قندوز ولایتیدن ایشانچلی امنیتی منبع و عینی شاهد‌لر نینگ سلام‌وطندارگه ایتیش‌لریچه، قندز ولایتی بناسی‌گه هاوان اوقی اصابت قیلگنی باعث، ولایت حاکمی نینگ ۴ قوروقچی‌سی جان بیرگن.
اوشبو منبعلر گه کوره، اوتگن کون (یک شنبه ۱۱- عقرب) ساعت ۵ اطرافیده هاوان اوقی کندز ولایت بناسی نینگ مهمان‌خانه‌سینی میدانی گه توشگن.
اوشبو منبعلر و عینی شاهد‌لر نینگ کوپه‌یتیریشیلریچه، قطار ایشلاوچی‌لر، حاکم قوروقچی‌لری و یقین‌لری ولایت میدانیده والیبال اوینه‌ب تورگن پیتده هاوان اوقی توشگن.
قندوز حاکمی نینگ سوزلاوچیسی عصمت الله مرادی اوشبو خبرنی تصدیق‌لب ایتیشیچه، هاوان طالبان گروهی تامانیدن بنا میدانی‌گه آتیلگن و نتیجه‌ده، حاکم قوروقچی‌لریدن ۴ ته‌سی هلاک و ملکی ایشلاوچی‌لر شامل ۶ کیشی یره‌لنگن.
قندز ولایت حوزه‌وی کسل‌خانه مسئوللری نینگ ایتیش‌لریچه، واقعه محلی‌دن ۴ جسد و ۶ یره‌دار کسل‌خانه‌گه انتقال بیریلگن.
طالبان گروهی بو حقده فکر بیلدیرمه‌گن، لیکن نیویورک تایمز کونده‌لیگی افغانستان ییریک مسوولری و محلی رسمی‌لریدن نقل قیلیب ایتیشیچه، طالبان گروهی تامانیدن اویوشتیریلگن هجومده ۴ افسر اولگن و بو هجوم اوچووسیز اوچاق تامانیدن صورت تاپگنی نینگ کوپینچه احتمالی بار.
قندز ولایتی کینگش اعضاسی غلام ربانی ربانی مذکور کونده‌لیککه ایتیشیچه، اوشبو هجوم اوچووچی‌سیز اوچاق یا-ده میزایل واسطه‌سی بیلن صورت تاپگنی حاضرگچه انیق‌لنمه‌گن.
نیویارک تایمز کونده‌لیگی نینگ گزارشی اساسیده، قندز ملت وکیلی فضل کریم ایماق اوشبو واقعه خصوصیده فیسبوک صحیفه‌سیده یازیشیچه، هجومده “بو فصل ده ینگی روش استعمال بولگن” نی بیلدیرگن. لیکن هجوم اوچووچی‌سیز اوچاق تامانیدن صورت تاپگنی حقیده فکر بیلدیرمه‌گن.
قندوز ولایتی مسئوللری نینگ ایتیش‌لریچه، طالبان گروهی نینگ نظارت ایتیش مقصد ده استعمال قیله‌دیگن اوچووچی‌سیز اوچاغی کوپینچه وقت ولایت بناسی اوستیگه کورینگن. نیویارک تایمز کونده‌لیگی گه کوره، جاری میلادی ییل مارچ آیی‌ده امنیتی کوچلر بیر اوچووچی‌سیز اوچاق نی توشیرگن‌لرینی ادعا قیلیشدی.
