اوتکن یکشنبه ایرته‌لب ساعت آلتی‌ده، کابل موشک آتیلیشی کبی بیر سیس‌گه گواه ایدی، بو حادثه‌دن بیر نیچه ساعت اوتگچ ایچکی ایشلر وزیرلیگی کابل نینگ شیرپور منطقه‌سیده ایکی راکت اصابت قیلیشیدن خبر بیریب، بو حادثه عاقبتیده هیچ کیم‌گه ضرر ییتیشمه‌گنینی بیلدیردی.
بو هجوم دن ایکی کون اوتیشی‌دن کیین، اوتکن کیچه آمریکا جمهور باشلیغی جوبایدن، بو هجوم قندهی اویوشتیریلیشی خصوصیده تفصیلات بیردی.
جوبایدن گه کوره، اوشبو هوایی هجوم دن مقصد القاعده رهبری ایمن الظواهری دیر و ظواهری هجوم عاقبتیده هلاک ایتیلگن.
بیزلرنینگ فیسبوک صحیفه‌میزگه باش اورینگ!
شونینگدیک آمریکا جمهور باشلیغی گه کوره، القاعده ییتکچیسی کابل ده‌لیگی تصدیقلنگندن کیین، اونی یوق ایتیش بویروغینی بیرگن.
دیمک مذکور هجوم ده، کابل نینگ اونینچی حوزه‌سیگه تیگیشلی شیرپورده واقع بیر اوی نشانگه آلینگن.
جوبایدن نینگ ایتیشیچه: «افغانستان پایتختی کابل شهری ده آمریکا نینگ مؤفقیتلی هوایی هجومی عاقبتیده، القاعده رهبری ایمن الظواهری هلاک ایتیلدی، سیزلر گه معلوم که ظواهری اسامه بن‌لادن نینگ یقین‌لریدن بیری ایدی، او دایم بن لادن بیلن بیرگه ایدی، ۲۰۰۱ _ییل ۱۱ سپتامبر واقعه‌سیده او القاعده ینگ ایکینچی آدمی تانیلر ایدی، او ۲ مینگ ۹۷۷ کیشی نینگ هلاکتی گه سببب بولگن هجوم ده قولی بار ایدی.»
جوبایدن اعلامی دن کیین اسلامی امارت سرپرست حکومتی هم بیر اعلامیه ترقه‌تیب، آمریکا نینگ هوایی هجومینی تصدیق‌لب و اونی قاره له‌دی، بیراق حاضرگه قدر اسلامی امارت حکومتی نینگ رسمی‌لری بو هجوم عاقبتیده القاعده رهبری هلاک ایتیلگنینی رد یاده تصدیق ایتمه‌گن و بو خصوصده سلام‌وطندار نینگ سوال‌لری گه هم جواب قیترمه‌دی.
القاعده ییتکچیسی هلاک ایتیلیشی، افغانستان وضعیتی اوستیگه قندهی تاثیر قیلیشی ممکن؟
سیاسی ایش بیلرمان‌لردن قطاری نینگ ایتیشلریچه، بو حادثه افغانستان وضعیتی اوستیگه سلبی تاثیر قیله‌دی.
بیزلرنینگ توییترده هم تعقیب قیلینگ!
سیاسی ایش بیلرمان ویس ناصری نینگ ایتیشیچه: «القاعده رهبری ایمن الظواهری نینگ کابل ده هلاک ایتیلیشی، اسلامی امارت حکومتی نینگ بیرگن سوزلری گه قرشی دیر، بو افغانستان ده ترورچی گروه‌لر فعالیتی دن گواه‌لیک بیره‌دی و شونینگدیک دنیا جماعه‌چیلیگی آلدیده افغانستان حاضرگی حکومتی نینگ ایشانچ‌سیز قیله‌دی.»
سیاسی ایش بیلرمان‌لردن باشقه بیری هادی عدالت‌جو گه کوره: «القاعده رهبری ایمن الظواهری نینگ کابل ده هلاک ایتیلیشی، نیچه نرسه‌نی اثباتله‌یدی، بیری آمریکا نینگ افغانستان ده بولگن تسلطی، امریکا نینگ ترورچی گروه لرگه قرشی کورشیش کوچی و افغانستان حکومتی نینگ خلق‌ارا هم‌جمعیت آلدیده اعتبارسیز بولگنی.»
بو هجوم آمریکا تامانیدن عین‌حالده اویوشتیریلگن که، ایکی هفته دن کمراق اسلامی امارت حکومتی نینگ بیر ییل‌لیگی گه قالگن.
