زابل ایکینچیلیک ریاستی مسئوللری نینگ ایتیشلریچه، حاضر ایسه اوشبو ولایت‌ده تاووق ییتیشتیره‌دیگن ۵۰ فارم نینگ فعالیتی بار و شونینگدیک هر فارم ۴۰ کون‌ده اورته شکلده، ۶ مینگ تاووق ییتیشتیره‌دی.
زابل ایکینچیلیک باشلیغی عطاءالله راشد نینگ ایتیشیچه، مذکور ولایت‌ده ییتیشتیریله‌دیگن تاووق‌لر، ساتیلیش اوچون باشقه ولایت‌لر گه هم یوباریله‌دی. «حاضر ایسه زابل ده تاووق ییتیشتیره‌دیگن ۵۰ فارم بار، اورته شکلده ۴۰ کون‌ده ۶ مینگ تاووق ییتیشتیریله‌دی. تاووق‌لر بو ولایت‌ده هم مصرف بوله‌دی و شونینگدیک بیر قطار قوشنی ولایت‌لر گه هم یوباریله‌دی.»
شونده‌ی بیرحالده، زابل ده تاووق ییتیشتیریش فارمی کوپه‌یشی، اوشبو ولایت‌ده هر بیر کیلو تاووق گوشتی بهاسی نینگ ۱۰۰ افغانی کمه‌یشی گه سبب بولگن.
بیزلرنینگ فیسبوک صحیفه‌میزگه باش اورینگ!
زابل یشاوچیسی و اوشبو ولایت‌ده تاووق ییتیشتیریش فارمی خصوصیده بیش میلیون افغانی‌لیک سرمایه یاتقیزگن احمد‌گل نینگ ایتیشیچه، بو یول آرقه‌لی قولگه کیلتیره‌دیگن درآمد قانیقرلی دیر.
اونینگ کوپه‌یتیریشیچه: «بیر ییل بوله‌دی که تاووق ییتیشتیریش گه یوز کیلتیرگن‌مین. بیش میلیون افغانی ارزشی گه سرمایه یاتقیزدیم. بو ییرده کوپ کیشی گه ایش زمینه‌سی هم یره‌تیلدی. تاووق‌لر ییتیشتیریلیشی کوپه‌یگنی اوچون اولر نینگ قیمتی هم ارزان بولدی. کیلوسی ۲۲۰ افغانی ایدی و حاضر ۱۲۰-۱۱۵ افغانی دیر. ینه هم فارم قوریش نی ایسته‌یمن. حاضر ایسه ییتیشتیریلگن تاووق‌لریمیز پکتی، کابل، قندوز و بدخشان گه هم یوباریله‌دی.»
زابل ده تاووق ییتیشتیریش فارم‌لریدن قطاریده‌گی ایشلاوچیلر، اولر گه ایش زمینه‌سی یره‌تیلگنی‌دن خورسند‌لیک قیلیب، مذکور ولایت‌ده تاووق ییتیشتیریش فارم‌لری کوپه‌یشی نی ایسته‌گنلر.
زابل ده تاووق ییتیشتیریش فارم‌لریده‌گی ایشلاوچیلردن سردارمحمد نینگ سلام‌وطندار گه ایتیشیچه: «تاووق ییتیشتیریش فارمی‌ده ایش گه باشله‌‌گنیم‌دن اوچ آی بوله‌دی. جوده‌یم خورسند‌مین که بو یول آرقه‌لی حلال نفقه قولگه کیلتیره‌من. بوندن آلدین ایش‌سیز ایدیم، بیراق حاضر ایسه ایشیم بار.»
بیزلرنینگ «ایکس» ترماغی ده هم تعقیب قیلینگ!
شونینگدیک اوشبو ولایت‌ده‌گی تاووق ییتیشتیریش فارم‌لریده‌گی ایشلاوچیلردن قاسم نینگ ایتیشیچه: «زابل نینگ هوا‌سی تاووق ییتیشتیریش اوچون مناسب دیر. بو رقم فارم‌لر نینگ کوپه‌یتیریلیشی نی ایسته‌یمیز، چونکه کوپینچه فایده‌لی دیر.»
سونگی ییل‌لر باشقه مملکت‌لردن تاووق گوشتی کیلتیریلیشی تقیق‌لنگنی‌دن کیین، افغانستان نینگ بیر قطار ولایتلری جمله‌دن زابل ده تاووق ییتیشتیریش فارم‌لری کوپه‌یب و ایچکی مصرف اوچون تاووق گوشتی تأمین‌لنیشی یانیده، شونینگدیک یومورتقه هم تولید بوله‌دی.
