افغانستانده بیرلشگن ملتلر تشکیلاتی نمایندهلیگی (یوناما)، افغانستان اوروشدن قالگن بمبلر و پارتلاوچی مادهلر طفیلی اولیم درجهسی بوییچه دنیاده اوچینچی اورینده تورگنی حقیده آگاهلنتیردی.
یوناما، بوگون (۱۵ حمل/۴ اپریل، شنبه) ماینلر خطرلری حقیده خلقارا خبردارلیک کونی مناسبتی بیلن، افغانستانده آیی گه قریب ۵۰ کیشی ماینلر و باشقه پارتلاوچی مادهلر پارتلشی طفیلی اوز جانلرینی قولدن بیرهدی – اولرنینگ قریب ۸۰ فایزینی بالهلر تشکیل بیریشینی ایتگن.
اوشبو تشکیلات گه کوره، افغانستاندهگی پارتلش حادثهلرنینگ دییرلی ۹۰ فایزی پارتلمهگن اوق-دارولر یا کی اوروشدن قالگن پارتلاوچی مادهلر طفیلی یوز بیرهدی.
بیرلشگن ملتلر تشکیلاتی نمایندهلیگینینگ تأکیدلشیچه، ماین بیلن افلاسلنگن حدودلرنی تازهلش اوچون مالیهوی یاردمگه تیزلیک بیلن احتیاج بار، شونده عایلهلر اوروشدن قالگن خوف-خطرسیز حیات و تیریکچیلیکلرینی قیته باشلهی آلیشهدی.
تورتینچی اپریل ( ۱۵ حمل) ماینلر خطرلری حقیده خلقارا خبردارلیک کونی صفتیده تن آلینگن؛ بو کون میلادی ۲۰۰۵ ییلده بیرلشگن ملتلر تشکیلاتی تامانیدن بیلگیلنگن بولیب، اوروشدن قالگن پارتلاوچی مادهلر خوفی حقیده جمعیتچیلیک خبردارلیگینی آشیریش و جبرلنگنلرنی قوللب-قوتلش مقصدیده تشکیل ایتیلگن. اوشبو کون ماین تازهلش ضرورلیگینی اینیقسه اوروشدن ضرر کورگن مملکتلرده همده تینچ اهالینینگ هلاک بولیشینی کمهیتیریش بوییچه سعی-حرکتلرنی دوام ایتتیریشنی تأکیدلهیدی.
