صناعت و سوداگرلیک وزیرلیگی، صناعت و کان‌لر اتاق‌لری و خلق‌ارا افغانستان کورگزمه‌لر مرکزی همکارلیگی بیلن صناعت هفته‌سی آتیده ملی و خلق‌ارا آلتی کونلیک کورگزمه نی ایچکی و خارجی سوداگرلر نینگ حضوری بیلن کابل ده آچگنلر.
اوشبو کورگزمه ده ایچکی و خارجی سوداگرلر محصولات و تولیدلرینی ۵۰۰ غرفه ده کورگزمه گه قوییشگن. اوشبو وزیرلیک مسئوللری گه کوره بو کورگزمه ده ۲۰۰ غرفه عیاللر و ۱۵ غرفه ایران سوداگرلری گه اختصاص بیریلگن.
صناعت و سوداگرلیک وزیرلیگی نینگ معینی قدرت‌الله جمال گه کوره، بو کورگزمه ده ایکینچیلیک، طبی اوسکونه، برقی اوسکونه‌لری، انشاآت موادلری، قول توقیمه و باشقه تولیدلر نمایش گه قوییلگن.
اونینگ کوپه‌یتیریشیچه: «بو کورگزمه ده قالین، مرمر تاشی، لبنیات، ایچیملیک، سیخ‌گل، انشاآت موادی، بطری اسکرین، موتر سایکل، دیگ بخار، تخنیکی جهازلر، طبی اوسکونه کبی ایچکری ده ایشلب چیقریلگن نرسه‌لر کورگزمه گه قوییلگن، ایران دن هم بیر قطار کمپنیه‌لر تولیدلرینی نمایش گه قویگنلر.»
بیزلرنینگ فیسبوک صحیفه‌میزگه باش اورینگ!
اوشبو کورگزمه نی آچیش مراسمیده سرپرست حکومت باش وزیرلیگی نینگ اداری اۉرین باسری عبدالسلام حنفی نطق سۉزلب بغلان ده سۉنگی سوو تاشقین‌لری طفیلی جبرلنگن عایله‌لر گه همدردلیک بیلدیریب ایچکی و خارج ده‌گی برچه سوداگرلر و یشاوچیلر دن، امکانیت‌لری گه نسبتن اوشبو سوو تاشقین‌لری باعث جبرلنگنلر گه یاردم بیریش‌لرینی اېسته‌گن.
حنفی جنابلری نینگ کوپه‌یتیریشیچه، افغانستان ده ایشلب چیقریله‌دیگن نرسه کوپ و منطقه ده صناعتی مهم مرکز گه اۉزگریشی ممکن.
اونگه کوره: «اقتصادی ترقیات اوچون صناعت رواجلنیشی مهم دیر، صناعت ایش فرصتی یره‌تیلیشی، ایچکی ناخالص تولید اوچون علیحده اهمیت گه اېگه. صناعت رواجی اوچون زمانه‌وی تخنیک و ملَکه‌لی کیشی‌لر کېره‌ک.»
بیزلرنینگ «ایکس» ترماغی ده هم تعقیب قیلینگ!
سرپرست حکومت باش وزیرلیگی نینگ اداری اۉرین باسری، اسلام امیرلیگی ایچکی صناعت و تولیدلرنی قۉللب-قوتلشیدن ایشانچ بیلدیره‌دی.
عین‌حالده، اوشبو کورگزمه ده قتنشگن صناعتچیلر و سوداگرلردن بیرقطاری، سرپرست حکومت تامانیدن ایشلب چیقریش کارخانه‌لر اوچون تېزلیک بیلن ییر توزیع اېتیلیشی گه امید بیلدیرگنلر.
صناعت و کان‌لر اتاقی باشلیغی شیرباز کمین‌زاده گه کوره: «آلدین ۴ دن ۵ مینگ فابریکه‌میز بار اېدی، حاضرگی کونده آلتی مینگ فابریکه‌میز بار و ۶۸ سکتور ده اۉزیمیزنی تامینله‌گن میز؛ اسلام امیرلیگی دن سرمایه یاتقیزووچیلرنی ترغیب قیلیب و صناعتچیلر گه ییر توزیع قیلیشنیی اېسته‌یمیز.»
عین‌حالده، صناعت هفته‌سی ملی و خلق‌ارا کورگزمه ده قتنشگنلر، بو کبی کورگزمه‌لر یولگه قوییلیشینی اونیملی دیب، ایش بازاری یوق‌لیگی و درآمدلری کمه‌یشیدن شکایت قیله‌دیلر.
صناعت و سوداگرلیک وزیرلیگی مسئوللری نینگ ایتیشلریچه، بو وزیرلیک ایچکی صناعت و تولید رواجلنیشی اوچون، ایکّی مینگ دن آرتیق شرکت گه جواز توزیع قیلگن یا که جوازلری مدتینی اۉزه‌یتیرگن.
برچه‌سی بیلن، صناعت و سوداگرلیک وزیرلیگی مسئوللری گه کوره، بوندن آلدین ملی و خلق‌ارا کورگزمه‌لرنی یولگه قوییش بیلن، ایچکی و تشقی سوداگرلر اۉرته‌سیده میلیون‌لرچه دالرلیک شرطنامه امضالنگن.
