سونگی بیر نیچه کون دوامیده تورکیهنینگ آنتالیا شهریدهگی کورگزمه مرکزیده اونلب مملکت وکیللری اقلیمنینگ کیلهجگی حقیده مذاکرهلر آلیب بارماقده. عینی شو کونلرده بلخ ولایتیده بیر دهقان ییلدن-ییلگه سووی کمهیب بارهیاتگن قودوققه تیرمولماقده. اقلیم اوزگریشیگه قرشی اینگ ضعیف مملکتلردن بیری بولگن افغانستاننینگ اوشبو ییغیلیشده اورنی ایسه بوش.
کتته ییغیلیش، اوندن ده کتته یوقلیک
جهان اقلیم ییغیلیشی – کاپ ۳۱، توقیزینچی نومبردن ۲۰ نومبرگچه تورکیهنینگ آنتالیا شهریده بولیب اوتماقده. اوشبو ییغلیشده حکومت وکیللری، متخصصلر، خلقارا تشکیلاتلر و اطراف-محیط حمایهچیلری بیرقطار مهم مسئلهلرنی محاکمه قیلیش اوچون جمع بولگن. جملهدن ایسیقخانه گازلری چیقیندیلرینی کمهیتیریش، اقلیم گه قرشی کورهش اوچون مالیهوی حمایه قیلیش، اقلیم اوزگریشلریگه ماسلشیش، تازه انرژیدن فایدهلنیش، سوو منبعلرینی باشقریش و آزیق-آوقت خوفسیزلیگینی تأمینلش.
اوشبو گلگی یییغیلیشنینگ تشکیل ایتیش ترتیبی ناعادتی. تورکیه ییغیلیش میزبانی و باشلیغی دیر، بیراق مذاکرهلرگه آسترالیا رهبرلیک قیلهدی. آنتالیا اقلیم اوزگریشلریدن اینگ کوپ ضرر کورهیاتگن مملکتلرنینگ مالیهوی مبلغلر، تکنالوژیلر و تخنیک یاردمدن فایدهلنیش امکانیتلرینی بیلگیلب بیرهدیگن قرارلر قبول قیلینهدیگن مرکز گه ایلنیشی کوتیلماقده. ایسیقخانه گازلری چیقیندیلرینی چیقریشده اولوشی جوده کم بولیشیگه قرهمی، افغانستان اوشبو انقراضنینگ اساسی قربانلریدن بیری دیر. بیراق، مملکت قرار قبول قیلووچیلر ایچیده یوق.
عینن منه شو ضدیت سلاموطندار رادیوسینینگ «یشیل یول دستوری» دایرهسیده تیارلنگن اوشبو گزارشنینگ اساسی موضوعسی دیر. اقلیم انقراضی عاقبتلری اوچون اینگ کتته نرخنی تولهیاتگن مملکت گه، عینن شو خرهجتلرنی قاپلش مسئلهسی حل قیلینهدیگن جایده دقت قیلینمهیدی.
افغانستان آنتالیاده: کیم کیلهدی، کیم کیلمهیدی؟
اوچینچی نومبر کونی آسوشیتدپرس نشری، اسلام امیرلیگی رسمیلری بیرلشگن ملتلر تشکیلاتینینگ اقلیم بوییچه ییغیلیشیگه کوزهتووچی صفتیده تکلیف ایتیلگنی و ایکینچی بار اوشبو خلقارا انجمنده اشتراک ایتیشنی ریجهلشتیرهیاتگنینی خبر قیلگن. اطراف-محیطنی محافظه قیلیش ادارهنینگ اقلیم اوزگریشی بولیمی باشلیغی روحالله امین، اوشبو ریجهنی آسوشیتدپرس گه تصدیقلهگن. تورکیهلیک بیر رسمی هم اسلام امیرلیگی وکیللری کاپ ۳۱ ییغیلیشیده کوزهتووچی صفتیده اشتراک ایتیشینی ایتگن. بوندن اول، اسلام امیرلیگی حکومتی میلادی ۲۰۲۱-ییلده حاکمیتگه قیتگنیدن سونگ، ایکی ییل اول باکوده بولیب اوتگن ییغیلیشده ایلک بار بوندهی انجمنده اشتراک ایتگن ایدی.
بیر نیچه کوندن سونگ ایسه باشقه بیر منظره یوزه گه چیقدی. ایچکی ییتکرمهلر گه کوره، افغانستان هیئتی تورکیهنینگ رسمی تکلیفی گه قرهمی، کنفرانسده اشتراک ایتمسلیککه قرار قیلگن. اوتگن ییلی هم اسلام امیرلیگی افغانستان اقلیم اوزگریشیگه نسبتن ضعیف بولیشیگه قرهمی، کاپ ۳۰ ییغیلیشیگه تکلیف ایتیلمهگنیدن ناراضیلیگینی بیلدیرگن ایدی.
شو طریقه، مسئله «اشتراک ایتیش»دن هم مرکبراق سوالگه ایلنهدی: افغانستان نامیدن کیم و قندهی وکالت بیلن اشتراک ایتیشی کیرهک؟ اقلیم اوزگریشی و سوو منبعلری بوییچه بیلرمان نایاب صدیقی سلاموطندار بیلن صحبتده ایتیشیچه، بو مسئله فقط تکلیفنامه یوباریش بیلن چیکلنمهیدی. اساسی سوال – کاپ مذاکرهلریده افغانستان نامیدن تولیق وکالت بیلن قیسی هیئت سوز یوریته آلیشی مسئلهسی دیر.
دوامی بار…



