امتحان‌لر ملی اداره‌سی مسئوللری، مملکت نینگ ۱۱ ولایتیده ۱۴۰۲_ییل کانکور سیناوی، اوشبو ییل ۲۰ و ۳۰ سرطان ده اوتکزیلیشینی اعلام قیلگچ، مملکت نینگ بیر قطار بیلیم یورت‌لری اینیقسه شمالی ولایت‌لر بیلیم یورت‌لری نینگ اوزبیک تیلی و ادبیاتی دیپارتمنتی استادلری و مدنی فعاللری، سونگی ییل لرده مملکت بیلیم یورت‌لری نینگ اوزبیک تیلی و ادبیاتی بولیم‌لریده درس اوقیش اشتیاقی کمه‌یب باره‌یاتگنیدن خواطر بیلدیرگنلر.
افغانستان اوزبیک خلقی ضیالی‌لری، اوقیتووچیلری و مدنی فعاللری اوشبو مناسبت بیلن سوسیال میدیا گه کمپاین یولگه قوییب، ۱۲ صنف‌نی بیتتیریب و کانکور سیناوی بیره‌دیگن اوقووچیلرنی، اوزبیک تیلی و ادبیاتی نی تنلش‌لرینی ترغیب قیلگنلر.
بیزلرنینگ فیسبوک صحیفه‌میزگه باش اورینگ!
اولر، سونگی ییل‌لرده مملکت بیلیم یورت‌لری نینگ اوزبیک تیلی و ادبیاتی بولیم‌لریده درس اوقیش اشتیاقی کمه‌یب باریشیدن خواطر بیلدیریب، بو وضعیت دوام تاپگن حالده، اوزبیک تیلی و ادبیاتی بولیملری یاپیلیشیدن آگاه‌لنتیریشگن.
جوزجان بیلیم یورتی اوزبیک تیلی و ادبیاتی دیپارتمنتی نینگ استادی نورالله آلتای بو وضعیت دن خواطر بیلدیریب، «اوزبیک تیلی و ادبیاتی» بولیملری نینگ اکثریتیده قیز باله‌لر تحصیلی معطل‌لیگی و اوتگن ییلی اوغیل باله‌لر بو بولیمنی اونچه انتخاب قیلمسلیک‌لری باعث بیرینچی صنف تشکیل بولمه‌گنینی معلوم قیلگن.
جناب آلتای اوز فیسبوک صحیفه‌سیده یازیشیچه: «افغانستان پوهنتونلری قاشیده‌گی اوزبېک تیلی و ادبیاتی بولیملری‌نینگ اکثریتیده، قیز باله‌لر تحصیلی معطلیگی و اوتگن ییلی اوغیل باله‌لریمیز بو بولیمنی اونچه انتخاب قیلمه‌گنلیکلری سببلی، بیرینچی صنف تشکیل بولمه‌دی. اگر بو حالت بو ییل هم دوام ایتسه، کوپچیلیک پوهنتون‌لرده اوزبېک تیلی و ادبیاتی بولیملری تدریجی روشده یاپیلیشی و نتیجه‌ده اوزبېک خلقی یریم عصر دوامیده قولگه کیریتگن معنوی یوتوق‌لریدن محروم بولیب قالیشی تورگن گپ. غفلت و بی‌تفاوت‌لیک عاقبتیده یوزه کیله‌یاتگن بو معنوی یوقاتیش نینگ نقدر بویوکلیگینی بوتون ابعادی بیلن بیر بار کوز اونگیزده مجسملشتیریب کورینگ.»
بیزلرنینگ توییترده هم تعقیب قیلینگ!
جمهوریت تیزیمی ده اوزبیک ضیالی‌لری نینگ سعی‌وحرکتی طفیلی مملکت نینگ قطار ولایت‌لری اینیقسه شمالی ولایت‌لر نینگ بیلیم یورت‌لریده اوزبیک تیلی و ادبیاتی دیپارتمنت‌لری آچیلگن بولسه ده، بیراق اسلام امیرلیگی حاکمیتیدن کیین اوزبیک تیلی و ادبیاتی دیپارتمنت‌لری اوقووچی آزلیگی بیلن روپه‌ره بولگن.