حیوانلر بیلن بیر خانهدانده یشش نهفقط روحی تسکین و یالغیزلیکدن خلاص بولیش گه یاردم بیرهدی، بلکه انسان ارگانیزمی اوچون هم کتّه فایده کېلتیریشی ممکن. علمی تدقیقاتلر شونگه اشاره قیلماقده که، حیوانلر بیلن یقین مناسبت ایمن (مصئون) تیزیمنینگ فعاللشیشیگه، بعضی کسللیکلر خوفینینگ کمهیشیگه سبب بولهدی.
اینیقسه کیچیک یاشده حیوانلر بیلن بیرگه اوسگن بالهلرده آلرژی، ایگزیما و حتا اۉز ایمن کسللیکلر کبی خستهلیکلر انچه کم کوزهتیلهدی.
آمیشلر مثالی: طبیعی حیات-طبیعی ساغلیق
۱۸-عصرده مرکزی اروپادن امریکا گه کوچیب کېلگن آمیشلر اهالیسی بوگونگی کونگه کېلیب هم اۉز عنعنوی حیات طرزینی سقلب قالگن. اولر حاضرگی کونده هم آت ارهوهده یورهدی، اویلریده حیوانلر بیلن بیرگه یشهیدی و دییرلی تکنالوژیک اوسکونهلردن فایدهلنمهیدی. اما اولرده آلرژی، آستمه و ایمن تیزیمی بیلن باغلیق باشقه معمالر جوده کم اوچرهیدی.
بیزلرنینگ فیسبوک صحیفهمیزگه باش اورینگ!
۲۰۱۲-ییل ایندیانا ایالتیدهگی آمیشلر و جنوبی داکوتادهگی هوتریتلر قیشلاق جماعهلرینینگ بالهلری اورتهسیده تدقیقات اۉتکزیلدی. هر ایکّی جماعه صاف هوا، طبیعی آوقت و فارمرچیلیکّه تیهنگن تورموش طرزی بیلن یشهیاتگن بولسه-ده، نتیجهلر سیزیلرلی فرق قیلدی. هوتریک بالهلریده آلرژی و آستمه حالتلری آمیشلر گه نسبتن ۴-۶ مرته کوپ انیقلندی.
سببی نیمه؟
آسیای فرق شونده که، هوتریتلر فارمرلیکده زمانهوی صناعت تکنالوژیلرینی قولـلهیدی. حیوانلر اویدن علیحده مخصوص فارملرده سقلنهدی. آمیشلر اېسه حیوانلر بیلن بیر خانهدانده یشهیدی. بو اېسه انسان ارگانیزمینینگ تورلی میکرو ارگانیزملر بیلن منتظم علاقهده بولیشیگه آلیب کېلهدی.
میکروبلر-دشمن اېمس دوست
ایت، موشوک (پشک)، قوشلر و باشقه اوی حیوانلری انسان تیریسی، آغیز بوشلیغی و حتا ایچک میکروفلوراسیگه تورلی باکتریالرنی وقتینچه آلیب کیریشی ممکن. ایلک قرهشده بوندهی حالت سلبی تویولیشی ممکن، بیراق عالملر بو ارگانیزم اوچون فایدهلی ایکنینی قید اېتیشماقده.
ویسکانسین بیلیم یورتی پروفیسوری نسی صفدر و اونینگ همکسبلری حیوانلر بیلن یشهیاتگن انسانلرنینگ میکروبیومینی تحلیل قیلیش آرقهلی انسان و حیوان اورتهسیدهگی میکروب المهشینووینی اورگنماقدهلر. اولر گه کوره، بو حالت مصئونیتنی «تربیهلهیدی»، یعنی ارگانیزم ایمن جوابلرنی توغری شکللنتیریشنی اورگنهدی.
بیزلرنینگ «ایکس» ترماغی ده هم تعقیب قیلینگ!
بیراق، بعضی عالملر بو فکر گه احتیاطکارلیک بیلن یاندهشماقده. مثلن، پروفیسور گیلبیرتنینگ تأکیدلشیچه، حیوان باکتریهلری ارگانیزمده دایمی قالمسلیگی ممکن، اما اولرنینگ وقتینچه تأثیری هم مهم ایمونولوژیک مناسبتلرنی ایشگه توشیرهدی.
خلاصه: حیوانلر انسان سلامتلیگینینگ طبیعی یاردمچیسی
ایت بیلن سَیر قیلیش، موشوکنی سیلب اوتیریش یا که حیوانلر بیلن یقینده یشش-بولرنینگ برچهسی ارگانیزمنی تورلی باکتریلر بیلن علاقه گه کېریشیش گه سبب بولهدی. ایمونولوژیست لایم اومخانی تأکیدلگنیدیک، انسان تنهسی اۉزیگه نایاب طرزده ماس کېلهدیگن باکتریلر بیلن محیطده یشش آرقهلی ایمن تیزیمینی طبیعی طرزده چینیقتیرهدی.
دنیاده بعضی مکتب و مرکزلرده بالهلر اوچون حیوانلر بیلن ملاقات قیلیش امکانیتی یرهتیلهیاتگنی بیجز اېمس. مثلن، ایتالیاده آتلر بیلن بالهلر ملاقات قیلیشی اوچون مخصوص فارملر تشکیل اېتیلدی. نتیجهده، بالهلر ایچکلریده فایدهلی باکتریلر سانی آرتدی.
شوندهی اېکن، اویده حیوان باقیش نهفقط بالهلر، بلکه کتّهلر اوچون هم سلامتلیک منبعی بولشی ممکن. طبیعت گه یقینلیک-انسان سلامتلیگینینگ اساسی عامللریدن بیری اېکنی اونیتیلمسلیک کېرهک.
