آیمامه نینگ عایله اعضالری طالبان نظارتیدن قاچیب اوزلرینی قوتقرگنلر. اولرنینگ ایتیش‌لریچه، آیمامه طالبان تامانیدن ۲ یریم آی جنسی زورلنگنیدن سونگ، اولدیریلگن.
اولرنینگ آگاه‌لنتیریش‌لریچه، اسلامی امارت اولرنینگ ایستک‌لریگه دقت قیلمه‌گن صورتده، طالبان نینگ پاکستانده بولگن بویوک‌لریگه مراجعت قیله‌دیلر.
آیمامه نینگ آته‌سی خال‌محمد نینگ ایتیشیچه، طالبان قومندانلریدن بولمیش گرگ‌که تانیلگن قدرت‌الله مهمان‌لیکدن سونگ، باشقه بیر طالب بیلن قیزینی جنسی زورلگن.
خال‌محمد نینگ کوپه‌یتیریشیچه، اولر طالبان نینگ درزاب ده‌گی بویوک‌لریگه شکایت قیلگنلر، لیکن شکایت‌لری نتیجه بیرمه‌ی و قیزی اولدیریلگن.
آیمامه نینگ تاغه‌سی محمداکرم، عدالت ایسته‌ش اوچون جوزجان مرکزی شبرغان شهریگه کیلگن. اونینگ ایتیشیچه، طالبان قومندانلریدن بولمیش گرگ‌که تانیلگن قدرت‌الله بوندن آلدین داعش گروهی نینگ عضوی ایدی و سینگیلی‌سی نینگ قیزینی جنسی زوروانلیک آستیگه قرار بیرگن.
آیمامه نینگ عایله اعضاسی‌نی آگاه‌لنتیریشیچه، ایستک‌لریگه دقت بولمه‌گن صورتده، کویته کینگشی‌گه شکایت قیلیش اوچون پاکستان‌گه باره‌دیلر.
عین‌حالده، جوزجان ولایتی نینگ درزاب تومنیدن بیرقطار مردمی منبع‌لرنینگ ایتیش‌لریچه، مذکور قیز طالبان تامانیدن جنسی زورلنگنی سبب، یوک‌لی بولگنیدن سونگ، اولدیریلگن.
شونینگدیک، جوزجان پولیس قومندانلیگی سوزلاوچیسی احمدمسعود ندیم نینگ ایتیشیچه، طالبان گروهی بو جنایت‌گه عیب‌لنگن، لیکن اوشبو جنایت‌نی یاشیریش اوچون آیمامه نینگ جسدینی عایله‌سیگه تاپشیرمه‌یدی.
جناب ندیم گه کوره، واقعه طالبان حاکمیتیده یوز بیرگن، بیراق آیمامه نینگ جسدینی عایله‌سیگه تاپشیریش اوچون قوم بویوکلر آرقه‌لی، سعی و حرکت قیلماقده‌لر.
ایتیلیشیچه، طالبان گروهی ۱۶ یاشیده بولگن آیمامه نی اوتگن هفته اولدیریب و جنازه قیلمسدن توپراققه قویگنلر.