اسلامی امارت استخبارات عمومی ریاستی نینگ اورین باسری رحمت‌الله نجیب، اوتگن کونی کابل‌ده اوتکزیلگن ییغینده ایتیشیچه، جمهوریت زمانیده توزه‌لگن مملکت معارفی نینگ تعلیمی نصابی، اسلامی شریعت گه ماس ایمس ایدی. اونگه کوره، جمهوریت تیزیمی زمانیده قیز اوقووچیلر نینگ مناسبتی، سبق اوقیش اسلوبی، اولر نینگ اولتیریب_توریشی اسلامی شریعت گه ماس ایمس ایدی.
اونینگ کوپه‌یتیریشیچه: «سابق توزه‌لگن تعلیمی نصاب‌نی، شریعت، اسلام و فقه بیلن مقایسه‌لشتیرگن تقدیرده، قیزلر نینگ اولتیریب_توریشی، سبق اوقیش‌لری اسلامی شریعت گه ماس ایمس دیر.»
بیزلرنینگ فیسبوک صحیفه‌میزگه باش اورینگ!
شو بیلن بیرگه، قیزلر مکتب‌لری نینگ مسئول‌لری و سابق حکومت معارف متصدی‌لریدن قطاری، اسلامی امارت استخبارات عمومی ریاستی اورین باسری نینگ اوشبو بیاناتینی رد قیلیب ایتیشلریچه، معارف نینگ تعلیمی نصابی، کییم_کیچگی و قیز اوقووچیلر نینگ تعلیمی اسلوبی اسلام قاعده‌لری گه قرشی ایمس ایدی.
سابق حکومت‌ده معارف وزیرلیگی نینگ تعلیمی نصاب علمی عضوی و بیلیم یورت استادی فضل‌هادی وزین، اسلامی امارت استخبارات عمومی ریاستی اورین باسری نینگ بیانات‌لرینی اساس‌سیز دیب سلام‌وطندار گه ایتیشیچه، مملکت معارف نصابی دین عالم‌لری، استادلر و تجربه‌لی کیشی‌لر نینگ نظری بیلن توزه‌لگن.
جناب وزین نینگ ایشانچی گه کوره، افغانستان نینگ تعلیمی نصابی منطقه بویلب «اینگ یخشی اسلامی» تعلیمی نصاب دیر.
شو بیلن بیرگه، سابق حکومت‌ده معارف وزیرلیگی نینگ مسلکی معینی صدیق پتمن اوشبو ادعالرنی رد قیلیب ایتیشیچه، افغانستان نینگ معارف نصابی اسلام دینی بیلن قرشی ایمس. اونینگ کوپه‌یتیریشیچه: «افغانستان نینگ تعلیمی نصابی اسلامی دینی بیلن قرشی ایمس و اوزگریش‌لردن کیین بعضی فکرلر اونگه قوشیلیشی ممکن.»
باشقه تاماندن سابق حکومت‌ده معارف وزیرلیگی تعلیمی و نشرات نصابی باشلیغی نینگ سلام‌وطندارگه ایتیشیچه، اسلامی امارت متصدی‌لری مکتب کتاب‌لرینی بوتونلی مطالعه قیلیش‌لری کیره‌ک، اسلام گه قرشی مورد تاپیلگن تقدیرده، او [کبیر حقمل] جواب‌گر بولیشی ممکن.
کبیر حقمل گه کوره، معارف برچه کتاب‌لری ارا، ۱۸۰ دن ۲۰۰ جلد کتاب یالغیز اسلامی تعلیمات گه تیگیشلی دیر. اونینگ ایتیشیچه، هر بیر کتاب الله اسمی، نعت و ملی سرود بیلن باشلنه‌دی.
جناب حقمل نینگ ایشانچی گه کوره، اسلامی امارت قرشی بولگن مضمون‌لردن بیری فرهنگ مضمونی دیر که اوشبو کتاب مستقل‌لیک و نوروز بیرم‌لری کبی ملی بیرم‌لر اوتکزیلیشیدن بحث قیله‌دی. اونینگ کوپه‌یتیریشیچه: «خوش‌بخت لیک بیلن اسلامی تعلیمی نصابی‌میز بار ایدی و کیمسه بو نصاب‌نی اسلام گه قرشی دییه آلمه‌یدی.»
عین‌حالده، قیزلر مکتبی نینگ مسئول‌لریدن بیری و قیز اوقووچیلریدن بیری نینگ سلام‌وطندار گه ایتیشیچه، قیزلر نینگ کییم_کیچک و سبق اوقویش اسلوب‌لری بوتونلی اسلامی شریعت گه ماس ایدی. اولر اسلامی امارت استخبارات ریاستی اورین باسری نینگ بیاناتینی، قیزلرنی تعلیم‌دن محروم قیلیش اوچون بهانه دیه عنوان قیله‌دیلر.
بیزلرنینگ توییترده هم تعقیب قیلینگ!
ایتیش کیره‌ک که، اسلامی امارت مسئول‌لری، آلتینچی صنف‌دن یوقاری قیز اوقووچیلرگه مکتب باریش رخصتی بیریلمسلیک سببینی، افغانستان کلتوری بیلن قیزلر نینگ کییم_کیچگی ماس ایمسلیگی بیله‌دیلر. اسلامی امارت متصدی‌لری نیچه مراتبه میدیالرگه، مکتب‌لر نینگ آچیلیش طرحی نهایی بولگن تقدیرده، مکتب‌لر آچیلیشینی ایتگن‌لر. لیکن نیچه کون آلدین معارف وزیرلیگی، قیزلر نینگ مکتب‌لرینی آچیش اوچون اسلامی امارت رهبری نینگ بویروغینی کوته یاتگنینی اعلام قیلدی.