اولاق افغانستاننینگ مدنی رمزلری و ملی اۉزلیگینی مهم بیلگیلریدن بیری حسابلنهدی، اوشبو گزارش نتیجهلری شونی کورستهدی کی اولاق سپورتی جانی خطر، مالیهوی قۉللب-قوتلنمسلیک و درآمدی آزلیگی کبی معمالر بیلن دوچ دیر. بو گزارش بدخشان، تخار، بغلان، قندوز و پنجشیر ولایتلریدن ۱۸ اولاقچی (چاپنداز) بیلن صحبت قیلینیب تیارلنگن و صحبت قیلگنلرنینگ برچهسی اولاق تارتیش جریانیده یرهلنیش تجربه گه ایگه.
اولاق، اوته قتیق و خوفلی مسابقه دیر، او جسارت، آتنی ماهرانه باشقریش همده اېچکینی ایلیب آلیش قابلیتینی طلب اېتهدی. چاپندازلر اورتهسیدهگی کېسکین رقابت ایریم حاللرده مُشتلشو، ییقیلیش، آغیر جراحتلر حتا قان کیتیشی و سویوکلرینینگ سینیشیگه آلیب کیلهدی. ۱۸ نفر یاش چاپندازنینگ ایتیشیچه، بو سپورت کوچلی جسمانی تیارگرلیک و یوقاری درجهدهگی جسارتنی طلب قیلهدی.
قندوزلیک ۲۲ یاشر الیاس، آلتی ییلدن بیری چاپندازلیک قیلماقده ایتیشیچه، محلی اویینلر جریانیده کوزدن یرهلنگن. شوکبی ۳۸ یاشر غلام، ۲۲ ییلدن کوپراقدن بیری چاپندازلیک قیلماقده.
الیاس شوندهی دیېدی: «بیر کونی اېچکیگه ایگیلیب تورگنیمده، آتنینگ تیزهسی کوزیمگه تیگیب، کوزیم قتیق جراحتلندی و شیشیب کیتدی. شونگه قرهمی، ېنه دوام اېتدیم. همه پست گه توش دیېدی، اما مین بری-بیر دوام ایتدیم و شفاکار گه مراجعت قیلدیم. بیر-ایکی هفته دوامیده کوره آلمهدیم.»
غلام هم شوندهی حکایه قیلهدی: «اولاق جریانیده آیاقلریمیز جراحت لندی، قوللریمیز هم سیندی. اولاق آسان سپورت اېمس، بو اویینده جوده کوپ جراحت آلهمیز. دوستلریمیزدن بیری پهلوان بصیرنینگ قولاغی ییرتیلگن، نجیب مختارنینگ پیشانهسی جراحتلنگن، ېنه کوپلب باشقه دوستلریمیز هم تن جراحتی آلگن.»
چاپندازلر اولاق جریانیده جدی ضرر کوریشلری بیلن، دوالنیش اوچون حمایه بولمهیدیلر؛ بیراق یاشلرنینگ اوشبو سپورت بولیمیگه قیزیقیشی آرتماقده.
گزارش معلوماتلری شونی کورستهدی کی، یاشلر امکانیت و جسمانی عاقبتلر گه قرهمسدن اولاققه قیزیقیشی کوپهیماقده. گزارشده صحبت قیلگن ۱۸ چاپندازدن فقط ۴ نفری ییترلیچه قۉللب-قوتلنیشلرینی ایتگنلر؛ عینحالده باشقه ۱۴ نفری مسئوللر و باغلیق نهادلرنینگ دقتسیزلیگی، اساسی احتیاجلرینی حل قیله آلمسلیککه سبب بولگنیگه ایشانیشهدی.
سمنگانلیک ۲۳ یاشر سمیعالله، قریب ایکی ییلدن بیری و شو بیلن بیرگه سمنگانلیک پهلوان (چاپنداز)لردن باشقه بیری ۲۴ یاشر شیرزاد، قریب ۱۲ ییلدن بیری چاپندازلیک قیلماقده، افغانستان اولاق اویینلریده یول تاپیشگن و کوپراق قۉللب-قوتلنگن حالده، بو ساحهده کوپراق پارلشلرینی معلوم قیلیشهدی.
سمیعالله شوندهی دیېدی: «دولت اولاقنی اساسی شکلده قۉللب-قوتلمهیدی؛ انیق میدانلر یوق. بو سپورت بولیمی کېلهجگینی آیدین کورهمن و دولت هم حمایه قیلیش گه امیدوارلیک بیلدیرهمن.»
شیرزادنینگ ایتیشیچه: «بو سپورت بولیمی قیین، کوپ عذاب چیکهمیز؛ بیراق دولت تامانیدن حمایت بولینمهیدی و حمایت بولیشنی ایستهیمیز. بو سپورت رواجلنماقده و کوپینچه طرفدار گه ایگه.»
اکثریت چاپندازلر شخصی پوللری بیلن اوزلرینی رقابتلر لیگهسیگه ییتکزهدیلر. ۲۶ یاشر سمیع پهلوان ییتی ییل اولاق لیگهسیده فعالیت قیلگن، قوللب-قوتلنمسهلرده، شخصی پوللری بیلن ملی و خلقارا رقابتلرده اشتراک ایتگنینی بیلدیرهدی. او، ایندی کوپینچه طرفدار گه ایگه بولیب و اوشبو سپورت رواجلنیشیده مهم رول اوینهماقده.
سمیع شوندهی دییدی: «آدملر مینی تانیدی و ترقی قیلگن من. قریب ییتی ییل بولهدی لیگهده فعالیت قلماقده من و خلقارا مقیاسده هم فعالیت قیلهمن جملهدن تورکیه گه سفر قیلدیم. اوچ مراتبه قهرمان و بیر مراتبه هم لیگهده ایکینچی بولگن من.«
گزارشده صحبت قیلگن چاپندازلر، اوشبو یول آرقهلی درآمدلری احتیاجلرینی تأمین قیلمسهده، قیزیقیشلری باعث دوام بیرماقدهلیکلرینی ایتهدیلر.
بغلانلیک چاپنداز رامین، سکیز ییلدن بیری اولاقچیلیک قیلیب کیلماقده و اوچ ییلدن بیری اولاق لیگهسیده اوینهیدی، بو توغریده فکر-ملاحظهسینی شوندهی بیان قیلهدی: کوز موسومیده احتیاجلریمیز تأمینلنهدی؛ بیراق یاز موسومی بوندهی ایمس و دولت هیچ یاردم کورستمهیدی. نیمه سبب حمایت بولمسلیکنی بیلمهیمیز، اوشبو سپورت رواجلنماقده.»
تخارلیک چاپندازلردن بولمیش شمس هم، ۱۵ ییلدن بیری اولاقچیلیک قیلیب کیلماقدهلیگینی بیلدیرهدی: «درآمدیمیز یخشی ایمس و دولت حمایت قیلمهیدی. بیز گه توجه بولمهگن بیراق هر ییلی اولاق اویینلری رواجلنماقده.»
بو مسابقهلر کوکلم و کوز موسوملریده کوپراق افغانستان شمال و شمالشرقی حدودلریده اوتکزیلهدی و افغانستاننینگ میراثی بیر بولیمی حسابلنهدی.
شو بیلن بیرگه، المپیک، جسمانی تربیهلش، سپورت و اولاق فدراسیونی عمومی کمیته ریاستی مسئوللرینینگ ایتیشیچه، اولاق اویینلری رواجلنیشی اوچون رقابتلر سانینی کوپهیتیرگنلر.
افغانستان المپیک، جسمانی تربیهلش و سپورت عمومی کمیته ریاستی سوزلاوچیسی محمداتل مشوانی گه کوره، هر ییلی مملکت تورلی ولایتلریده اوچ بویوک تورنمنت اوتکزیلهدی.
مشوانی گه کوره، اوشبو ریاست ایریم برنامهلرنی عملگه آشیریش بیلن، مملکت مقیاسیده بو سپورتنی رواجلنتیریش اوچون سعی-حرکت قیلماقده. او شوندهی دییدی: «اولاق، قدیمی و ملی سپورتلردن بیری حسابلنهدی و اونی رواجلنتیریش اوچون سعی-حرکت قیلهیپمیز. هر ییلی مملکتده اوچ بویوک تورنمنت اوتکزیلهدی، بیری بدخشانده، بیری بلخده و باشقه بیری هم لیگ سطحیده ولایتی جماعهلر اونگه اشتراک ایتهدیلر. بو لیگ قریب ۶۰ سپورتچیدن عبارت بولیب و مقصدیمیز بو سپورتنی رواجلنتیریش دیر.»
افغانستان اولاق، نیزهبازلیک و محلی اویینلر ملی فدراسیونی باشلیغی غلامسرور جلال گه کوره، ایریم ولایتلرده تورنمنتلرنی اوتکزیش بیلن اولاق جماعهلریده ینگی سیمالرنی تنلشگن و یاشلر اوچون اویین میدانلری آچیلگن. اونینگ ایتیشیچه: «بیز کیچیک تورنمنتلرنی ولایتلرده اوتکزگن میز. تورنمنت و لیگلرده یاشلر اشتراک ایتیشی اوچون یاشلر جماعهلرینی تشکیل بیرگن و مثبت نتیجهلر آلیب کیلگن. بو اقدام بیلن افغانستان اولاقیده ینگی سیمالر تانیلگن و ملی جماعه گه چیقریلگنلر.
افغانستان اولاق، نیزهبازلیک و محلی اویینلر ملی فدراسیونی اورین باسری احمدفهیم نظری، حاضرگی کونده اولاق اویینلری رواجلنماقدهلیگینی بیلدیرهدی. او شوندهی دییدی: «چاپندازلرنینگ حاضرگی احوالی یخشی و جماعهلرنینگ احوالی مناسب دیر و هر جماعه شرطنامه امضالهگن. فدراسیون لیگه یخشیلنیشی همده ایچکی و تشقی مسابقهلرده اشتراک ایتیش اوچون تیار بولیشلریگه سعی-حرکت قیلماقده.»
برچهسی بیلن، اولاق ملی فدراسیونی نشراتی مسئولی امید تاشقرغانینینگ ایتیشیچه، مملکت مقیاسیده بو سپورت نشر ایتیلیشی اوچون ییتکرمهلر بیلن هماهنگلیک چارهلری کوریلگن. او شوندهی دییدی: «اولاق اویینلری مملکت مقیاسیده نشر ایتیلیشی اوچون بوتون ییتکرمهلر بیلن هماهنگ بولگنمیز. مسابقهلر ییتینچی باسقیچیده ییتکرمهلر بیلن شرطنامه امضالندی و اولر بیلن یخشی همکارلیک قیلدیک و یخشی نتیجه بیردی.»
اولاق توقیز ییل اول رسمی طرزده ملی سپورت رویخطیده کیریتیلدی و اونینگ مستقل فدراسیونی ملی المپیک کمیتهسی نظارتی آستیده فعالیت قیلهدی. عینحالده، افغانستان اولاق لیگهسی ییتینچی باسقیچی قویاش ۱۴۰۴-ییل، ۲۱-قوسده تورلی ولایتلردن ۱۱ جماعه اشتراکی بیلن پایتخت کابل شهری حدودلریگه قرهشلی «یکهتوت» ده اوتکزیلدی و اوشبو باسقیچ سرپل اولاقچیلرینینگ قهرمانلیگی بیلن توگهدی.
