قندوز ولایتی نینگ آقتاش تومنی یشاوچیلری، اوشبو تومن دن اوتیب تخار ولایتیگه باره‌دیگن برق لینی‌نی کیسگن‌لر.
تخار یشاوچی‌لریدن بیرقطاری نینگ ایتیش‌لریچه، قندوز ولایتی نینگ آقتاش تومنی یشاوچی‌لریگه برق بیریلمه‌گنی سبب، اولر تخار برقی‌نی کیسگن‌لر.
تخار ولایتی بوییچه ژورنالست‌لر ملی بیرلشمه‌سی باشلیغی شفیق پویا و اوشبو ولایت مدنی فعال‌لریدن بولمیش فیروز احمدی نینگ سلام‌وطندارگه ایتیش‌لریچه، قندوز ولایتی نینگ آقتاش تومنیده برق فراهم قیلیش اوشبو ولایت محلی حکومتی مسوولیت‌لریدن دیر و تخار برقی نینگ اهالی تامانیدن توخته‌تیلیشی بو ولایت یشاوچی‌لریگه قرشی تبعیض بولگنی‌نی کورسته‌دی.
اولرنینگ ایتیش‌لریچه، تخار برقی‌نی قیته‌دن باغلش موضوعی قوم بویوکلری نینگ سعی و حرکتی بیلن حل بولمه‌یدی و آقتاش یشاوچی‌لریگه قندوز محلی حکومتی نینگ جواب قیتریشی کیره‌ک.
عین‌حالده، تخار ولایتی بوییچه برشنا شرکتی باشلیغی حبیب‌الله پویا نینگ اوشبو ولایت برقی توخته‌تیلگنی‌نی تصدیق‌لب ایتیشیچه، برق نی قیته‌دن باغلش اوچون کوپینچه سعی و حرکت قیلگنلر، لیکن حاضرگه‌قدر نتیجه بیرمه‌گن.
شونینگدیک، محلی بیر منبع نینگ کیم‌لیگی سیرقالیش‌نی ایسته‌ب ایتیشیچه، تخار ولایتی نینگ برقی طالبان هماهنگ‌لیگی آرقه‌لی اهالی تامانیدن توخته‌تیلگن.
سونگی ۳ آی جریانیده بو ایکینچی مرته کیم تخار برقی آقتاش تومنی یشاوچیلری تامانیدن توخته‌تیله‌دی و ایکی ولایت محلی مسووللری حاضرگه‌قدر بو قیین‌چیلیک‌که حل یول تاپمه‌گن.
