بیرلشگن ملت‌لر تشکیلاتی نینگ خلق‌ارا آزیق-آوقات دستوری مسئوللری، افغانستان ده قشاقلیک کوپه‌یشیدن خواطر بیلدیریب ایتیشلریچه، بو ییل قیش موسومی‌ده اوشبو مملکت یشاوچیلریدن قریب ۱۶ میلیونی، کیینگی آزیق-آوقتلری نی قنده‌ی و قه‌ییردن قولگه کیلتیریش نی بیلمه‌یدی. اولر نینگ کوپه‌یتیریشلریچه، خلق‌ارا آزیق-آوقت دستوری بو ییل قیش موسومی اوچون افغانستان بویلب یاردم‌لرینی ۷ میلیون کیشی گه کوپه‌یتیرگن.
افغانستان ده بیرلشگن ملت‌لر تشکیلاتی نینگ خلق‌ارا آزیق-آوقت دستوری سوزلاوچیسی ضیاءالدین صافی نینگ سلام‌وطندار گه ایتیشیچه، مذکور دستور نیازمند عایله‌لر گه یاردم بیریش خصوصیده، کیله‌سی آلتی آی اوچون ۶۷۰ میلیون دالر گه نیازی بار.
بیزلرنینگ «ایکس» ترماغی ده هم تعقیب قیلینگ!
اونینگ کوپه‌یتیریشیچه: «آزیق-آوقت دستوری ۲۰۲۴-ییل اوچون افغانستان ده حقیقی نیازلر اساسیده ریجه‌لشتیرگن؛ بیراق بودجه گه قول تاپیش اساسیده، یاردم‌لر نینگ اولویت بیریش گه مجبور بولگن. افغانستان ده ۲۰ میلیون قشاق گه یاردم بیریش نی ایسته‌یمیز؛ لیکن اونینگ اوچون قریب ۲ میلیارد دالر بودجه گه نیازیمیز بار و شونینگدیک مذکور دستور قشاق و نیازمند عایله‌لر گه یاردم بیریش اوچون کیله‌سی آلتی آی گه ۶۷۰ میلیون دالر گه نیازی بار.»
کابل شهری «چهارقلعه‌سی وزیرآباد» منطقه یشاوچیسی خداداد، عایله خره‌جتی نی تأمین‌لش اوچون بایسکلی بیلن پایتخت سرک‌لریده یوریب، نیچه نان اویی گه آلیب باریش اوچون اخلتلر ایچیدن ساتیله‌دیگن نرسه‌لر نی توپله‌یدی. اونینگ ایتیشیچه، کونلردن بویان بوش قول بیلن اوییگه باریب و باله‌لری بیلن کیچه‌لر نی آچ اوتکزگنلر.
خداداد نینگ کوپه‌یتیریشیچه، اوتگن بیر ییل‌ده یالغیز بیر مرته انسان‌پرورلیک یاردم قولگه کیلتیرگن. «ایرتنگ‌دن آخشم‌گچه بوش سوو و انرژی بوتل‌لری نی توپله‌یمن. کوپینچه کون‌لر ۶۰ افغانی قولگه کیلتیره‌من و بعضی کون‌لر ایسه بوش قول بیلن اوی گه کیته‌من.»
بیزلرنینگ فیسبوک صحیفه‌میزگه باش اورینگ!
شونینگدیک کابل شهری «کلوله پشته» منطقه یشاوچیسی و سکیز کیشی‌لیک عایله سرپرستی بولمیش فیض‌الله نینگ ایتیشیچه، حاضرگچه انسان‌پرورلیک یاردم‌لردن فایده‌لنه آلمه‌گن و خلق‌ارا نهاد‌لردن یاردم‌لر نینگ نیازمند کیشی گه ترقه‌لیشینی ایسته‌یدی. «منطقه‌میزده ۱۷۰ اوی بار. ۱۷۰ اوی گه یاردم بیریله‌دیگن ۵ کارت ترقه‌تیله‌دی و برچه گه یاردم ترقه‌تیلمه‌سلیگی اوچون اهالی آره‌سیده جنجل چیقه‌دی. بیله‌دیلر مه قشاق عایله کوپ؛ سروی نی کوپه‌یتیریب و یاردم‌لر نینگ کوپه‌یتیریشلری کیرهک.»
عین حالده، اقتصاد وزیرلیگی مسئوللری نینگ ایتیشلریچه، اولر ایش زمینه‌سی یره‌تیلیش برنامه‌لرینی یولگه قوییلیشی بیلن، مملکت‌ده قشاقلیک سانی کمه‌یشی خصوصیده سعی و حرکت قیله‌دیلر. اوشبو وزیرلیک سرپرستی عبدالرحمان حبیب نینگ ایتیشیچه: «اقتصاد وزیرلیگی قشاقلیک کمه‌یشی اوچون ایکینچیلیک سکتوری‌دن حمایت قیلیش و ایش زمینه‌سی یره‌تیلیش جمله‌دن مسلکی و فنی تعلیم‌لر نی اورگتیش کبی برنامه‌لر نی یولگه قوییب و بو برنامه‌لر مملکت‌ده قشاقلیک سانی نینگ کمه‌یتیره‌دی.»
ایتیش کیرهک که، بیرلشگن ملت‌لر تشکیلاتی نینگ انسان‌پرورلیک یاردم‌لر نی هماهنگ قیلووچی دفتری یا-ده اوچا، ینگی‌لیکده افغانستان یوقاری آچلیک و توییب آوقت‌لنمسلیک بیلن روپه‌ره بولگن و جاری میلادی ییل‌ده، اوشبو مملکت یشاوچیلریدن قریب ۱۵.۸ میلیونی نینگ جدی آزیق-آوقت ناتینچ‌لیگی نی تجربه قیلیشی ممکن دیگن.
