واقعه‌لر و قورالی مناقشه‌لر معلومات تشکیلاتی (ACLED)، «طالبلر حاکمیتیده افغانستانده پریشان‌لیکلرنی ایزلش» عنوانی آتیده گزارش ترقه‌تیش بیلن، اوتگن ییلی ۱۵ آگست‌دن کیین افغانستانده تینچ اهالی‌گه قرشی زوروانلیکلر کوچه‌یشینی بیلدیرگن. اوشبو گزارش باشقه ایکی نهاد جمله‌دن افغانستان صلح دیده‌بانی همکارلیگی بیلن تیارلنگن.
خاتین قیزلرگه قرشی سیاسی زوروانلیکلر کوچه‌یشی، تینچ اهالی‌گه قرشی زوروانلیک تامیرلری، اسلامی امارت گه ضدت مقاومت کوچلری نینگ ظهور قیلیشی و سرپرست حکومت کوچلری بیلن توقنه‌شیش‌لری، اسلامی امارت نینگ داعش بیلن مبارزه قییشی و اسلامی امارت آره‌سیده‌گی تارتیشوولر، اوشبو گزارش‌ده کیلتیریلگن موردلردن عبارت دیر.
بیزلرنینگ فیسبوک صحیفه‌میزگه باش اورینگ!
گزارش‌ده کیلیشیچه، افغانستانده اسلامی امارت حاکم بولیشیدن کیین، اوشبو مملکتده بشری حقوق ایاغ آستی بولیشی و تینچ اهالی‌گه قرشی زوروانلیکلر کوپه‌یگن. شونینگدیک افغانستانده زوروانلیکلر کوچه‌یشی بیلن، اوشبو مملکت ۲۰۲۲-ییل‌ده اوروش و قورالی تارتیشوولری بیلن روپه‌رو بولگن ۱۰ مملکت قطاری گه کیرگن.
گزارشگه بناً، سابق دولت قوللشیدن کیین، تینچ اهالی اسلامی امارت کوچلری، داعش و نامعلوم قورالی جنگری‌لر تامانیدن نشانگه آلینگن. واقعه‌لر و قورالی مناقشه‌لر معلومات تشکیلاتی نینگ تأکیدلشیچه، اوتگن ییلی ۱۵ آگست‌دن کیین رویخط‌گه آلینگن زوروانلیکلر نینگ اکثر عامل‌لری اسلامی امارت دیر.
مذکور تشکیلات گه کوره، تینچ اهالی مسلک، قوم و مذهب‌لری گه بناً اسلامی امارت تامانیدن نشانگه آلینیب و اسلامی امارت تامانیدن عمومی کیچیریم اعلام بولسه‌ده، بیراق سابق دولت رسمی‌لری و امنیتی کوچلر نشانگه آلینگنلر. سابق دولت ایشلاوچیلری و خوفسیزلیک کوچلری قولگه آلینیشی و اولر نینگ عایله اعضالری بیزاوته بولیشی، اوشبو گزارش‌ده ذکر بولگن زوروانلیک موردلریدن دیر.
عادی اهالی‌گه قرشی زوروانلیک ایکینچی عاملی نامعلوم قورالی کیشی‌لر دییلگن که ۱۴ آگست‌دن کیین قریب ۳۹ فایز زوروانلیک رویخط گه آلینگن. اوشبو زوروانلیکلر گه قورالی هجوم، آدم اوغیرلش و ترور شامل بوله‌دی. تینچ اهالی‌گه قرشی اوچینچی زوروانلیک عاملی داعش دییلگن.
قورالی مناقشه‌لر و معلومات تشکیلاتی گه کوره، اسلامی امارت قدرت‌نی قولگه آلیشیدن کیین خاتین قیزلر حقوقی گه نسبتن اولر نینگ «سنتی تعصبی» و عیاللرگه قرشی سیاسی زوروانلیکلر آشیشی باعث خواطرلر آشگن. خاتین قیزلرگه قرشی سیاسی اکثر زوروانلیکلر ۲۰۱۷- ییل دن ۲۰۲۲-ییل نینگ جنوری و فبروری آی‌لریده رویخط گه آلینگن. مذکور تشکیلات عیاللرگه قرشی ۷۵ فایز زوروانلیکلرنی اسلامی امارت گه نسبت بیرگن.
گزارش‌ده کیلیشیچه، خاتین قیزلر تامانیدن اسلامی امارت گه قرشی مظاهره‌لر اوتکزیلیشی، اولرگه قرشی سیاسی زوروانلیکلر کوچه‌یشیدن درک بیره‌دی که قطار عیاللر اوشبو اعتراضلری جریانیده نشانگه آلینیب و زوروانلیک قربانی بولگنلر.
افغانستانده اسلامی امارت حاکم بولیشیدن کیین کابل، ننگرهار وقندهار ولایت‌لری، تینچ اهالی‌گه قرشی زوروانلیک اینگ کوپ رویخط گه آلینگن ولایت‌لردن دیر. عین‌حالده، افغانستان نینگ شمالی ولایت‌لری اینیقسه تخار و بغلان ولایتلریده، عادی اهالی‌گه قرشی کوزگه کورینرلی درجه‌ده زوروانلیک کوپه‌یگن.
جمعی میدیالر سرکوب ایتیلیشی بیلن، ولایت‌لرده تینچ اهالی‌گه قرشی زوروانلیکلردن گزارش بیریش قیینلشگن و حتا اسلامی امارت حکومت گه قرشی گزارش‌لر ترقه‌لیشی‌گه مانع بولگنلیگی تأکیدلنگن.
بیزلرنینگ توییترده هم تعقیب قیلینگ!
واقعه‌لر و قورالی مناقشه‌لر معلومات تشکیلاتی نینگ گزارشی‌ده کیلیشیچه، افغانستانده اسلامی امارت قدرت گه ایریشیدن کیین ایریم مقاومت گروه‌لری شکللنگن. اوشبو گروه‌لر نینگ اینگ مهمی «افغانستان ملی مقاومت جبهه‌سی» دیر که پنجشیرده احمدشاه مسعود نینگ فرزندی احمد مسعود تامانیدن رهبرلیک بوله‌دی. مذکور تشکیلات نینگ ایتیشیچه، ۲۰۲۲-ییل نینگ جنوری و فبروری آی‌لریده اسلامی امارت و مقاومت جبهه‌سی کوچلری آره‌سیده‌گی توقنشوولر کوچه‌یگن.
شونینگدیک گزارش‌ده کیلیشیچه، اسلامی امارت حاکمیتیدن کیین افغانستانده اسلامی دولت (داعش) گروهی اسلامی امارت بیلن انده_سنده توقنشگن. اوشبو گزارشگه بناً داعش عموماً کابل، کنر وننگرهار ولایتلریده فعالیت آلیب بارماقده و داعش گروهی تامانیدن تینچ اهالی‌گه قرشی زوروانلیکلر کوپراق فراه‌ده ثبت ایتیلگن.
بونگه علاوه، اوشبو گزارش‌ده اسلامی امارت نینگ اوز آره‌لریده‌گی قرشی‌لیکلری خصوصیده هم ذکر بولگن، سرپرست حکومت حاکم بولیشیدن حاضرگچه اوزلری آره‌سیده ۳۰ مرته توقنشگن‌لر. بو توقنشوولر تامیری قومی رقابت‌لر دییلگن، گزارش‌ده اسلامی امارت کوچلری نینگ اکثریتی پشتون‌لر دییلسه‌ده؛ بیراق اولر آره‌سیده باشقه قوم‌لر هم بارلیگی ایتیلگن.
اسلامی امارت متصدی‌لری اوشبو گزارش خصوصیده حاضرگچه هیچ نرسه دیمه‌گنلر.
