بدخشان ولایتی شهر بزرگ تومنی آلتین کانیده اوچ کانچینینگ جسدینی قیدیریش، اوچ کوندن بیری دوام ایمتاقده بیراق هنوزگچه نتیجه بیرمهگن.
۲۰ حمل/۹ اپریل، پنجشنبه کونی توشدن کیین، بدخشان شهر بزرگ تومنیده آلتین کانی قولهدی و اونینگ نتیجهسیده اوچ کانچی توپراق آستیده قالدی و اولرنینگ جسدی هنوزگچه چیقریلمهگن.
شهر بزرگ تومنی یشاوچیسی و واقعه گواهلریدن بولمیش حکیمنینگ ایتیشیچه، پنجشنبه کونی توشدن کیین، بوتومنده بیر آلتین کانی قولهدی و اونینگ نتیجهسیده ییتی کانچی توپراق آستیده قالدی. او شوندهی دییدی: «توشدن کیین ساعت ۴:۰۰ اطرافی ایدی؛ آدملر واسطهلرده توپراق یوویش بیلن مصروف ایدیلر. ییتی کیشی ماشینلری بیلن یوقاریدن توکیلگن توپراق آستیده قالدیلر.»
اوشبو واقعه قربانلریدن بیرینینگ قرینداشی ممتاز، ابهسینینگ اوغلی ایشلش اوچون بو منطقه گه بارگن ایدی؛ بیراق یوز بیرگن واقعهده اولگن و جسدی هنوزگچه تاپیلمهگنینی ایتهدی. اونینگ ایتیشیچه: «ابهمنینگ اوغلی ایدی زرشویلیک اوچون بارگندی، افسوس بیلن بو واقعه یوز بیردی و عزیزلریمیزنی قولدن بیردیک.»
شهر بزرگ تومنی یشاوچیلریدن ضیا، جیینی توپراق آستیده قالگن، باغلیق ادارهلردن اونینگ جسدینی تاپیش اوچون سعی-حرکت قیلیشنی سورهیدی. او شوندهی دییدی: «پنجشنبه کون شهر بزرگده یوز بیرگن واقعهده جیینیم توپراق آستیده قالدی، برچه سعی-حرکتلر بیلن اولرنی تاپه آلمهدیک. دولتدن قیدیریش گه دوام بیریشنی ایستهیمیز.»
شو بیلن بیرگه، بدخشان شهر بزرگ تومنی اولسوالی عبدالرشید رشاد، اوشبو واقعهده اوچ کیشی اولگن و توپراق آستیده قالگنلرنینگ جسدلرینی چیقریش اوچون سعی-حرکت قیلینماقدهلیگینی بیلدیرهدی. اونینگ کوپهیتیریشیچه، سوو کوپلیگی و چقورلیگی سبب آلیب باریلهیاتگن سعی-حرکتلر هنوزگچه نتیجه بیرمهگن.
اونگه کوره: «آستینی قازیش پیتیده تیپهلیک سیلجیدی؛ آدملر قاچیشدی. حاضرگچه بیر آته اوغلی بیلن و باشقه بیر کیشی فکریمچه یاوان تومنی یشاوچیلری دیر، توپراق آستیده قالگنلر.»
بدخشانده زرشویلیک ایشخانهلری، عنعنهوی اصوللردن قوللنیش و خوفسیزلیک چارهلر کوریلمسلیگی سببلی دایمی روشده تیپهلیکلر سیلجیب و سوو گه تولیب قالهدی؛ بوندهی حالتلر اوتگن ییللرده هم بیرقطار کیشیلرنینگ اولیشیگه سبب بولگن.
