کابل شهری نینگ ۱۲-ناحیه‌سیده‌گی عیاللر و باله‌لر گه مخصوص ۱۵۰ اورین‌لی مخدره ماده نی ترک قیلیش کسل‌خانه‌سی؛ عیاللر و باله‌لر گه مخدره ماده نی ترک قیلیب و جمعیت‌ده ساغلام بیر کیشی صفتیده بولیشلری خصوصیده یاردم بیره‌دی. اوشبو گزارش‌ده عصبی شرک‌لر، قیتریشلر و قیین‌چیلیک‌لر بیلن مخدره ماده نی ترک قیلیش اوچون ۴۵ کون‌لیک دوره نینگ باش ۱۵ کونی نی اوتکزگن عیاللر بیلن صحبت اوتکزیلگن.
مذکور مخدره ماده نی ترک قیلیش مرکزی‌ده ۱۴ معتاد عیال نینگ سلام‌وطندار بیلن اوتکزگنلری صحبت‌لریده ایتیشلریچه، ایرکک‌لر تامانیدن تصادفاً یا-ده ایرکک‌لر سببی بولگن بیر وضعیتده مخدره ماده قوللنیش گه چلینگنلر. مذکور ۱۴ عیال‌دن، آلتی ته‌سی تورموش اورتاق، تورت ته‌سی آته و باشقه تورت ته‌سی ایسه باله‌لریدن اوزاق قالیش، طلاق و مخدره ماده گه چلینگن دوست‌لری بیلن یوریش سبب، مخدره ماده گه چلینگنلر.
اوشبو عیال‌لردن بیری ۲۰ یاشر برشنا نینگ ایتیشیچه، آته‌سی شیشه قوللنه‌ر ایکن و انه شوو سبب، او و باشقه اوچ سینگیلی هم اونینگ قوللنیش گه چلینگنلر. اولر سکیز ییل‌دن بیری شیشه قوللنیش‌لری جریانیده، کوپینچه قیین‌چیلیک‌لر بیلن مواد قولگه کیلتیره‌ر ایکنلر. تورموش گه چیقریلگن ۲۰ یاشر برشنا نینگ کوپه‌یتیریشیچه، قوشمه حیاتی نی دوام بیریش سبب، مخدره ماده نی ترک قیلیش گه قرار آلگن. «توی قیلگنیم‌دن بیری، مخدره ماده نی ترک قیلیش گه قرار آلدیم؛ ۱۰۰ فایز ترک قیلیش ایسته‌یمین؛ چونکه ترک قیلمه‌سم بوتون حیاتیم نی قولدن بیره‌من. تورموش اورتاغیم اوچون ترک قیله‌من.»
مخدره ماده گه چلینگن عیال‌لردن کوپینچه‌سی تورموش اورتاق‌لری نینگ مخدره ماده گه چلینگنی سبب، بو قیین‌چیلیک اورته‌سی گه توشگنلر. بو عیال‌لردن بیری ماه‌گل نینگ ایتیشیچه، تورموش اورتاغی اونینگ دوالنیشی اوچون پولی بولمه‌گنی و دردی آرام بولیشی اوچون، اونگه مخدره ماده بیرگن و شو رقم مخدره ماده گه چلینگن دیر. «توی قیلمه‌گنیم‌دن آلدین اونینگ معتاد بولگنی نی بیلمس ایدیم؛ ایران کیتگن ایدی. تریاک چیکیدی… جوده‌یم کسل ایدیم، مینگه تریاک بیردی؛ جان آغریغیم آرام بولدی، ینه هم کل بولگنیم‌ده، مین هم قوللندیم.»
کابل شهری نینگ ۱۲-ناحیه‌سیده‌گی ۱۵۰ اورین‌لی کسلخانهسیده بولگن عیال‌لردن باشقه بیری صابره نینگ ایتیشیچه، تورموش اورتاغی نینگ مخدره ماده گه چلینگنی و اونینگ ترک قیلمسلیگی اوچون اوندن طلاق آلیش نی ایسته‌گنی پیتده، تورموش اورتاغی طلاق آلمسلیگی اوچون قصداً اونی مخدره ماده قوللنیشی گه معتاد قیلگن. «تورموش اورتاغیم معتاد ایدی، قریب ۱۰ ییل‌دن بیری مخدره ماده‌دن قوللنه‌ر ایدی. آته‌م قیزیم نی طلاق بیر دیدی، قولی نی سیندیردی و او هم قصداً مینی مخدره ماده گه معتاد قیلدی. بویره‌گیم‌ده تاشی هم بار.»
بیزلرنینگ فیسبوک صحیفه‌میزگه باش اورینگ!
مذکور مخدره ماده نی ترک قیلیش مرکزی‌ده‌گی عیال‌لردن کوپ قطاری نی آنه‌لر تشکیل بیره‌دی که وجود و عصبی سیستم‌لری مواد ایسته‌گنی پیتده، باله‌لری گه یخشی بیر آنه بولیش اوچون مخدره ماده قوللنیش گه یاق دیب و بو کبی قیین کون‌لر نی اوتکزه‌دیلر.
کابل یشاوچیسی و ایکی باله‌سی بیلن مذکور مرکز‌ده مخدره ماده نی ترک قیلیش دوره‌سی نی اوتکزه‌دیگن نصیره نینگ ایتیشیچه، باله‌لری نی درست بیر شکلده باقیش اوچون، مخدره ماده نی ترک قیلیش گه قرار آلگن. مخدره ماده گه معتاد بولیش کوپینچه سبب‌لری بار و بو آره‌ده، باله‌لری نینگ اوزاق‌لیگی نی تحمل قیلیش اوچون مخدره ماده قوللنیش گه یوز کیلتیرگن بیر قطار عیاللر هم بار دیر.
تورموش اورتاغی‌دن جدا بولگنیدن کیین ایکی باله‌سیدن اوزاق بولگن حلیمه نینگ ایتیشیچه، بو اوزاق‌لیک نی تحمل قیلیش اوچون مخدره ماده گه یوز کیلتیرگن. «۲۷ یاشر‌مین؛ تورموش اورتاغیم معتاد ایدی و باله‌لریم نی یانیم‌دن آلدی و ایران کیتدی. هیچ کیمیم یوق بیر ایناغم بار ایدی که او هم ایران کیتدی و مین یالغیز قالدیم. تورموش اورتاغیم مینی ترک قیلدی و باله‌لریم اوچون معتاد بولدیم. باله‌لریم اوچون کوپ هر تامان باردیم؛ بیراق هیچ تاپه آلمه‌دیم. آنه‌م نینگ اویی‌دن کیلدیم که تورموش اورتاغیم باله‌لریم نی آلیب کیتگن؛ تورموش اورتاغیم کیتگنی‌دن کیین، بیرینچی‌ده پودردن باشله‌دیم.»
بیر قطار عیال حقوقی فعال‌لری نینگ ایتیشلریچه، عیاللر نینگ ایرکک‌لر تامانیدن مخدره ماده گه معتاد قیلینیشی، زوره‌وانلیک نینگ باشقه بیر توری دیر که عیاللر گه قرشی عمل گه آشیریله‌دی و شونینگدیک بعضا اوندن قوتقریلیش هم قیین بوله‌دی. مذکور فعال‌لر نینگ کوپه‌یتیریشلریچه، اجتماعی چیکلاولر هم عیال‌لردن کوپ قطاری نینگ مخدره ماده گه یوز کیلتیریشلری گه سبب بوله‌دی.
بو توغریده عیال حقوقی فعالی حمیرا فرهنگ‌یار نینگ ایتیشیچه: «جوده‌یم اچینرلی دیر که عیاللر جبری شکلده معتاد بولسه و بو هم بیر تور زوره‌وانلیک دیر. وضع بولگن چیکلاولر هم بیر تور خوف دیر؛ چونکه عیاللر و قیزلر ذهن‌لری نینگ آرام بولیشی اوچون مخدره ماده گه یوز کیلتیره‌دیلر؛ تابلیت k یا-ده اوندن اینگ خوفلی شیشه کبی ماده‌لر.»
شوندهی بیرحالده، روان‌شناسلر نینگ ایتیشلریچه، مخدره ماده گه چلینیش روحی قیین‌چیلیک‌لر بیلن رابطه‌سی بار و مخدره ماده گه چلینیش‌دن اورته گه کیله‌‌دیگن قیین‌چیلیک‌لر، مخدره ماده قوللنه‌دیگن کیشی نینگ حیاتی گه یامان تاثیرلری بار.
روان‌‌شناسلردن هبت‌الله ابراهیم‌خیل نینگ ایتیشیچه، مخدره ماده گه چلینگن عیاللر، قضاوت بولمس‌دن حمایت بولینیشی کیره‌ک که بو رقم مخدره ماده نی ترک قیلسینلر. «معتاد عیاللر قضاوت آستیده قرار تاپمسلیگی کیره‌ک؛ چونکه اولر بیر تور کسل‌لیک، بیر تور قیین‌چیلیک بیلن روپه‌ره‌لر. اوزلری اوزلری نی درمان قیله آلمه‌یدیلر؛ اولر گه اعتیاد خصوصیده تعلیم بیریشیمیز کیره‌ک.»
بو بیلن بیرگه، جامعه‌شناس‌لردن ضیا نیک‌زاد نینگ ایتیشیچه، جمعیت و عایله‌ده عیاللر نینگ نقشی گه توجه قیلیش پیتده، مخدره ماده گه چلینگن معتاد عیاللر، مخدره ماده گه چلینگن معتاد نسل نی جمعیت گه وارد قیله‌دی. «جمعیت‌ده اساسی اورین‌‌نی عیاللر تشکیل بیردی؛ چونکه تربیه قیلیش و نسل ییتیشیریش عیاللر آرقه‌لی صورت تاپه‌دی؛ انه شوو سبب، هر قنچه عیاللر گه قیین‌چیلیک وارد بولسه، اوشه‌نچه عیاللر گه تاثیر قویه‌دی؛ عیاللر مخدره ماده گه یوز کیلتیرگنی پیتده،کیینگی نسل هم اوندن تاثیر‌لنه‌دی.»
بیزلرنینگ «ایکس» ترماغی ده هم تعقیب قیلینگ!
شوندهی بیرحالده، سرپرست حکومت نینگ ایچکی ایشلر وزیرلیگی سوزلاوچیسی اورین‌باسری بسم‌الله حبیب، مخدره ماده گه چلینگن معتاد عیاللر سانی خصوصیده دقیق آمار ارائه قیلمه‌یدی؛ بیراق ایتیشیچه، اوتگن ییل، افغانستان نینگ تورلی بولیم‌لریدن بیرمینگ ۷۴۹ مخدره ماده گه چلینگن عیال توپلنیب و مخدره ماده نی ترک قیلیش اوچون بولگن مخصوص مرکزلر گه یوباریلگن که اولر ارا، بیرمینگ ۱۱۰ ته‌سی مخدره ماده نی ترک قیلیش بیر دوره‌سی نی اوتکزگنلریدن کیین، مرخص بولگنلر.
اونینگ کوپه‌یتیریشیچه: «توپلم شکلده بیر ییل‌ده مملکت نینگ تورلی بولیم‌لریده مخدره ماده گه قرشی کورهش پولیس آرقه‌لی ۴۰ مینگ کیشی توپلنیب و ساغلیق مرکزلر گه تانیشتیریلگن که اوشبو معتادلر آره‌سیده، بیر عیاللر و اون‌سکیز یاش نی تولدیرمه‌گن کیشی هم بار. ۱۴۰۲-ییل‌ده مخدره ماده گه چلینگن ۱۷۴۹ عیال و ۱۷۰۰ اون‌سکیز یاش نی تولدیرمه‌گن کیشی، مملکت نینگ تورلی بولیم‌لریدن توپلنیب و دوانلیش اوچون ساغلیق مرکزلر گه تانیشتیریلگنلر که اولر ارا، ۱۱۱۰ عیال و ۸۴۴ اون‌سکیز یاش نی تولدیرمه‌گن کیشی ساغه‌یگن‌دن کیین، قیته اوشبو مرکزلردن رخصت بولگنلر.»
شونینگدیک سرپرست حکومت نینگ ساغلیق‌نی سقلش وزیرلیگی سوزلاوچیسی شرافت زمان امرخیل نینگ ایتیشیچه، حاضر ایسه مخدره ماده گه چلینگن ۲ مینگ ۵۰۰ معتاد عیال مخدره ماده نی ترک قیلیش مخصوص مرکزلریده دوالنیش آستیده قرار تاپگن. «قریب ۲ ییل جریانیده، ۶۰ مینگ‌دن آرتیق کیشی دوالنگن. حاضر ایسه ۱۰مینگ معتاد دوالنیش آستیده قرار تاپگن که اولردن ۲۵۰۰دن آرتیغی عیاللر دیر.»
عین حالده، مخدره ماده نی ترک قیلیش‌دن کیین قوللب-قوتلش ایشلر یوقلیگی سبب، اولردن قطاری مخدره ماده نی ترک قیلیش دوره‌سی نی اوتکزگنلریدن کیین، قیته مخدره ماده قوللنیش گه یوز کیلیتره‌دیلر که بو وضعیت، کابل شهری نینگ ۱۲-ناحیه‌سیده‌گی مخدره ماده نی ترک قیلیش مخصوص ۱۵۰ اورین‌لی کسلخانهسیده، عیاللر نی خواطرلنتیرگن. مذکور عیاللر سرپرست حکومت‌دن مخدره ماده نی ترک قیلیش دوره‌سی نی اوتکزگنلریدن کیین، اولر گه ایش زمینه‌سی یره‌تیلیشی نی ایسته‌گنلر.
