بیرلشگن ملت‌لر تشکیلاتی نینگ خوفسیزلیک کینگشی گه اعضا ۱۰ مملکت نماینده‌لری، قوشمه بیر بیانه ترقه‌تیب، اسلامی امارت‌دن برچه قیزلر یوزی گه مکتب‌لرنی آچیشینی طلب قیلگن‌لر.
بیرلشگن عرب امیرلیگی، ناروی، آلبانیا، برازیل، فرانسه، گابن، ایرلند، مکسیکو، بریتانیا و آمریکا اوشبو بیانه‌نی صادر قیلگن مملکت‌لردن عبارت دیر. بیانه‌ده کیلیشیچه: «بیزنی پیامی‌میز آیدین دیر: افغانستان ده‌گی برچه قیزلر مکتب باریشی کیره‌ک.»
بیرلشگن ملت‌لر تشکیلاتی خوفسیزلیک کینگشی نینگ اوشبو اعضالری گه کوره، اوتگن هفته افغانستان بویلب بیر میلیون‌دن آرتیق قیز باله‌لری مکتب باریش اوچون تیارگرلیک کورگن ایدیلر؛ لیکن سونگی دقیقه‌لرده تعلیم و تربیه‌دن محروم بولیش‌لری باعث نا امید بولدیلر.
بیزلرنینگ فیسبوک صحیفه‌میزگه باش اورینگ!
اولر نینگ تأکیدلشلریچه، بو قرار اسلامی امارت سرپرست حکومتی نینگ سونگی آی‌لرده دنیا جماعه‌چیلیگیگه بیرگن وعده‌لری گه قرشی دیر. مذکور ۱۰ مملکت نماینده‌لری نینگ ایتیشلریچه، بو گَل سوزنی توتمسلیک واقعن خواطرلی دیر؛ چونکه تعلیم دنیا بویلب باله‌لر نینگ مسلم حقی دیر که قیزلر هم شامل بوله‌دی.
بیانیه‌ده کیلیشیچه: «افغانستان قوللش عرفه‌سیده قرار تاپگن و بو مملکت تینچ و ثبات بیر کیله‌جگ اوچون، یریم نفوسینی تعلیم‌دن محروم قیلمسلیگی کیره‌ک.» شونینگدیک بیانیه‌ده تأکیدلنیشیچه، اسلامی امارت مکتب‌لرنی بوتون اوقووچیلر یوزی گه آچیب، باله‌لر و یاش ییگیت‌لر اوچون تینچ تعلیمی محیط یره‌تیشی کیره‌ک.
بیرلشگن ملت‌لر تشکیلاتی خوفسیزلیک کینگش اعضالری نینگ ایتیشلریچه، اوشبو هفته ایچیده افغانستان بویلب بیر میلیون‌دن آرتیق قیز اوقووچیلری اوی‌لریده ییغله‌دیلر و امنیت کینگشی اولرنی امیدسیز قیله آلمه‌یدی. اولر نینگ کوپه‌یتیریشیچه، مذکور تشکیلات و دنیا همجمعیت، افغانستان فقرالری اینیقسه باله‌لرنی قوللب قوتلش اوچون تیار دیر.
ناروی نینگ بیرلشگن ملت‌لر تشکیلاتیده‌گی دایمی نماینده‌لیگی، اوتگن کونی ایرته‌لب توییتری‌ده یازیشیچه، اوشبو تشکیلات خوفسیزلیک کینگشی، افغانستان‌ده آلتینچی صنف‌دن یوقاری قیز اوقووچیلری مکتب باره‌آلمسلیک باره‌سیده بحث ایتیشی ممکن. بیرلشگن ملت‌لر تشکیلاتی خوفسیزلیک کینگشی نینگ ییغینی اوتگن کونی توش‌دن کیین اوتکزیلدی.
بیزلرنینگ توییترده هم تعقیب قیلینگ!
قیزلر نینگ مکتب‌لری آی‌لر تعطیل‌دن کیین، چهارشنبه کونی، اوچ حمل مملکت بویلب آچیلیشی کوتیلر ایدی، لیکن معارف وزیرلیگی، اوشه کونده، قیزلر نینگ اورته و لیسه مکتب‌لری کیینگی امرگچه یاپیق قالیشینی اعلام قیلدی.
قیزلر نینگ مکتب‌لری یاپیق قالیشی ملی و خلق‌ارا ایریم عکس‌العمل‌لر گه سبب بولدی، آمریکا قوشمه ایالت‌لری، اسلامی امارت نینگ اوشبو قراری گه مناسبت بیلدیریب، اسلامی امارت رسمی‌لری بیلن ریجه‌لنتیریلگن ییغین‌لر قرارینی لغو قیلگن.
