امریکا-اسرائیل-ایران اوروشی تیز آرهده توگهشی ممکن. ترامپ اوروشنی توختهتیشنی ایستهیپتی، ایران ایسه اوروشنی امریکانی خواهشیگه کوره ایمس، بلکی ایران دولتینینگ اختیاریگه کوره توگهتیلیشینی معلوم قیلدی. شونینگدیک، اوچله دولتنینگ اوروشدن کورگن تلفاتلری، امریکا جمهور باشلیغینینگ نیمهدن قورقوگه توشگنی حقیده یقین دقیقهلر ایچیده بهتفصیل تنیشیب چیقیشینگیز ممکن.
امریکا اوروشنی توگهتیشنی ایستهیپتی
امریکا جمهور باشلیغی دونالد ترامپ ایران گه قرشی اوروش ریجهلشتیریلگن مدتدن تیزراق کیچهیاتگنی و دییرلی یکونلنیش عرفهسیده ایکنینی بیلدیردی. بو حقده او «سیبیاس» ییتکرمهسیگه بیرگن انترویوسیده سوز آچدی. جمهور باشلیغنینگ سوزلریگه کوره، حربی حرکتلر ریجهلشتیریلگن وقتدن انچه آلدینگه اوتیب کیتگن. ایراننینگ نه علاقهسی، نه حربی-هوا کوچلری قالگن، راکتهلر ایسه جوده کم مقدارده.
شونینگدیک، ترامپ فلوریدا ایالتیده هم جمهوریخواهلر حزبی تدبیریده چیقیش قیلیب، ایران گه قرشی اوروشده غلبه یقین ایکنینی ینه بیر بار تأکیدلهدی. اونینگ ایتیشیچه، اوروش «جوده تیز آرهده توگهیدی». او بو حرکتنی «قیسقه مدتلی عملیات» دیب اتهب، اونی یاووزلیکدن خلاص بولیش اوچون عملگه آشیریلگنینی بیلدیردی.
تحلیلچیلر، امریکانینگ اوروشنی توگهتیشگه شیلنیب قالگنینی، «بویوک امریکا»نینگ نامکمل ریجهسی ایش بیرمهگنی بیلن بهالماقده. دنیا بازاریده نفتنینگ نرخی کیسکین آشیب کیتگنی هم امریکانی بیر آز خواطر گه سالگن بولیشی ممکن. چونکی نفت قیمتلشسه، ترانسپورت، لوجستیک همده توارلر نرخلری آشهدی. شو طفیلی مملکتده اقتصادی اوسیش سیکینلشیشی ممکن.
بو ایسه اهالینینگ ناراضیلیگیگه، حتا ترامپ گه نسبتن استیضاح اعلان قیلینیشی هم ممکن. دونالد ترامپ امریکا تاریخیده ایکی مرته استیضاح قیلینگن بیرینچی جمهور باشلیغ حسابلنهدی. بیراق سنا اونی لوازمیدن چیتلتمهگن. اگر اوچینچی بار بو چاره قوللنسه، ترامپ لوازمیدن چیتلهتیلیشی ممکن. شو حسابدن ترامپ بو اوروشنی تیزراق یکونلش پاییگه توشیب قالدی.
شو سببلی، امریکا اسرائیلدن ایراننینگ انرژی اینیقسه نفت آست قوریلمهلریگه ضربه بیریشنی توختهتیشنی سورهدی. اوشبو ۱۳ کونلیک اوروش دوریده یشینهیاتگن تامانیدن بیرینچی چیکینیش بولدی. منبعلر گه کوره، ترامپ ایران نفت آست قورمهلریگه ضربه بیریشنی آخرگی چاره صفتیده کورماقده. بو ورینت فقط ایران اول خلیج فارس دولتلریدهگی نفت آست قورمهسیگه هجوم قیلگن تقدیرده قوللنیشی ممکن.
امریکا ایراننی و اونینگ «قاره بایلیکلرینی» خوددی ونزویلا کبی آسان قولگه کیریتهمیز دیب اویلهگندی. اولرنینگ ریجهسیگه کوره، عالی رهنما یوق قیلینگن تقدیرده، اولدن جنوری آییدهگی نمایشلر آرقهلی «آنگی سوودن زهرلنگن» ایرانلیکلردن فایدهلنیب، اسلام رژیمی گه برهم بیریش و اونینگ اورنیگه «قوغیرچاق» صفتیده تلقین قیلینهیاتگن رضا پهلوینی حاکمیت گه آلیب کیلیش ریجهلشتیریلگندی. بیراق آیتالله سیدعلی خامنهاینینگ اولیمی بوتون ایراننی پرچهلمهدی، عکسینچه بیر کوچ قیلیب ینه بیرلشتیردی. امریکا و اسرائیل ایسه ایرانلیکلرنینگ غضب و نفرتیگه اوچرهدی. بوندن کورینیب توریبدی کی، وضعیت کوتیلگندیک ایش بیرمهدی.
ایران نفت تنقیصلیگینی یوزه گه کیلتیردی
معلوم کی، هورمز بوغوزی مهم نفت تشیش یولَگی حسابلنهدی. ایران بو بوغوزنی یاپیب قویدی، عاقبتده نفت نرخی آسمانگه چیقدی. حتا، بیر بریل (بشکه) نفت ۱۲۰ دالر گچه کوتریلدی. بو ایسه اروپا و باشقه دولتلرده امریکا و اسرائیل گه نسبتن ناراضیلیک کیفیتینی اویغاتدی. بو حالتنی کورگن همده یقین شرقده حکمرانلیکنی قولگه آلالمهیاتگن امریکا جمهور باشلیغی دونالد ترامپ اگر ایران «هورمز بوغوزی» آرقهلی نفت تشیشنی توسیشده دوام ایتسه، مملکت گه نسبتن ینهده کوچلی ضربهلر بیریلیشینی بیلدیردی. اونینگ سوزلریگه کوره، اگر ایران هورمز بوغوزیده نفت آقیمینی توسیشگه قرهتیلگن هر قندهی حرکتنی عملگه آشیرسه، امریکا ایران گه حاضرگچه بیریلگن ضربهلردن ۲۰ برابر کوچلیراق ضربه بیرهدی.
ترامپ شونینگدیک، امریکا آسان یوق قیلینهدیگن آست قورمهلرنینگ هم یوق قیلیشینی، بو ایسه، ایراننینگ دولت صفتیده تیکلنیشینی دییرلی امکانسیز قیلیب قوییشینی ایتدی. او «اولیم، آلاو و غضب» ایران اوستیگه توشیشینی ایتدی. بیراق، بوندهی حالت یوز بیرمسلیگیگه امید قیلیشینی هم قوشیمچه قیلیب اوتدی. امریکا جمهور باشلیغینینگ ایتیشیچه، اونینگ بو بیاناتی چین و هورمز بوغوزیدن فعال فایدهلنهدیگن باشقه دولتلر اوچون «امریکادن ساوغه» حسابلنهدی.
اوز نوبتیده ایران اسلام انقلابی قوریقچیلری وکیلی جنرال سردار نائینی امریکا و اونینگ اتفاقچیلریگه منطقهدن بیر لیتر هم نفت آلیب چیقیشگه یول یول قویمسلیگینی بیلدیردی. اونینگ سوزلریگه کوره، نفت و گاز نرخلرینی پسهیتیریش همده اولرنی نظارت قیلیشگه قرهتیلگن برچه اورینیشلر وقتینچهلیک و ثمرهسیز بولهدی. نائینی شونینگدیک، جنگ میدانیده تشبث ایران قولیده ایکنینی و اوروش قچان توگهشینی امریکا ایمس، بلکی تهراننینگ اوزی حل قیلیشینی تأکیدلهدی. او امریکانینگ خلیج فارس دهگی حربی آست قوریلمهسینینگ کتته قسمی یوق قیلینگنینی، جملهدن منطقهدهگی دییرلی اونته زمانهوی رادار تیزیمی همده قیمت درانلر ایران هوا مدافعهسی تامانیدن یوق قیلینگنینی معلوم قیلدی.
اوروش آق اوی گه قیمت گه توشدی
واشنگتن بو عملیات دهگی اساسی حربی کوچلردن بیری. امریکا و اسرائیل هوا کوچلری ایراننینگ حربی آست قوریلمهسی، راکته کمپنیهلری و استراتیژیک هدفلریگه کیتمه-کیت ضربهلر بیردی. بیر قرهشده امریکا اردوسی اوچون یوقاتیشلر کتته ایمسدیک کورینهدی. دستلبکی معلوماتلر گه کوره، کمیده ۸ نفر امریکالیک حربی هلاک بولدی. بیراق، ایران بو ضربهلرنی جوابسیز قالدیرمهدی. تهران منطقهدهگی امریکا حربی پایگاهلریگه راکتهلر یوللـهدی. قطر، بحرین، کویت، سعودی عربستان و بیرلشگن عرب امیرلیگی دهگی پایگاهلر هجوم نشانیگه ایلندی.
آق اوی بو ضربهلر کتته ضرر کیلتیرگنینی ایتماقده. اما، فکتلر باشقه نرسهنی کورستماقده. ۷ مارچ کونی «نیویارک تایمز» نشرینینگ خبر بیریشیچه، ایران گه قرشی حربی عملیاتنینگ بیرینچی هفتهسی امریکا گه تخمیناً ۶ میلیارد دالر گه توشگن. بو حلی اوروشنینگ باشلنیشی، خلاص. شو بیلن بیرگه، جمهوریتچیلر حزبی وکیللری جمهور باشلیغ دونالد ترامپ معموریتی اوروش اوچون قوشیمچه مبلغ سورهشینی کوتهیاتگنینی معلوم قیلدی. اولر ایران بیر نیچه ضربهلر گه قرهمی آمان قالیشگه، امریکا و اسرائیل ایسه تیز آرهده حربی حرکتلرنی دوام ایتتیریش گه بولگن قیزیقیشینی یوقاتیشگه ایشانماقده.
امریکالیک قوماندانلرنینگ فکریچه، یقین بیر نیچه کون ایچیده ایران بوندن کیین هم سیزیلرلی درجهده جواب راکته ضربهلرینی بیره آلهدی. بو ایسه برچه اوچون حل قیلووچی پله بولهدی. واشنگتنده ایران بو اوروشنی چوزیشدن خواطرلرینی سیزدیریب قویدی.
اوروشنی باشلب، قندهی توگهتیشنی بیلمهی قالگن امریکا و اسرائیل گه قرهته ایرانلیک ملازملر اسلام جمهوریتی اوروشنی رقیب اوچون حددن تشقری قیمت گه توشیریش استراتیژیسینی تنلگهگنینی بیلدیردی. اوشبو استراتیژیک شرطلی روشده «تیلبه» عملیاتی دیب ناملنگن. ایران بو اوروشنی تیز یکونلشنی ایمس، بلکی اونی چوزیشنی مقصد قیلماقده. بونده تهران عادی استراتیژیدن فایدهلنماقده، یعنی رقیبنی چرچاق و خرهجت بیلن یینگیش.
اسرائیلنینگ تیمیر قلقانی راکتهلرنی توسیب قالالمهدی
اسرائیل بو اوروش دهگی اینگ فعال اشتراکچیلردن بیری بولیب قالماقده. ایراننینگ کوپلب حربی اوسکونهلریگه بیریلگن ضربهلر عینن اسرائیل هوا کوچلری حصهسیگه توغری کیلهدی. بیراق، بو اوروش اسرائیل اوچون هم خوفسیز مصافهده کیچمهیپتی.
ایران یوزلب بالستیک راکتهلر و مینگگه یقین درانلر بیلن جواب بیردی. بو هجوملر بیت-شمس شهری، اورشلیم اطرافی و جنوبی اسرائیل گه قرهتیلدی. مشهور «ایران دام» تیزیمی کوپلب راکتهلرنی هواده یوق قیلدی. اما برچهسینی ایمس. اسرائیلنینگ تیمیر قلقانی هم همه راکتهلر آقیمینی توسیب قالالمهیپتی. بو ایسه بیر نرسهنی کورستهدی، اسرائیل حدودی هم ایندی اوروشدن مطلقا حمایهلنگن ایمس. اسرائیلده هجوملر عاقبتیده کمیده ۱۱ نفر تینچ اهالی هلاک بولگن. بیر نیچه حربیلر هم اولگنی ایتیلماقده.
اینگ کوپ ایرانلیکلر هلاک بولدی
بو ماجراده اینگ کتته یوقاتیشلر ایران تامانیگه توغری کیلماقده. معلوماتلر گه کوره، دستلبکی هفتهلرده ۱۲۰۰ دن آرتیق کیشی هلاک بولگن، یوزلب آدملر یرهلنگن. قربانلر آرهسیده کوپلب تینچ اهالی بار.
اینگ دهشتلی هجوملردن بیری ۲۸ فبروری کونی میناب شهریده صادر بولدی. قیزلر مکتبیگه قیلینگن ضربه نتیجهسیده یوزدن آرتیق اوقووچی قیزهلاقلر هلاک بولگندی. دونالد ترامپ، بلکی ینه بیر بار نوبلنینگ «تینچلیک مکافاتی»گه اوز نامزادینی قویر، لیکن اونینگ تاریخ دفتریده ایندی اپیستین بیلن باغلیق فایللر و هلاک بولگن مینگلب ایرانلیکلرنینگ خاتمهسی حقیده یازیلگن صحیفهلر بار.
یازووچی: کامله قابیلاوف
عرب الفبا گه اوگیروچی: نصرتالله احدی
