سلام‌وطندار، سابق حکومت ملی اردو ده وظیفه بجریب و اسلام امیرلیگی حاکمیتیدن کیین ایش‌سیز بولگن ۱۶ عیال بیلن صحبت اوتکزگن، اولر جدی اقتصادی قیینچیلیک بیلن دوچ بولگنلرینی ایتگنلر. بو عیاللر نینگ ۱۴ ته‌سی گه کوره، ایش‌سیز بولیش‌لریدن کیین آچ‌لیک بیلن روپه‌ره بولگنلر و باشقه ایکیته‌سی ایسه آچ‌لیک معما بیلن دوچ بولمه‌گن بولسه‌لرده؛ بیراق اقتصادی احواللری یخشی ایمس‌لیگینی بیلدیرگنلر. مذکور عیاللر نینگ بیش‌ته‌سی شاق ایشلر، تیکووچیلیک و تیلنچیلیککه یوز کیلتیرگن و قالگنلری ایسه ایش‌سیز دیر. بو عیاللر نینگ ۱۲ ته‌سی یالغیز عایله‌لری نینگ سرپرستی دیر.
باشقه تاماندن، اقتصادی قیینچیلیک باعث بو عیاللر نینگ ۱۳ ته‌سی، روحی کسللیککه چلینگن.
کابل شهری سرک‌لریده تیلنچیلیک قیله‌دیگن اوشبو عیاللردن سمیرا گه کوره، سابق حکومت ده ۱۲ ییل ملی اردو نینگ تورلی بولیم‌لریده وظیفه بجرگن و ایش جریانیده ماسترلیک درجه‌سیگه قدر تحصیل قیلگن؛ بیراق توزوم اوزگریشیدن کیین اقتصادی معما باعث تیلنچیلیک قیلیش گه مجبور بولگن. او نینگ ایتیشیچه: «ایش‌سیز بولگنیمدن بیری عایله‌میز نینگ باشقره‌دیگن هیچ کیم یوق. اقتصادی احوالیمیز ضعیف دیر. اوزیم و اوغلیم هر کونی تیلنچیلیک قیله‌میز. ماسترلیک نی سیاسی بیلیم و حقوق دن آلگن من و بوگون‌لیک کون ده تیلنچیلیک قیله‌یپمن.»
بیزلرنینگ فیسبوک صحیفه‌میزگه باش اورینگ!
غزنی اصلی یشاوچیسی و تورکیه ده حربی مسلکی تعلیم کورگن، ملی اردو نینگ قیشلاق و قبیله‌لر همده شهید و ناگران‌لر بولیم‌لریده وظیفه بجرگن حمیده یوسفزی، حاضر ایش‌سیز دیر ایتیشیچه، عایله‌سی نینگ سرپرستی دیر و باله‌لری نینگ آزیق-آوقت و کییم-کیچگینی تامینلش اوچون باشقه‌لر نینگ اوی‌لرینی تازه‌له‌یدی؛ بیراق بو یول دن قیله‌دیگن درآمدی عایله اعضالری نینگ نفقه‌سینی تامینلش اوچون ییترلی ایمس شونی اوچون بعضی تون‌لرنی آچ‌لیک بیلن اوتکزه‌دیلر. «حقیقتن هم بو کلمه‌لرنی تیلگه آلیش مین اوچون قیین دیر. هیچ قچان ایسیمدن چیقمه‌یدیگن کون‌لرنی اوتکزدیم. بو مدت جریانیده کوپراق آته‌سیزلیکنی حس قیلدیم. اجاره اوی گه یشه‌یمیز و عایله سرپرستی هم اوزیم من. بوکون‌لر اوتیب کیچیشنی امید قیله‌من.»
سینگلی و ایناغه‌سی کیچیک‌لیک ده آته‌سی وفات ایتگن حمیده؛ عایله ده بویوک بولگنی اوچون سابق حکومت تیزیمی ده ملی اردو گه وظیفه بجریب و اوشبو معاش بیلن بیر مدت عایله اعضالری نینگ نفقه‌سینی تامینله‌گن.
ایش تاپیب، حیات و عایله اعضالری نینگ احتیاج‌لرینی تامینلش، یالغیز حمیده نینگ آرزوسی ایمس. بو گزارش ده مصاحبه بولگنلر بو کبی آرزو قیلگنلر.
سابق حکومت ملی اردو نینگ پرسونل و پالیسی سازلیک تعلیمات اورین باسری اوله‌راق ایشله‌گن مروه مرادی، اقتصادی احوالی گه اشاره قیلیب ایتیشیچه: «قنی ایدی حیات توگب و تانگ آتمس ایدی.» مرادی حربی پیلوت بولیشنی آرزو قیلگندی؛ لیکن او اوز آرزولری گه ییته آلمه‌دی. اونگه کوره: «حکومت قوله‌دی، ایش دن بوشه‌دیک. عایله سرپرستی من، حقیقتن زیان کوردیک. روحی لحاظ دن کوپ زیان کوردیم. ایکی ییل مشق قیلگن ایدیک، مدرک آلیش اوچون کوپ تلاش قیلگن ایدیک.»
مروه نینگ کوپه‌یتیریشیچه، توزوم اوزگریشی و ایش‌سیز بولیشیدن کیین، تورموش اورتاغی اوندن اجره‌لگن. اونگه کوره، تویی دن تورت آی اوتگچ و ایری حربی خاتینی بارلیگی اوچون سرپرست حکومت دن قورقیب و اوندن خبرسیز افغانستان نی ترک ایتگن. مروه نینگ ایتیشیچه، ایری ترک ایتگن پیتده حامله بولیب و حاضر باله‌سی ایکی یاشر دیر. «دولت نینگ سونگی پیت‌لریده نامزد بولدیم. اسلام امیرلیگی حاکمیتیدن کیین توی قیلدیم. ایریم تورت آی دن کیین مینی ترک قیلدی، مین مجبورلیک دن آته‌م نینگ اویی گه باردیم.»
مزارشریف یشاوچیسی، اوچ ییل سابق دولت ملی اردو ده عسکر صفتیده وظیفه اجرا قیلگن و حاضر ایش‌سیز سونیا جلال گه کوره، آته‌سی کیکسه و کوزدن عاجز دیر و اوزی هم کسل؛ بیراق یالغیز اوزی توقیز کیشی‌لیک عایله سرپرستی دیر. سونیا نینگ ایتیشیچه، عایله اعضالری نینگ نفقه‌سینی تامینلش اوچون ایش قیدیریب تاپه آلمه‌گن و حاضر اقتصادی معما و روحی قیینچیلیککه چلینگن. «اسلام امیرلیگی حاکمیتیدن بیری بیکار من. ایش‌سیز بولیشدن کیین کوپ قیینچیلیک‌لر گه دوچ بولدیم. اقتصادی معما باعث کسل بولسک دوالش گه پولیمیز یوق، اجاره اوی گه تیریکچیلیک قیلماقده‌میز.»
سابق حکومت ملی اردو ده تورت ییل ایشله‌گن عیاللردن باشقه بیری مسعوده رسولی گه کوره، حاضر ایش‌سیزلیککه قوشیمچه، یوره‌ک خسته‌لیگی گه چلینگن کیکسه آنه‌سیدن سرپرست‌لیک قیلیش گه مجبور دیر. او نینگ ایتیشیچه: «حیاتی‌میزده قیینچیلیک کوپ، اوتگن ییل آته‌م وفات ایتدی. ضعیف و کیکسه آنه‌م بیلن قالدیک. روحی و اقتصادی قیینچیلیک بیلن دوچ میز.»
بیزلرنینگ «ایکس» ترماغی ده هم تعقیب قیلینگ!
بو گزارش ده صحبت قیلینگن ۱۶ عیال دن، تورت نفری توزوم اوزگریشیدن کیین مهاجر بولیش گه اقدام قیلگن. اولر نینگ اوچ نفری ایران و بیر نفری ایسه پاکستان ده مهاجر بولگنلر.
اولر گه کوره، قوشنی اولکه‌لر ده هم اقتصادی قیینچیلیک بیلن روپه‌ره بولیب و شاق ایشلر گه یوز کیلتیریشگن.
دری تیل و ادبیات فاکولته‌سیدن فارغ بولگن و سابق حکومت ملی مدافعه وزیرلیگی باش مفتشی نینگ تدقیقات، حربی پالیسی و اوشبو وزیرلیک نینگ پرسونل تعلیمات اورین باسری صفتیده ییتتی ییل وظیفه بجرگن و جمهوریت توزومی قوله‌شیدن کیین ایران گه مهاجر بولگن رابض سادات نینگ ایتیشیچه: «ایران ده ایش یوق. ایش اوچون مراجعت قیلگن حالده، افغانستان‌لیک فقرا سیزلر دیب ایش بیرمه‌یدیلر. اقتصادی قیینچیلیک باعث ایشلش اوچون مجبور میز.»
شو بیلن بیرگه، عیال حقوقی فعاللریدن بیرقطاری سرپرست حکومت دن، جنسیت نی نظر گه آلمسدن عیال و ایرکک‌لر گه ایش زمینه‌سی یره‌تیلیشینی سوره‌یدیلر. اولر نینگ کوپه‌یتیریشیچه، کوپ سانده عیاللر عایله‌لری نینگ سرپرستی دیر و تورلی ساحه‌لرده فعالیت قیلیش توانی گه ایگه دیر.
عیال حقوقی فعالی سوسن خالقیار نینگ ایتیشیچه، دولت‌لر یشاوچیلر نینگ ایشلش کبی حقوقینی رعایت قیلیب و جنسیت نی نظرگه آلمسدن اولر گه ایش زمینه‌لرینی یره‌تیشی کیره‌ک.
عیال حقوقی فعاللریدن باشقه بیری زینب گه کوره: «بیرقطار عیاللر کابل ده ایش‌سیز دیر و بولر عایله‌لری نینگ سرپرستی دیر، قچان ایکینچی امر یکونلنیب و عیاللر گه ایشلش ایزینی بیریلیشینی اصلا بیلمه‌ی میز.»
برچه‌سی بیلن، سرپرست حکومت سوزلاوچیسی ذبیح‌الله مجاهد نینگ سلام‌وطندار گه ایتیشیچه، حربی اداره‌لر منحل بولیشی و تیزیم ده ینگی کیشی‌لر ایشگه آلینیشی باعث، سابق حربی‌لر نینگ آی‌لیگی توللنمه‌یدی. او نینگ کوپه‌یتیریشیچه: «حربی ارگان‌لر ده قطار کیشی‌لر ایشلر ایدی، لیکن حاضر او ارگان‌لر منحل بولگن و ینگی کیشی‌لر ایشگه آلینگن، اینیقسه عسکرلیک و بو بولیم‌لرده‌گی‌لر باشقه ایشلاوچی سنلمه‌یدی؛ عیال بولسین یا ایرکک، آی‌لیک‌لری توللـه‌نیلمه‌یدی.»
بو گزارش ده سرپرست حکومت مدافعه وزیرلیگی نینگ فکر_ملاحظه‌سینی اورگه‌نیش اوچون تلاش قیلدیک، لیکن اولگورمه‌دیک.