اپریل آیی نینگ ۱۵ ده حکومت، طالبان و بیرقطار چیت‌ایللیک مملکت‌لر نماینده‌لری نینگ حضوری بیلن افغانستان تینچلیک جریانی خصوصیده ترکیه ده بیر ییغین یولگه قوییلیشی‌گه قرار قیلینگن، لیکن قطار گزارش‌لرگه کوره، اوشبو ییغین طالبان نینگ پیشنهادی آرقه‌لی رمضان دن کیینگه قالگن.
طالبان سابق مسووللریدن بیری سیداکبر آغا نینگ سلام‌وطندارگه ایتیشیچه، مسکو ییغینیده واقعیت‌لرنی بیان قیلیش اوچون طالبان گه فرصت بیریلمه‌گن و ترکیه ییغینیده هم شونده‌ی بولیشی ممکن. اونینگ ایتیشیچه، طالبان‌گه فرصت بیریلمه‌گن صورتده، اولرنینگ باشقه ییغین‌لرده اشتراک قیلمه‌یش‌لری ممکن.
عین‌حالده، طالبان سابق اعضالریدن باشقه بیری مولوی قلم‌الدین نینگ ایتیشیچه، جاری وضعیت‌گه قره‌گنده ترکیه ییغینی نینگ کیینگه قالیشی ممکن. اونینگ ایتیشیچه، بوتون تامان‌لرده فنی قیین‌چیلیک بولگنی، ایکی تامانده اجماع یوق‌لیگی و آمریکا حربی‌لری نینگ افغانستان چیقیشی بیللی بولمه‌گنی سبب، مذکور ییغین نینگ کیینگه قالیشی ممکن.
مولوی قلم‌الدین نینگ کوپه‌یتیریشیچه، بیرلشگن ملتلر تشکیلاتی و آمریکا ایکی تامان اوستیگه فشار کیلتیرگن حالده، ترکیه ییغینی‌نی تعیین‌لنگن زمانده یولگه قوییلیشی ممکن.
بیراق، تینچلیک ایشلری بوییچه دولت وزیرلیگی سوزلاوچیسی ناجیه انوری، ترکیه ییغینی نینگ کیینگه تشله‌نیشی توغریسیده طالبان نینگ پیشنهادی خصوصیده فکر بیلدیرمه‌یدی. اونینگ ایتیشیچه، مذکور ییغینده اشتراک قیلیش اوچون حکومت تیار دیر.
عین‌حالده، سیاسی ایش بیلرمانلردن بولمیش سبحان‌الله مصباح، ترکیه ییغینی نینگ کیینگه قالیشی‌نی بی‌فایده بیلیب ایتیشیچه، تینچلیک جریانیده طالبان نینگ قراری بیرینچی دن عادلانه ایمس ایدی و اولر فشار کیلتیریش بیلن امتیاز قولگه کیریتیش‌نی ایسته‌ریدی. اونینگ کوپه‌یتیریشیچه، اهالی ییغین کیینگه قالیشی‌نی ایمس، بلکیم تینچلیک ایسته‌یدی.
بوتوغریده طالبان فکرینی آلیش اوچون سعی و حرکت قیلدیک، لیکن طالبان سیاسی دفتری سوزلاوچیسی تماس‌لریمیزگه جواب قیترمه‌دی.