عقربهلر ایرتهلبکی ساعت ۷:۰۰ گه یېتیشیشگه استه-سیکین حرکت قیلماقده؛ کابل سرای شمالیده میوه و سبزهوات بازاری ینگی گوجوملشهیپتی، توپراقلی ییرلرده کراچیلرنینگ تارتیش، ساتووچیلر آوازی همده نعنا، ریحان و گشنیزنینگ اوتکیر هیدی، ینگیدن اطرافنی قمرهب آلماقده.
اوشبو بوتون گوجوملیک آرهسیده، اورته بوی و «ماوی» جاکتلی بیر کیشی، کراچیسینی زحمت بیلن کشلماقده؛ اونینگ یوزیده هېچ قندهی طرزده یاشیریب بولمهیدیگن غم کوریلهدی.
۲۸ یاشر احمدضیا اکبری، کابلده ییتّی عایله اعضاسی بیلن تیریکچیلیک قیلهدی، او خصوصی بیلیم یورتلردن بیریدن ژورنالیست فاکولتهسیدن فارغ بولگن. جمهوریت توزومی قولهشیدن آلدین، ژورنالیست اولهراق تلویزیونلردن بیریده ایشلردی؛ بیراق تورت ییلدن بیری ایرتهلب شاور آلیش و اتو قیلینگن کییم-کیچکلرینی کییش اورنیده، چرچاق تنهسی بیلن یاتگن جاییدن توریب و تلویزیون گه باریش اورنیده، میوه و سبزهوات بازاری گه اهالی یوکینی انتقال بیرهدی.
اونگه کوره: «تابش بیلیم یورتی ژورنالیزم و علاقهلر فاکولتهسینی بیتّیرگن من. اوسمیرلیکدن شو رشته گه قیزیقردیم و آرزوم گه ایریشدیم، ایشلهدیم هم. ایکّی ییل مشعل بیلن ایشلهدیم، بیر ییل آیینه بیلن و اېندی تورت ییلدن بیری سودا مارکیتیده ایشلهیپمن.»
بیزلرنینگ فیسبوک صحیفهمیزگه باش اورینگ!
احمدضیا، میوه و سبزهوات بازاریده باشقهلرنینگ یوکینی انتقال بیریش آرقهلی کوپراق پول قولگه کېریتیش گه حرکت قیلهیاتگن یوزلب کیشی کبی، میوه قوتیسینی کراچیسی گه جایلشتیریب و مالکی اویی گه یېتکزیب بیرهدی. گویا اجین باسگن قوللری بیلن، پیشانهسیدهگی تیرنی اریتهدی.
کراچیسیده جایلشتیرگن یوکنی انتقال بیریش عوضی گه ۲۰ افغانی قولگه کېریتهدی، چرچاغینی چیقریش اوچون کراچیسی اوستیگه اولتیرهدی. اوتمیشدن سۉز یوریتگن حالده، کوچه مصاحبهلری که حاضر مصاحبه قیلووچی اورنیده، اۉزی گزارش سوژهسی بولگن، کوزلریده نهایت خستهلیک سېزیلهدی. «مخبرلیک مینینگ کتته آرزوم اېدی. دوبلاژ بولیمیده ایشله دیم، کېین اېسه اجتماعی دستورنینگ پرودکشن و تولید بولیمیده ایشلهدیم کیینچهلیک مخبرلیک بولیمده هم ایشلهدیم. بو گون اوستیمگه کیلگن احوالدن عزاب چیکه من.»
احمدضیا، تورت ییلدن بیری اداره و استدیو اورنیده، ایرتهلب اوشبو گوجوملی بازار تامان یوللنیب، کراچی سودرهیدی، میوهلرنینگ قوتیسینی یوکلهیدی و اوشبو چېکّن زحمتلری درآمدی هر کونی ۲۰۰ یا-ده ۳۰۰ افغانی دیر، بو مقدار پول بیلن ییتّی کیشیلیک عایله اعضاسینینگ احتیاجلرینی تأمینلش گه حرکت قیلماقده.
بیزلرنینگ «ایکس» ترماغی ده هم تعقیب قیلینگ!
اونینگ کوپهیتیریشیچه: «اوشبو مارکیتنینگ ایشی ایرتهلب ساعت آلتیده آذان وقتی بیلن باشلنهدی. کوپراق موترلر گه یوک آرتهمن. اصل ایشیم کراچی وانلیک دیر. مارکیتنینگ ایشی انیق اېمس، کوپینچه کونلری ۲۰۰ یا-ده ۳۰۰ افغانی درآمد قیلهمن.»
پایتختده صرف-خرهجت یوقاریلیگی، اکبرینی یوک تاشووچی کراچی بیلن کونلرینی اوتکزیش گه مجبور قیلگن؛ بیراق آرزولرینی حاضر هم اېسدن چیقرمهگن و ېنه یېتکرمهلرده ایشلش گه امیدوار دیر. احمدضیا سۉنگی تورت ییلده تورلی یېتکرمهلر گه ایشلش اوچون مراجعت قیلگن؛ بیراق هر مرته رد جوابی بیریلگن. «حقیقت شو که اوشبو مدت ایچیده کوپ سعی-حرکت قیلدیم، تلویزیونلر گه مراجعت قیلدیم. مارکیتده ایشلش اونچهلیک وظیفه اېمس و ایرکین ایش دیر؛ بیراق ېنههم کوندهلیک قیینچیلیکلر حل بولهدی.»
اونگه کوره، اوسمیرلیک پیتیدن ژورنالیست بولیش گه قیزیقردی و اونگه یېتیشیش اوچون، کوپینچه کیچهلرنی اویقوسیزلیکده اوتکزگن. اېندی میوه و سبزهوات بازاریده کراچیسی اوستیگه اولتیریب و باشقهلرنینگ یوکینی انتقال بیریشنی کوتماقده؛ غایهلریگه اېته آلمسلیکنی ایسلش، اونی اوچون قیین.
احمدضیانینگ ایتیشیچه، بو احوال کوزلریدن اویقونی یوقاتگن. غم-قیغوسینی زور گه یوتیب بوندهی دیېدی: «قیزیقهدیگن رشتهدن اوزاق من. بو ایشده هر کونی نه شیمه و نه حوصله قالهدی. بو احوالنی کوریب عذاب چیکهمن. کیچهلری بو احوال حقیده اویلب و کوپ جگرخون بولهمن.»
احمدضیا اکبری، خسته آواز بیلن ېنه یشاوچیلرنینگ امید و عذابلرینی حکایتچیسی بولیش اوچون، ژورنالیستلرنی قۉللب-قوتلاوچی نهادلردن او و کسبداشلرینی یېتکرمهلر گه باریش امکانیتینی یرهتیب بیریشلرینی اېستهیدی.
