فاریاب مرکزی میمنه شهریده کیچیک تجارتلر و قول صناعتی بولیملریده یوزلب عیالنینگ تعلیم کورگنی بیرحالده، بازار کسادلیگی، ساتیب آلیش امکانیتی کملیگی و سرمایه آزلیگی، بو شهردهگی عیاللرگه مخصوص بازارده عیاللر فعالیتینی جدی قیینچیلیکلر بیلن روپهره قیلگن؛ بو ایسه اولرنینگ اقتصادی مستقللیگینی دوام ایتیریش مسئلهسینی ناانیق حالت گه کیلتیرماقده.
ییتی ییلدن بیری میمنه شهریدهگی عیاللرگه مخصوص بازارده تیکووچیلیک و بزازلیک بولیمیده فعالیت قیلهدیگن دکاندارلردن بیری زینب، ساتیش کمهیگنی و نسیه معاملهلر کوپهیگنیدن شکایت قیلهدی. اونینگ ایتیشیچه: «بیش ته شاگردیم بار؛ بیراق اونچهلیک ساتیشیمیز یوق. ساتیش بولگنیده هم یریمی نقد و یریمی ایسه نسیه دیر. بیزلر تیکیب تیارلب قویهمیز؛ لیکن مشتریلرنینگ اونچهلیک امکانیتی یوق.»
اونگه کوره، عیاللردن قطاری یالغیز تکه خرهجتینینگ بیر بولیمینی توللب و قالگنینی ایسه قرض آلهدیلر. شونینگدیک بو بازاردهگی تیکووچیلردن باشقه بیری سلمانینگ ایتیشیچه، عایله خرهجتینی تاپیش اوچون ایشینی آز بودجه بیلن باشلهگن؛ لیکن بازار یوقلیگی سبب، اونچهلیک درآمدی یوق. «ساتیش یوق، اهالی بودجهسی آز دیر. اوزیمنینگ عایلهمده نیچه کیشی ایشسیز. عایلهم خرهجتینی تامینلب و اهالیگه خذمت قیلیش اوچون تیکووچیلیککه باشلهدیم. مناسب بازار و ییترلی ساتیش یوقلیگی، بیزلرنینگ بویوک قیینچیلیکلریمیزدن دیر.»
مهرهدوزلیک بولیمیده ایشلهیدیگن یاش قیزلردن مدیدا، بویورتمهلرنینگ سیزیلرلی درجهده کمهیگنینی بیان قیلیب و ایتیشیچه: «بیر وقتلر مشتریلر سانی کوپ ایدی، توی کییملرینی تیکهر ایدیک. حاضر نه ایش بار و نه تجارت. تکه، مهره و وسیلهلر قیمت دیر؛ لیکن کییم قیمتی آز دییشهدیلر که اوشه زحمتیمیز و خرهجتیمیزنی چیقرمهیدی. حمایت بولیب و کوپراق ایش امکانیتلری یرهتیلیشینی ایستهیمن.»
شوندهی بیرحالده، میمنهنینگ ترقیات و تجارت مرکزی مدیری نصیبه حسام، بو مرکزده صناعتچی اونلب عیالنینگ فعالیت قیلیشیدن خبر بیرهدی. اونگه کوره، مذکور مرکزی تمویل قیلووچی نهادلرنینگ حمایتی بیلن آچیلیب و حاضر ایسه تولیدی تورت بولیمده فعال دیر. «حاضر ۳۰۰ عیال ایش اورگهنیش بیلن شغللنگن که اولردن ۱۹۵ تهشی شاگرد. فعال ایشخانهلریمیز حجاب و پردهدوزلیک، گلاباتون و آیینهدوزلیک، مهرهدوزلیک، تیکووچیلیک، گلدوزلیک همده کیک و کلچه پیشریش و مربا و ترشی کبی آوقتلرنی پروسس قیلیشدن عبارت دیر. سرمایه آزلیگی، زمانهوی ماشینلر یوقلیگی و تخصصی تعلیملرگه نیاز بارلیگی، عیاللرنینگ اساسی قیینچیلیکلریدن دیر.»
شونینگدیک فاریاب سودا و صناعت ریاستینینگ مالی و اداری ایشلری بوییچه عمومی مدیری نورمحمد میرزایی گه کوره، بو بازار آچیلگنیدن قریب اوچ ییل بولیب و میمنه شهریده ۷۰۰ دن آرتیق عیال، صناعت و تجارت بولیمیده مسلکی ایشلرنی اورگتگنلر.
اونینگ کوپهیتیریشیچه: «۷۰۰ دن آرتیق عیال ایش اورگنیب و ایشلریگه باشلهگنلر. اوشبو ریاست ییلده کورگزمهلرنی اوتکزیش بیلن، عیاللرگه غرفه بیرهدی و حتا محصوللری ساتیلیشی اوچون اولردن قطارینی کابل گه یوبارگنلر.» اونینگ اورغولشیچه، بو ایشدن مقصد انه شوو بازار یولی آرقهلی عیاللرنینگ خودکفال بولیشی همده ولایت ایچی و تشقیده ساتیش بازاری کوچهیشی دیر.
باشقه بیر تاماندن، اقتصادی مسئلهلر بیلرمانلریدن قطاری، تولید و ساتیشده عیاللر حضورینی عایلهلر وضعیتی یخشیلنیشیده مهم عامل بیلهدیلر. سودا و صناعت بوییچه ایش بیلرمان حبیبه مروت، تعلیم، مالی منبعلردن فایدهلنیش، مناسب بازارلر یرهتیلیشی و حکومت آرقهلی حمایتی سیاستلر تنظیملنیشی گه تاکیدلب و ایتیشیچه: «اقتصادده عیاللرنینگ فعال حضوری نهفقط عایلهلر درآمدی آشیشیگه سبب بولهدی؛ بلکیم اولرنینگ مالی مستقللیگی و مهارتلری آشیشینی هم مستحکملنتیرهدی.»
فاریاب ده یوزلب عیال کیچیک تجارتلر و قول صناعتی بولیمیده فعال بولگنلری بیلن، لیکن اولرنینگ فعالیتی دوامی برقرار بازارلر یرهتیلیشی، مالی آسایشتهلیک و دولتی همده خصوصی نهادلرنینگ عملی حمایتیگه تیگیشلی دیر که بو حمایت، اولرنینگ بازار کسادلیگیدن خودکفالیک همده محلی و ملی اقتصادده فایدهلی حصه قوشیش تامان آلیب بارهدی.
