جوزجانده سپورتچی عیاللر کمیته‌سی مسوول‌لری و سپورتچی‌لرنینگ ایتیش‌لریچه، سپورتچی عیاللرگه قرشی خیابانی اذیت‌لر و حکومت تامانیدن چیکلاو تعیین قیلینگنی سبب، سپورتچی عیاللرنینگ رقمی کمه‌یگن.
اولرنینگ ایتیش‌لریچه، لیگ برتر بیلشوویده ساخته بیر تیم نینگ یوباریلیشی و ایکی تامانلمه حرکت‌لر فوتبالیست عیاللرنی نامید قیلگن و سپورت میدانی‌گه حضور تاپمه‌یدیلر.
جوزجان ولایتیده سپورتچی عیاللردن بیری روشنا نینگ ایتیشیچه، قیین‌چیلیکلر کوپ دیر، بیراق سپورت‌گه علاقمند بولگنی سبب، شوق بیلن فوتبال‌گه دوام بیره‌دی.
خانم روشنا نینگ کوپه‌یتیریشیچه، مناسب مکان و سپورتی لوازم یوق‌لیگی و شونینگدیک، خیابانی اذیت و المپیک تامانیدن چیکلاو تعیین قیلینگنینی فوتبالیست عیاللرگه قرشی باشقه قیین‌چیلیکلردن دیر.
سپورتچی عیاللردن باشقه بیری نرگس، سپورتچی عیاللرگه قرشی قیین‌چیلیکلرنی تصدیق‌لیدی، بیراق دولت دن عیاللرگه سپورت قیلیش زمینه‌سینی یره‌تیشی‌نی سوره‌یدی.
عین‌حالده، جوزجان ولایتی بوییچه سپورتچی عیاللر کمیته‌سی مسوول‌لری نینگ ایتیش‌لریچه، سنتی توسیق‌لر، ناتینچلیک، تهدید، عایله‌لر تامانیدن بولگن فشارلر و دولت تامانیدن چیکلاو یره‌تیلگنی سبب، سپورتچی‌لرنینگ حضوری کمه‌یگن.
اولرنینگ ایتیش‌لریچه، ۱۳۹۸- ییلده ۵۸ عیال فوتبال قیله‌ریدی، لیکن حاضرده اوشبو رقم ۲۰ کیشی‌گه کمه‌یگن.
جوزجان ولایتی بوییچه سپورتچی عیاللر کمیته‌سی مسوولی زولیا صمیمی نینگ ایتیشیچه، دولت نینگ دقت‌سیزلیگی، اجتماعی و سنتی موانع‌لر سبب، سپورتچی عیاللرنینگ رقمی کمه‌یگن.
جوزجانده سپورتچی عیاللر کمیته‌سی مسوولی نینگ ایتیشیچه، حمایت قیلیووچی نهادلر بوتوغریده اقدام قیلمه‌گن صورتده، قالگن عیاللرنی هم سپورت‌نی ترک قیلیش‌لری ممکن.
