بوگون (چهارشنبه ۱- ثور) مملکت غرب زونیده‌گی اوروش قربانی‌لریدن قطاری هرات ده خبری بیر ییغین اوتکزیب، اوروش تامان‌لریدن عایله‌لر و داغ کورگن آنه‌لر اوچون اوروش و قان توکیش دن قول تارتیب و تینچلیک قیلیش‌لرینی سوره‌شگن.
اولر هرات، فراه، غور، بادغیس، هلمند و نیمروز ولایت‌لریدن هرات شهریده توپله‌نیب ایتیش‌لریچه، اهالی گه باشقه کوچی قالمه‌گن و اوروش تامان‌لری خدا اوچون تینچلیک قیلیش‌لری کیره‌ک. غرب زونیده جان‌بازان نهاد باشلیغی سلطان‌احمد صابر مذکور ییغینده، تینچلیک پروسه‌سیده اوروش تامان‌لری نینگ برخوردی دن تنقید قیلیب و ایتیشیچه، اوروش تامان‌لری نینگ صف تارتیشی، واقعی تینچلیککه ماس کیلمه‌یدی.
جناب صابر نینگ کوپه‌یتیریشیچه، ناگرانلر و قربانیلر عایله‌لری مملکتده ضرر کوره‌دیگن طبقه دیر که اولر ناگرانلر و اوروش قربانیلری نینگ رقمی کوپه‌یشی نی ایستمه‌یدی. او اوروش تامان‌لریدن اوروش نی توخته‌تیش‌لرینی سوره‌گن.
هرات ده قربانیلر کمیته باشلیغی و اوروش باعث ایکی قولی نی قولدن بیرگن ناگران‌لردن بیری محمدقاسم تکاور، اوروش تامان‌لریدن بوندن آرتیق عایله‌لرگه درد و داغ بیرمه‌سلیگی نی سوره‌گن. اونینگ کوپه‌یتیریشیچه، افغانستان ده اوروش ناگرانلری نینگ رقمی کوپ یوقاری کیتگن که باشقه هیچ بیر مملکتده بو رقم موجود ایمس ایکن.
مذکور ییغین گه قتنشگن ناگران‌لردن باشقه بیری عبدالغنی نینگ ایتیشیچه، اوروش‌لرده هر نیرسه دن کوپ اهالی و تینچ‌اهالی ضرر کوره‌دی. شونینگدیک او هم اوروش تامان‌لریدن اوروش نی توخته‌تیب و اوروش ناگرانلری و قربانیلری نینگ سانی نی کوپه‌یتیرمسلیک‌لرینی سوره‌گن.
عین حالده، اوشبو اوروش قربانیلری دولت دن تینچلیک سوزلشوولری گه اولرگه هم سهم بیریلیشی نی سوره‌گن.
