ینگیلیکده ایراندن سمنگان گه قیتگن عایلهلر، هنوز آوارهلیک هاردیقینی چیقرمهگچ، زلزله یشش اویلرینی ویرانه گه ایلنتیریب و ېنه بیر بار اوی-جایسیز قیلگن.
اوشبو عایلهلردن بولمیش شازیه، تورموش اورتاغی وفاتیدن سۉنگ ایراندن مجبوری چیقریلیب و سمنگانده تیریکچیلیک قیلماقده. او عایله سرپرستی و تورت بالهسینینگ احتیاجلرینی تأمینلش گه مجبور.
بو عیال، افغانستان گه قیتگچ آتهسینینگ اوییده تیریکچیلیک قیلردی، اولیملی زلزلهدن کېین اوی-جایسیز بولگن. اونگه کوره: «قیین احوالده حیات کیچیرهیپمیز. ایرانده تیریکچیلیک قیلردیم، بیراق ایریم یورهک خستهلیگی طفیلی وفات ایتگنیدن کېین مجبوری چیقریلیب و افغانستان گه قیتدیم و آتهمنینگ اوییده تیریکچیلیک قیلردیم. آتهمنینگ اویی زلزلهده بوزیلدی. حاضر هېچ نرسهمیز یوق. حقیقتن هم مستحق من، چونکه تورت بالهم بار و سرپرستسیز من.»
او، یاردم کورسهتوچی نهادلردن، زلزله سببلی انسانی انقراض یوز بیرمسدن آلدین بوتوغریده تیزلیک بیلن اقدام قیلیشلرینی سورهیدی.
شو بیلن بیرگه، بو فقط شازیه حیاتینینگ حکایهسی اېمس، باشقه بیرقطار عایلهلر هم اولیملی زلزلهده اوی-جایلرینی قولدن بیریب و باشپنهسیز قالگنلر.
اوشبو عایلهلردن بولمیش گلحضرت، افغانستان گه قیتگنیدن سۉنگ پخسهدن اوی قورگندی؛ بیراق ۱۲-عقربده یوز بیرگن زلزلهده بوزیلدی.
او شوندهی دیېدی: «ایراندن قیتگنیمدن ۱۲ آی اوتماقده. اوی، بویوملر و نقد پول اوشه ییرده قالدی. بو ییرده باشپنه قوریش گه قرار قیلدیک و زلزلهده بوزیلدی. اېندی باشپنهسیز و ایناغمنینگ خیمهسی آستیده تیریکچیلیک قیلماقدهمیز. هنوزگچه دولت و یاردم بیروچی نهادلر یاردم کورستگنی یوق.»
سمنگان ولایتی محلی مسئوللری، احتیاجی بار کیشیلرنینگ قیینچلیگینی حل قیلیش اوچون سعی-حرکت قیلینماقدهلیکلریدن ایشانچ بیرهدیلر.
سمنگان حاکمی اورین باسری دادخدا خادم شوندهی دیېدی: «یاردم کورسهتیلمهگن عایلهلر گه یاردم کورسهتیلیشی اوچون سکتورلر اشتراکی بیلن ینگی کمیته تشکیل بیرگنمیز.»
قویاش ۱۴۰۴-ییل، ۱۲-عقرب دوشنبه کیچه یوز بیرگن ۶.۳ درجه قووتلی زلزله، سمنگان و باشقه شمالی بعضی ولایتلرنی قیمیردتدی، نتیجهده یوزلب اوی بوزیلدی و کوپینچه عایلهلر هنوز هم خیمهلر آستیده تیریکچیلیک قیلماقده.
