مملکتده کرونا ویروسی نینگ بیرینچی و ایکینچی تولقینی اوتگنیدن کیین، حاضر اولکه‌ده ینه هم بو ویروس میزان کوپه‌یماقده.
کمیده بیر آی آلدین مملکتده کرونا ویروسی گه چلینگنلر سانی کونده ۱۰ الی ۲۰ کیشی گه ییتیشه‌دی ایدی، بیراق سونگی پیت‌لرده کونده ۹۰ الی ۱۴۰ کیشی بو ویروس گه چلینماقده.
ساغلیک وزیرلیگی سوزلاوچیسی اورین‌باسری میرویس علیزی نینگ ایتیشیچه، مملکتده کرونا ویروسی نینگ ایجابی واقعه‌لری کوپه‌یماقده و کوپینچه واقعه‌لر ایسه ننگرهار، هرات، قندهار و کابل ولایت‌لریده قید ایتیله‌دی.
جناب علیزی گه کوره، هر کون کرونا ویروسی گه چلینگن‌لردن ۴ الی ۶ ته‌سی جان بیره‌دی. ساغلیک وزیرلیگی سوزلاوچیسی اورین‌باسری نینگ ایتیشیچه، کونده ۱۵۰۰ الی ۲۵۰۰ شبهه‌لی واقعه تیکشیریله‌دی که بولردن ۹۰ الی ۱۴۰ ته‌سی ایجابی چیقه‌دی.
جناب علیزی نینگ ایتیشیچه، چیگره‌لرنی باغلش اوچون بحث‌لرنی دوامی بار، بیراق ساغلیک وزیرلیگی تامانیدن حاضرگچه بیللی بیر برنامه ارایه ایتیلمه‌گن و وضعیت یمان بولگن صورتده، کیینگی اَدیم‌لر کوتاریلیشی ممکن.
باشقه بیر تاماندن بوگون ساغلیک وزیرلیگی سرپرستی وحیدالله مجروح، ساغلیک رئیس‌لری بیلن ییغین اوتکزیب ایتیشیچه، مملکتده کرونا ویروسی نینگ اوچینچی تولقینی نی آلدینی آلیش اوچون، افغانستان گه هند پروازلری توخته‌تیلیشی، پاکستان و ایران چیگره‌لریده کیلیب-کیتیش گه چیکلاو یره‌تیش، ییغین‌لرنی آلدینی آلیش و شاشلینچ کمیته‌لر فعال بولیش برنامه‌لری بو وزیرلیک تامانیدن دولت گه تکلیف بیریله‌دی.
ساغلیک وزیرلیگی مسئوللری نینگ بیاناتی اساسیده، حاضر مملکتده کرونا نینگ انگلیسی تیپلی ۲۴۶ ایجابی واقعه‌سی قید ایتیلگن.
ساغلیک وزیرلیگی بونده‌ی بیانات بیرگن بیرحالده، سونگی پیت‌لرده یشاوچیلر ساغلیک وزیرلیگی نینگ توصیه‌لری جمله‌دن اجتماعی فاصله نی رعایت قیلیش، ماسک دن قولله‌نیش، ییغین‌لردن اوزاقله‌نیش و باشقه موردلرگه توجه قیلمه‌یدی.
