بوگون “پنجشنبه” ساغلیق‌نی سقلش وزیری احمد جواد عثمانی نینگ کابلده خبری بیر ییغین اوتکزیب ایتیشیچه، کرونا ویروسی نینگ ایکینچی موجی و ینگی توری بوتون دنیا گه کوپه‌ییب بارماقده و کرونا ویروسی نینگ ینگی توری هندوستان و پاکستان اولکه‌لریده قید ایتیلگن و افغانستان ده هم ترقه‌لیشی ممکن.
جناب عثمانی نینگ ایتیشیچه، ساغلیق‌نی سقلش وزیرلیگی ده کرونا ویروسی نینگ ینگی توری نی بیللی قیلیش اوچون زمانوی اوسکونه‌لر بولمه‌گن، لیکن ساغلیق‌نی سقلش وزیرلیگی کرونا ویروسی نینگ ینگی توری نی افغانستان ده بیللی قیلیش اوچون تلاش قیلماقده.
شونینگ دیک جناب عثمانی، افغانستان گه کیله‌دیگن مسافرلر نینگ کرونا ویروسی بولیب – بولمه‌گنی خصوصده تیکشیریلیشی نی جبری بیلیب و کرونا ویروسی نینگ تیکشیرو تستی بولمه‌گن مسافرلر افغانستان گه کیره آلمس‌لیگی اوستیده تاکید ایتگن.
جناب عثمانی نینگ ایتیشیچه، حاضر افغانستان ده کرونا ویروسی نینگ وضعیتی قانیقرلی بولگن، لیکن کرونا ویروسی نینگ ایکینچی موجی بیرینچی موجی گه کوره اوزون مدت‌لی بولیشی ممکن.
انه‌شوحالده ساغلیق‌نی سقلش وزیرلیگی مسؤل‌لری نینگ ایتیش‌لریچه، اوتگن ۲۴ ساعت جریانیده کرونا ویروسی دن شبهه‌لی بولگن ۴۱۲ کیشی تیکشیریلیب و نتیجه ده ۸۵ کیشی نینگ تیکشیرووی مثبت چیققن.
ایتیش لازم که کرونا ویروسی نینگ ینگی توری بوندن نیچه کون آلدین بریتانیا اولکه‌سی ده تثبیت ایتیلگن ایدی و حاضر افغانستان قوشنی سی بولگن هندوستان و پاکستان اولکه‌لریده هم تثبیت ایتیلگن.
