افغانستان بوییچه بیرلشگن ملتلر تشکیلاتی نینگ اورین باسرلیک هیأتی یا-ده یوناما نینگ ایتیشیچه، افغانستانلیک‌لر ارا سوزلشوولر باشلنگنیدن سونگ، تینچ اهالی تلفاتی کوپه‌یگن.
بوگون “سه‌شنبه” افغانستان بوییچه بیرلشگن ملتلر تشکیلاتی نینگ اورین باسرلیک هیأتی، قوراللی آتیشمه‌لر نتیجه‌سیده تینچ اهالی تلفاتی خصوصیده بولگن ییل‌لیک گزارشی‌نی نشر قیلیب افغانستان حکومتی و طالبان هیاتی آره‌سیده تینچلیک سوزلشوولر دوامی بولگن بیرحالده، تینچ اهالی تلفاتی کوپه‌یگنیدن خواطر بیلدیرگن.
مذکور گزارش‌گه کوره، میلادی ۲۰۲۰- ییلده ۸ مینگ و ۸۲۰ تینچ اهالی هلاک و یره‌لنگن و بو رقم ۲۰۱۹-ییل گه قره‌گنده ۱۵% کمه‌یگن. ۲۰۲۰- ییلده ۳ مینگ و ۳۵ تینچ اهالی هجوم‌لر و پارتلش‌لر نتیجه‌سیده هلاک و باشقه ۵ مینگ و ۷۸۵ کیشی یره‌لنگن دیر.
یوناما تامانیدن نشر قیلینگن گزارشده ایتیلیشیچه: « افغانستان حکومتی و طالبان گروهی آره‌سیده بولگن تینچلیک سوزلشوولر ۱۲ سپتامبر ده باشلندی، لیکن حاضرگه‌قدر تینچ اهالی تلفاتی نینگ کمه‌یتیریلیشی اوچون دقت بولمه‌گن، بلکیم زوروانلیکلرنی کوپه‌یتیریلیشی و اونینگ یمان کیله‌جگی خواطرلرنی کوپه‌یتیرگن.»
افغانستان بوییچه بیرلشگن ملتلر تشکیلاتی نینگ خاص نماینده‌سی دیبرا لاینز نینگ ایتیشیچه، ۲۰۲۰- ییل افغانستانده تینچلیک ییل بوله آلهریدی؛ لیکن مینگلرچه تینچ اهالی آتیشمه‌لر نتیجه‌سیده هلاک و یره‌لنگن.
خانم لاینز نینگ ایتیشیچه: «اوشبو گزارشدن اصلی مقصد حقیقت‌لرنی بیان قیلیش و اوروش تامان‌لرگه توصیه قیلیش دیر. مین اولردن زوروانلیککه توسیق بولیش اوچون بیر کون هم وقت‌نی تلف قیلمه‌یش‌لرینی ایسته‌یمن.»
افغانستان بوییچه بیرلشگن ملتلر تشکیلاتی نینگ خاص نماینده‌سی، اوروش تامان‌لریدن آتیش‌کیسین اعلان قیلیش‌لرینی سوره‌ب و تینچ اهالی تلفاتی‌گه توسیق بولیش اوچون آتیش‌کیسین اساسی یول دیگن.
مذکور گزارش‌گه کوره، میلادی ۲۰۲۰- ییلده تلفات کورگن‌لردن ۴۳% نی عیال‌لر و باله‌لر تشکیل بیره‌دی. ۲۰۲۰- ییلده ۲ مینگ و ۶۱۹ باله و ۱ مینگ ۱۴۶ عیال تلفات کورگن. یوناما گه کوره، میلادی ۲۰۲۰- ییل ده ۳۹۰ عیال و ۷۶۰ باله هلاک ایتیلگن.
یوناما نینگ ایتیشیچه، ۲۰۲۰- ییلده تینچ اهالی تلفاتی دن ۶۲% گه دولت گه قرشی گروه‌لر مسوول دیر و بو جمله‌دن ۴۶% گه طالبان و ۸% گه ایسته داعش گروهی تیگیشلی دیر.
شونینگدیک، دولت‌دن حمایت قیلووچی کوچلر تینچ اهالی تلفاتیدن ۲۴% گه سبب بولگن و بو جمله دن ۲۲% گه مملکت امنیتی و دفاعی کوچلری مسوول دیر.
گزارشده ایتیلیشیچه، ۲۰۲۰- ییلده چیت‌ایللیک حربی‌لر تینچ اهالی تلفاتیدن اینگ آزی گه سبب بولگن. میلادی ۲۰۲۰- ییلده ۱۲۰ تینچ هالی نینگ تلفاتی‌گه خلق ارا حربی‌لر سبب بولگن و بو رقم ۲۰۱۹- ییلده قره‌گنده ۸۵% کمه‌یگن.
