مرکزی بانک نینگ ینگی قراری اساسیده، بوندن کیین مملکت صراف‌لری شخصی پول جوازی اورنی گه شرکتی جواز آلیش‌لری کیره‌ک. مرکزی بانک نینگ اوشبو قراری مملکت صراف‌لری نینگ تنقیدلری بیلن روپه‌رو بولگن.
افغانستان پول‌لیک خذمتلر و صرافلر کینگشی، مرکزی بانک نی صرافلرنینگ ایشی گه قیینچلیک یره‌تیش گه عیبله‌گن.
صرافلر کینگشی مرکزی بانک نینگ قراری گه قرشی، بوگون مملکت بوییچه اینگ کتته پول المشتیریش مرکزی بولگن «سرای شهزاده» نی باغله‌گن.
پول‌لیک خذمتلر و صرافلر کینگش باشلیغی میرافغان صافی نینگ ایتیشیچه، صرافلرنینگ ایش جوازی تمدید بولمه‌گنی و شرکت جوازی مذکور بانک آرقه‌لی جبری بولیشی، صرافلرنینگ ایشی گه جدی ضرر ییتیشتیرگن. اونگه کوره، ولایت‌لرده امکانیت یوقلیگی باعث بو قرار اجرا ایتیلیشی نینگ امکانی یوق.
شونینگدیک کابل و ولایتلر صراف‌لری مرکزی بانک نینگ بو قراریدن تنقید قیلیب ایتیش‌لریچه، مملکت نینگ پول بازارلری فعالیت قیلمه‌گنی اقتصاد گه ضرر ییتیشتیره‌دی. اولرگه کوره، بو ایش کونده بیر میلیارد افغانی اقتصادی چرخه‌دن قالیش گه سبب بوله‌دی.
بیراق مرکزی بانک نینگ ایتیشیچه، پول‌یوویش و ترورچیلیک تمویل ایتیلیشی نینگ آلدینی آلیش اوچون بونده‌ی بیر قرار آلینگن.
مرکزی بانک نینگ رسانه‌لر بولیمی باشلیغی عصمت‌الله کوهسار نینگ سلام‌وطندارگه ایتیشیچه، صرافلرنینگ جوازی شرکت گه اوزگریشی اولرنینگ فعالیتی کینگه‌یشی گه فایده‌لی تمام بوله‌دی.
شونده‌ی بیرحالده، صرافلر و افغانستان پول‌لیک خذمتلر کینگشی مرکزی بانک‌دن شرکت جواز آلیش اختیاری بولیشی و صرافلرنینگ فعالیتی بولیمیده ایجاد بولگن تخنیکی قیینچلیکلر تیزلیککه حل ایتیلیشی نی سوره‌گن.
