دارولنیش اوچون بو مرکزگه کیلتیریلگن. مذکور باله‌لر آنه سوتی دن استعمال قیله‌دیگن پیتده مخدره ماده گه چلینگن.
بلخ ساغلیک ریاستی نینگ اعتیاد مرکزلری مسئولی، بو ولایتده مخدره ماده گه چلینگنلرنینگ رقمی کوپه‌یگنیدن خواطر بیلدیرگن.
بلخ ساغلیک ریاستی نینگ اعتیاد مرکزلری مسئولی عصمت‌الله کریمی نینگ ایتیشیچه، اوشبو ولایتده عیاللر و باله‌لر شامل ۴ مینگ دن آرتیق کیشی مخدره ماده گه چلینگن کیم بولردن بیر مینگ و ۹۴۵ ته‌سی خیابانی معتادلر دیر.
مخدره ماده گه آسان شکلده قول تاپیش، دارولش مرکزلرنینگ کم‌لیگی و اعتیاد نی ترک قیلگندن کیین قیته‌دن یوز کیلتیریش، اعتیاد نی آلدی نی آلیش و مخدره ماده گه چلینگنلرنینگ دارولش خصوصیده مسئوللرنینگ ناکام‌لیگی نی اصلی دلیلی دییلگن.