بوگون “شنبه” معلومات و مدنیت وزیرلیگی سرپرستی طاهر زهیر، کابلده خبری بیر ییغین اوتکزیب، مملکت ایچکی ایشلر وزیرلیگی‌دن خبرچیلر خوفسیزلیگی‌نی تأمین قیلیشی‌نی سوره‌گن.
جناب زهیرنینگ اوشبو ییغینده تأکید قیلیشیچه، خبرچیلر خوفسیزلیگی‌نی تأمین‌لش مملکت ایچکی ایشلر وزیرلیگی و امنیتی نهادلرنینگ مسؤلیتیدن دیر.
جناب زهیرگه کوره، خبرچیلر عین زمانده معلومات بیریش و قولی‌گه قورالی آلیب اوز خوفسیزلیگی نی تأمین قیلیشده قادر ایمس.
معلومات و مدنیت وزیرلیگی نینگ سرپرستی طاهر زهیر، ملی مصالحه کینگشی، ایچکی ایشلر وزیرلیگی و تینچلیک مذاکره‌سینی آلغه آلیب باره‌دیگن هیأت‌لردن، تینچلیک مذاکره‌سی نینگ ایکینچی دوریده خبرچیلر خوفسیزلیگی تأمین ایتیلیش نی آجنداسیگه آلیشی نی سوره‌گن.
معلومات و مدنیت وزیرلیگی، عدالت ایسته‌ش نامه‌سینی تیارلگن و اوشبو نامه گه کوره، اروپا بیرلشمه‌سی و بیرلشگن ملت‌لر تشکیلاتی دن، خبرچیلر خوفسیزلیگی نی تأمین‌لشی سوره‌گن.
انه‌شوحالده مذاکره قیلوچی هیأت‌لردن بولمیش حفیظ منصور نینگ ایتیشیچه، طالبان گروهی خبرچیلردن قورقه‌دیلر و هر بیر خبر‌چینی بیر جنرال نظامی صفتیده کوره‌دیلر.
جناب منصور نینگ ایتیشیچه، خبرچیلر نینگ بوتون هدف‌لی قتل‌لری آرقه‌سیده طالبان گروهی نینگ قولی بولگن.
اوتگن کونی غور ولایتی نینگ خبرچی‌سی بسم الله عادل ایماق ترور ایتیلگنیدن کیین، خبرچیلردن حمایت قیلوچی کمیته، دولت گه تیگیشلی بولگن بوتون خبرلر ۳ کون بوییچه ترقه‌تیلمسلیگی نی سوره‌گن.
لیکن قطار خبرچیلر، دولت گه تیگیشلی بولگن خبرلرنی ترقه‌تمسلیک‌نی تاثرلی آدیم بیلمه‌یدیلر. اولرنینگ سوزیگه کوره، دولت و خبرچیلردن حمایت قیلوچی نهادلر بوندی نمایشی اقدام اورنیگه، خبرچیلر خوفسیزلیگی نی تأمین‌لش خصوصیده تلاش قیلیشی لازم.
میلادی ۲۰۲۱- نچی ییل باشلن گنیدن ایکی کون اوتگن و اوشبو ایکی کون جریانیده بیر خبرچی و بیر مدنی فعال کابل و غور ولایت‌لریده هدف‌لی ترورلر قربانی بولگن.
افغانستان رسانه‌لر مرکزی تامانیدن ترقه‌تیلگن گزارش گه کوره، اوتگن بیر ییل جریانیده ۴۵ مورد تهدید، ۱۱ مورد فزیکی زوروانلیک، ۶ مورد قورالی هجوم، ۱۳ مورد توهین و تحقیر و ۶ مورد خبرچیلر نی قولگه آلیش قضیه سی افغانستان ده ثبت ایتیلگن.
