بوگون “دوشنبه” افغانستان ژورنالیست‌لری مصونیت کمیته‌سی، خلق ارا عیاللر کونی مناسبتی بیلن بیر خبرنامه نشر قیلیب سونگی ۶ آی جریانیده میدیالرنینگ عیال ایشلاوچی‌لری ۱۸% کمه‌یگنیدن خبر بیرگن.
اوشبو نهاد، مذکور رقم نی خواطرلنترووچی عنوان قیلیب و افغانستانده خبرچی‌لیک ایشی نینگ وضعیتی یمان بولگنی‌نی بیلدیرگن.
افغانستان ژورنالیست‌لری مصونیت کمیته‌سی نینگ ایتیشیچه، مملکت ۳۴ ولایتیده فعال میدیالردن ۹۰% تیکشیریلگن. اوشبو تیکشیریشگه کوره، میدیا ایشلاوچی‌لریدن ۳۰۰ ته‌سی امنیتی تهدیدلر، هدفلی قتل‌لر، میدیالرنینگ مالی قیین‌چیلیگی و کرونا ویروسی چیقگنی سبب، ایش‌لرینی قوییب یا-ده قولدن بیرگنلر.
اوشبو خبرنامه‌ده ایتیلیشیچه، جاری ییل نینگ بیرینچی ۶ آیی‌ده مملکت بوییچه ۱ مینگ و ۶۷۸ عیال میدیالرگه فعالیت قیله‌ریکن، لیکن اوشبو رقم حاضرده ۱ مینگ و ۳۷۷ کیشی گه کمه‌یگن و عیال ایشلاوچی‌لرنینگ سانی ۱۸% کمه‌یگن.
مذکور تیکشیریشگه کوره، میدیالرده فعالیت قیله‌دیگن عیال‌لردن کوپراغی کابل اوندن سونگ، هرات و بلخ ده دیر و شونینگدیک، لوگر ولایتیده یالغیز بیر عیال میدیا ده فعالیت قیله‌دی.
ژورنالیست‌لر مصونیت کمیته‌سیگه کوره، غور، نیمروز، سرپل، لغمان، پروان، کاپیسا، ارزگان، میدان‌وردک و لوگر ولایتیده هیچ‌بیر عیال خبرچی یوق دیر، یالغیز عیال ایشلاوچی‌لر باشقه بولیم‌لرده فعالیت قیله‌دی.
شونینگدیک، نورستان، کنر، پکتیا، پکتیکا و زابل ولایت‌لریده هیچ‌بیر عیال میدیا ده ایشلمه‌یدی. ایتیلیشیچه، زابل و پکتیا ولایت‌لریده فعالیت قیله‌دیگن ایکی عیال خبرچی امنیتی تهدیدلر سبب، ایش‌لرینی ترک قیلگن.
افغانستان ژورنالیست‌لری مصونیت کمیته‌سی نینگ حاضرگی وضعیتدن خواطر بیلدیریب ایتیشیچه، میدیالرده عیاللرنینگ کینگ شکلده حضور تاپیشی و فعالیت قیلیش‌لری معلومات بیریش خصوصیده جدی نیازلردن دیر.