کوچهلر قول اوستیده سودا ساتووچیلرنینگ یوقاری آوازلی چقیریقلری، جنراتورلر سیسی، معدنی سوو ساتووچیلرنینگ لوداسپیکرلری سیسی، یوللردهگی گوجوملیک و اوی-جای قوریلیشلر کوپهیشی، ایرتنگدن کیچه کیچ قورونگچه پایتخت یشاوچیلرینی اذیت قیلیب تورگن و اولردن قطارینینگ آسایشتهلیگینی بوزگن سیسلر دیر.
کابل ده سیس افلاسلیگی، یالغیز اذیت قیلووچی بیر سیس ایمس؛ بلکیم یشاوچیلرنینگ کوندهلیک خواطرلریگه اَیلنگن. کابل شهری ۱۱-ناحیه یشاوچیسی زینبنینگ ایتیشیچه، یشش بولیملرده سیس افلاسلیگی، روحی تینچلیک، ایشگه تمرکز قیلیش و حتا اهالی سلامتلیگیگه هم تاثیر قویگن. «کیچه تامان موتر و جنراتورلر سیسی بار که ایرتنگ بولمسدن سوو ساتووچی موترلر سیسی کیین، چیقیندی آلیب کیتهدیگن موتر و شو رقم باشقه بیر قطار سیسلر کیلهدی. بیر قطار کون باش آغریق بولهمیز.»
کابل شهری ۱۴-ناحیه یشاوچیسی بولمیش تهمینهنینگ ایتیشیچه، کوپینچه پیت سیس افلاسلیگینی کمراق حس قیلیش مقصد، اوی کلکینلرینی یاپهدی. «سونگی نیچه پیتده، اوی-جای قوریلیش ایشلری کوپهیگن. باشقه بیر تاماندن موترلر سیسی کیلهدی. اوی کلکینلرینی یاپیب قویهمن. بعضا سرک اوستیده اولتیرگنیمیزنی توشینهمن. هر کوچهده ایکی-اوچ ته اوی قورهدیلر که سیس جودهیم کوپهیهدی.»
اویدن تشقریده هم یشاوچیلردن قطاری ایش و کوندهلیک فعالیتلری توغریسیده سیس افلاسلیگی تاثیریدن خواطر بیلدیرگنلر.
کابل شهریدهگی تکسی هیداوچیلردن یاسر، موترلر و ترافیک گوجوملیگی آرهسیده چرچهگن سیس بیلن ایتیشیچه، ایرتنگدن آخشمگچه اوشبو سیس و شاوقین ایچیده ایشلهیدی. «شهرده هر کونی شونچه هم سیس بار که حتا بعضا انسان یولینی ایتیرهدی. بیر تاماندن گوجوملیک باشقه بیر تاماندن ایسه، سیس و شاوقین.»
شونینگدیک کابل شهرینینگ گوجوم بازارلریدن بیریده سودا ساتووچیلردن سمیعاللهگه کوره: «دکانیم بار. دکانیم بولگن جایده شونچه هم سیس بار. بعضا سوو ساتووچی موترلر سیسی هم کوپ اذیت قیلهدی.»
شوندهی بیرحالده، روانشناسلرنینگ آگاهلنتیریب و ایتیشلریچه، سیس افلاسلیگی دوامی روح و جسم گه جدی زیانلرنی ییتیشتیریشی ممکن. روانشناسلردن محمدالله بلوچنینگ ایتیشیچه: «سیس افلاسلیگی روانشناسلیک دنیاسیده افسردهلیکنینگ اینگ مهم سببلریدن دیر. هر قنچه جمعیتده سیس افلاسلیگی بولسه، اوشنچه استرس سطحی یوقاری کیتهدی. غضبلنیش، افسردهلیک و ایشگه قیزیقمسلیک سببی، انه شوو سیسی افلاسلیگی دیر.»
شوندهی بیرحالده، کابل بلدیهسینینگ فرهنگی ایشلری بوییچه مصلحتچیسی نعمتالله بارکزینینگ ایتیشیچه، مذکور اداره اوتگن ییلی شهر بویلب سیس افلاسلیگی کمهیشی مقصد، ۱۵ مینگدن آرتیق لوداسپیکرنی ییغیب و حاضرگچه سیس افلاسلیگی کمهیشی اوچون سعیوحرکتلرنینگ دوامی بار. «اوتگن ییلی بلدیه شهر بویلب ۱۵ مینگدن آرتیق لوداسپیکرنی ییغدی و حاضرگچه بو ایشنینگ دوامی بار. بلدیه گزمهلری بو توغریده هیچ کیم بیلن مراعت قیلمهیدیلر. یشاوچیلردن کابل شهریده سیس افلاسلیگیگه سبب بولمسلیکلرینی سورهیدی.»
سیس افلاسلیگی ترافیک و هوا افلاسلیگی یانیده، کابل ده شهری تیریکچیلیک توغریسیدهگی جدی قیینچیلیکلردن بیریگه اوزگرگن.
