اسلام امیرلیگی امر معروف و نهی منکر قانونی تصدیقلنیشی، ایچکی و خلقارا کېنگ کولمده مناسبتلر بیلن روپهره بولگن. بیرلشگن ملتلر تشکیلاتی نینگ افغانستاندهگی نمایندهلیگی (یوناما) بوگون (۴-سنبله، یکشنبه) بیر بیانیه ترقهتیب، بو قانون اسلام امیرلیگی بیلن دنیا همجمعیت نینگ همکارلیگینی قیینچیلیک بیلن دوچ قیلیشیدن آگاهلنتیرگن.
یوناما، اسلام امیرلیگیدن اوشبو قانون نینگ مادهلری و عملگه آشیریش پلانلری حقیده ایضاح کېریتیشینی اېستهگن. اوشبو بیانیه نینگ بیر بولیمیده کېلیشیچه: «خلقارا همجمعیت یخشی نیت اساسیده حاکم رسمیلر بیلن همکارلیک قیلیشنی اېستهیدی. دنیا افغانستان نینگ صلح و تینچلیک تامان یونهلیش طرفداری دیر، بو ییرده افغانلر نینگ حقوقی رعایت بولیب و اولر گه حصه بیریلسه. افغانستان خلقی نینگ کوپینچه حقینی چېکلش و اولر گه حرمتسیزلیک بو غایه گه اېریشیشنی قیینلشتیرهدی.»
کابل ده جاپان ایلچیخانهسی، ایکس صحیفهسیده امر معروف و نهی منکر قانونی تصدیقلنیشی گه مناسبت بیلدیریب، اسلام امیرلیگیدن عیاللر نینگ آوازی گه حرمت قیلیشینی سۉرهگن.
بیزلرنینگ فیسبوک صحیفهمیزگه باش اورینگ!
کانادا، بلژیک، جرمنی، بیرلشگن ملتلر تشکیلاتی، خاتین قیزلر ایشلری بوییچه امریکا وکیلی، بیرلشگن ملتلر تشکیلاتی نینگ خاتین قیزلر گه قرشی کورهش زورهوانلیک ایشلری بوییچه گزارشگری علیحده شکلده اوشبو قانون تصدیقلنیشی گه مناسبت بیلدیرگنلر.
شو بیلن بیرگه، مملکتدهگی خاتین قیزلردن بیرقطاری نینگ ایتیشلریچه، امر معروف و نهی منکر قانونی تصدیقلنیشی بیلن، اولر کېلهجکلری گه نسبتن امیدسیز بولیشگن.
اوقیتووچی حمیرا نبیزاده نینگ سلاموطندار گه ایتیشیچه، بو قانون عملگه آشیریلگن حالده عیاللر نینگ اساسی حقوقی چېکلنهدی. اونینگ کوپهیتیریشیچه: «بو چېکلاولر بیکار قیلینیب و بیز گه آزادلیک بیریلیشینی اېستهیمیز. چونکه اوقیشدن محروم بولگن من، وظیفه باره آلمهی من. افغانستان دولتیدن قیزلر گه اوقیش و تحصیل قیلیش زمینهسینی یرهتیشنی اېستهیمیز.»
بیزلرنینگ «ایکس» ترماغی ده هم تعقیب قیلینگ!
شونینگدیک، پایتخت کابل شهریده خصوصی تلویزیونلردن بیری نینگ مخبری زلیخا احمدی و سوداگر نرگس سجادی، امر معروف و نهی منکر قانونی مادهلری حقیده ایضاح کېریتیلمسلیک عیاللر نینگ ایشینی قیینچیلیک بیلن دوچ قیلیشینی اېتهدیلر.
زلیخا احمدی گه کوره: «خاتین قیزلر گه دایر اسلام امیرلیگی نینگ ینگی قانونی تصدیقلنیشی، عیال ژورنالیستلری نینگ جدی خواطری گه سبب بولگن. اسلام امیرلیگی اینیقسه اسلام امیرلیگی لیدری دن افغانستاندهگی خاتین قیزلر نینگ آوازی گه توسیق بولمسلیگینی اېستهیمیز.»
سوداگر نرگس سجادی نینگ ایتیشیچه: «زحمت چیکیب و ایشلهشیمیز کېرهک. اوقیش یوق. بولر عیاللر نینگ آوازی عورت و آوازلری چیقمهسین دیېدی، جوده هم پریشانمیز. چونکه شو ایش بار بو هم بیزدن آلینسه باشقه نیمه قیلیش کېرهک.»
امر معروف و نهی منکر وزیرلیگی بو قانون گه دایر حاضرگه قدر یوناما اېستهگی و بیرقطار مملکت همده ایلچیخانهلر نینگ خواطری گه مناسبت بیلدیرمهگن بولسه ده؛ بیراق اوشبو وزیرلیک رسمیلری بوندن آلدین امر معروف و نهی منکر قانونی بوتون مادهلری عملگه آشیریلیشینی معلوم قیلگنلر.
بیراق اسلام امیرلیگی سۉزلاوچیسی اورین باسری حمدالله فطرت گه کوره، بو قانون اسلام قاعدهلری اساسیده تیارلنیب و تصدیقلنگن و نا اسلامی اولکهلردن اوشبو قانون گه حرمت قیلیشلرینی اېستهگن.
اونینگ کوپهیتیریشیچه: «بو قانون بوتون عالملر نینگ فکر-ملاحظهسی اساسیده تیارلنگن بو قانون گه قرشی کیشیلر در حقیقت ایشانچلی فقه مرجعلری بیلن قرشیلیک قیلهدی. بیر مسلمان دلیلسیز اوشبو قانون نی تنقید قیلمسلیگی کېرهک. شونینگدیک مسلمان بولمهگن کیشیلر اسلام قاعدهلری گه حرمت قیلیشی درکار.»
امر معروف و نهی منکر قانونی کېریش، تورت فصل و ۳۵ ماده دن عبارت دیر. بو قانون نینگ سکیز بندلیک ۱۳-مادهسی عیاللر نینگ حجابی حکملری گه اختصاص بیریلگن. اوشبو قانون ده عیاللر نینگ آوازی و یوزی عورت دیېلگن.
