توغیلیش و تحصیلات
محمد عالم کوهکن هجری قویاش ۱۳۴۱-ییل فاریاب ولایتی خواجه سبزپوش اولسواللیگیده دنیا گه کیلگن. باشلنغیچ تعلیماتینی اوشبو اولسواللیکنینگ دهنو مکتبیده باشلهدی و اورته تعلیماتینی فاریاب ولایتی ابوعبید جوزجانی لیسهسیده بیتّیردی. ۱۳۶۲- ییلی فاریاب دارالمعلمین اۉقو درگاهینی و ۱۳۹۵-ییلی کابلده گوهرشاد بیلیم یورتی حقوق فاکولتهسینی بیتّیرگن.
او ۱۳۶۳-ییلدن باشلب فاریاب گزیتهسی فعالیتیده مسئول صفتیده یېتکرمه ساحهسیده کیردی و شو بیلن بیرگه فاریاب ژورنالیستلر اویوشمهسی باشلیغی یېتیب تعیینلندی. او ۱۳۶۶-۱۳۷۲-ییللر مابینیده کابل هوا قونالغهسیده عسکر صفتیده خذمت قیلدی. کېینچهلیک فاریاب مدنیت و اخبارات ریاستی لوازمیده ایشلهگن. ۱۳۷۸-ییلده بلخ ولایتی اخبارات و مدنیت ریاستی رئیسی بولدی و شو بیلن بیرگه امیر علیشیر نوایی اویوشمهسی نشراتی بولگن «چاووش کوندهلیگی» اورین باسری وظیفهسینی بجرردی.
ژورنالیستیک فعالیتی
محمدعالم کوهکن عمرینینگ کوپ قسمینی یېتکرمهلرده ایشلش بیلن اوتکزگن و اۉزبېک ادبی تیلیده خبر و گزارش یازیش بولیمیده کوپینچه کیشیلرنی تربیهلهگن.
اونینگ یېتکرمهلر واسطهلریدهگی مسئولیتلری، آزادلیک رادیوسیده خبرنگارلیک قیلیش، آئینه رادیو-تلویزیونینینگ کابلدهگی ادارهسینی باشقریش، آریانا رادیو-تلویزیونینینگ اۉزبېک بولیمی دیپارتمنتی رئیسی بولیش، آی و بیرلیک تلویزیونلرینینگ نشرات ایشلرینی باشقریشنی اۉز ایچیگه آلهدی. شو بیلن بیرگه، محمدعالم کوهکن افغانستان قلم انجمنی و توران اجتماعی و مدنی جغرمه اعضاسی ایدی.
فرهنگی و ادبی فعالیت
او اوز آنه تیلیده نظم و نثرده اثرلر ایجاد ایتگن، کوپ ییللر دوامیده ژورنالیستیک فعالیت آلیب بارگن مدنیت اربابی سنهلهی. کوهکن « اۉزبېک ادبیاتی و مدنیتی»، «سین اوچون یرهلدیم»، «قلدیرغاچ» و «قاره کوزلریم» شعرلر توپلمی کتابلرنینگ مولفی دیر. اونینگ تحلیلی، اجتماعی و فرهنگی مقالهلری تورلی نشریاتلرده نشر قیلینگن. خالد حسینینینگ «مناجات دریا» و نصیراحمد احمدینینگ «نگین غزنی» اونینگ اوگیرگن اثرلریدن عبارت. اونینگ چاپ گه تیار اثرلری آرهسیده ایکینچی شعری توپلم «بابر و بابریزادهلر» و سلطان حسین بایقرانینگ سیاسی و ادبی حیاتی» دیر. شونینگدیک او باشقه اثرلرنینگ نشر قیلیشده رول اوینهگن جملهدن مرحوم حامد فاریابی شعری توپلمی، «اوتگن کونلر» و «یولدوزلی تومنلر» رمانلری و امیر علیشیر نوایی غزللری توپلمی.
محمدعالم کوهکن، سمپوزیملر، ادبی مجلسلر، علمی و ادبی شخصلرنی یادلش تدبیرلرینی تشکیل ایتیشده فعال رول اوینهگن. او کابل، میمنه، اندخوی و شبرغان شهرلریده بیرینچی اۉزبېک کتابی کورگزمهلرینی اوتکزدی و «توران» جمغرمهسیده اۉزبېک تیلی کورسینی تشکیل قیلدی.
شونینگدیک او، دولت تامانیدن «میر مسجدیخان»، قیرغیزستان شاعر-یازووچیلر جماعت اویوشمهسی طرفیدن «چنگیز ایتماتوف» کۉکرهک مدالی بیلن اعزازلنگن.
وفات
محمدعالم کوهکن هجری قویاش ۱۴۰۰ییلده افغانستان جمهوریت تیزیمی قولب و اسلام امیرلیگی حاکمیت نی آلگنیدن سۉنگ امریکا قۉشمه ایالتلری گه مهاجر بولدی. او اوشه ییرده سرطان کسللیگی بیلن بیر مدت کورهشگچ و نهایت ۱۴۰۴-ییل، ۱۲-سنبله، چهارشنبه کونی ۶۳ یاشیده امریکاده عالمدن اوتدی.
کوهکن وفاتی بیلن، افغانستان مدنیت عایلهسینی قیغود گه چومدیرگن. اونینگ اولیمی افغانستان اهالیسی اینیقسه اۉزبېک خلقی شاعرلری، یازووچیلری، ژورنالیستلر و مدنیت سیورلرینینگ کېنگ کولملی مناسبتی بیلن روپهره بولیب اونینگ اولیمینی کتّه ضایعه دیب اتهگنلر.
