اوتگن کونی پاکستان تامانیدن بیر میلیون ۴۰۰ مینگ افغانستانلیک مهاجرنینگ قانونی یشش و اختیاری چیقیش مدتی توگهدی. ایندی اسلامآبادده افغانستانلیک مهاجرلرنینگ حقوقی کمیتهسی، بو مملکت پولیسی ۱-سپتامبر، دوشنبه کونی «پیاوآر» کارتی بولگن افغانستانلیک مهاجرلرنینگ رسمی حبس گه آلیش و مجبوری شکلده قیتریش جریانینی باشلهگن.
اسلامآبادده افغانستانلیک مهاجرلرنینگ حقوق کمیتهسی باشلیغی محمدامان شیخالاسلامی گه کوره، پاکستان پولیسی بیرقطار شهرلرده باشپنه کارتی بولگن افغانستانلیک مهاجرلرنینگ حبس گه آلیب و قیتریش اوچون، اویمه-اوی تینتونی باشلهگن.
اونینگ ایتیشیچه: «بوگون عملیاتلری باشلندی و اوزیم یشهیدیگن حدوده عملیات باشلنگن و اویمه-اوی تینتو قیلیشماقده و افغانستانلیک مهاجرلرنی قیدیریشماقده؛ بو ییرده ۳۰ و ۴۰ ییل یشهگنلر بار سرمایه یاتقیزگن و حیاتلرینی یولگه قویگنلر بار، سرمایهلرینی ییغمسدن اولرنی مجبوری شکلده قیتریشهدی و بو مهاجرلرنینگ کتّه قیینچیلیگی سنلهدی.»
اونینگ کوپهیتیریشیچه، باشپنه کارتی بولگن افغانستانلیک مهاجرلرنینگ حبس گه آلیش و قیتریش جریانی یانیده، پاکستاندهگی باشقه افغانستانلیک مهاجرلر هم ویزه مدتی اوزهیتیریلمسلیگی، اقتصادی قیینچیلیک و باشپنه سورهش جریانی سُستلیگی بیلن دوچ دیر.
پاکستانده باشپنه کارتی بولگن افغانستانلیک مهاجرلردن بیرقطاری، مجبوری چیقریش جریانی باشلنیشدن خواطر بیلدیریب، خلقارا تشکیلاتلردن پاکستان دولتی اۉز قرارینی قیته کوریب چیقیش اوچون باسیم کیلتیریشنی سورهیدیلر.
پاکستانده افغانستانلیک مهاجر یعقوبی مهاجر گه کوره: «یشش کارتی بولگن مهاجرلر ۲۰ و ۲۵ ییلدن بیری پاکستانده یشب کیلگن؛ حتا بیرلشگن ملتلر تشکیلاتی تامانیدن ثبت و راجستر قیلینمهگن؛ بو ۲۰ ییل ایچیده سرمایه یاتقیزیشگن ایندی بوش قول بیلن مجبوری شکلده افغانستان گه قیتریلماقده؛ بیرلشگن ملتلر تشکیلاتی و انسان حقوقی تشکیلاتلری بوتوغریده اقدام قیلسینلر.»
«پیاوآر» کارتنینگ اعتبار مدتی اوشبو ییل جون آیی سۉنگیده یکونلندی، بیراق مهاجرلرنینگ شکایتلری و خلقارا تشکیلاتلرنینگ باسیملری طفیلی پاکستان اولرنینگ اعتبار مدتینی ۳۱ آگست گه قدر اوزهیتیردی.
مهاجرلر وزیرلیگی سۉزلاوچیسی عبدالمطلب حقانی، پاکستاندن قیتگنلر گه، اولرنینگ احتیاجلرینی تأمینلش اوچون افغانستانده تولیق تیارگرلیک کوریلگنیدن ایشانچ بیلدیرهدی.
اونگه کوره: «افغانستانلیکلردن اېستهگیمیز شو که قیین و مهاجرلیکده حیات کیچیریش گه چېک قویسینلر و اۉز ایستکلری بیلن مملکت گه قیتسینلر؛ بو ییرده دایمی باشپنه تعلیم و تربیه و حیاتلرینی یخشیلنتیریش اوچون تیارگرلیک کوریلگن و امکان قدر تولیق احتیاجلری و قیینچیلیکلری تأمینلنهدی.»
پاکستان میلادی ۲۰۲۳-ییلده حجتی بولمهگن افغانستانلیک مهاجرلرنینگ چیقریش جریانی واوندن سۉنگ اپریل آییده پاکستان تابعیتی «ایسیسی» بولگنلرنی چیقریش جریانینی باشلهدی و ایندیلیکده باشپنه «پیاوآر» کارتی بولگن افغانستانلیک مهاجرلرنینگ چیقریش جریانینی باشلهگن.
بیرلشگن ملتلر تشکیلاتینینگ مهاجرلر ایشلری بوییچه عالی کمیشنری (یواناچسیآر)، اوشبو میلادی ییل باشلنگنیدن ۲۸- آگست گه قدر، ۴۴۰ مینگ افغانستانلیک پاکستاندن قیتریلگن، اولر ارا ۶۹ فایزینی مهاجرتی کارتی بولگنلر تشکیل بیرگنینی ایتگن.
