قندهار ده باغدارلردن قطاری نینگ ایتیشلریچه، جاری ییل‌ده هوا اوزگریشلری و طبیعی آفت‌لر سبب، انار محصوللریدن یریمی اورته‌دن کیتگن.
ایکی جریب ییری‌ده ۶۰۰ انار درختی نی ایککن قندهار نینگ دامان تومنی مندسار قیشلاغی یشاوچیسی بولمیش جمعه‌گل نینگ سلام‌وطندار گه ایتیشیچه، اوتگن ییل انار محصولاتی نینگ ساتیش‌دن بیر میلیون ۵۰۰ مینگ افغانی درآمد قولگه کیلتیرگنی بیرحالده، بو ییل ۷۰۰ مینگ افغانی قولگه کیلتیرگن.
شونینگدیک قندهار ده‌گی باغدارلردن باشقه بیری میرحمزه نینگ ایتیشیچه، جاری ییل‌ده انار محصوللریدن کوپینچه‌سی نینگ یاریلگنی سبب، یخشی فایده قولگه کیلتیرمه‌گن. اونگه کوره، بیر جریب ییرده ستندرد شکلده انار درخت‌لری ایکیلیب و درست ییتیشتیریلگنی صورت‌ده، اوشبو باغ‌دن ۲۰-۳۰ خروار حاصل قولگه کیله‌دی، بیراق بو ییل محصوللر میزانی ۵-۱۰ خروار بولگن.
بیزلرنینگ «ایکس» ترماغی ده هم تعقیب قیلینگ!
میرحمزه نینگ کوپه‌یتیریشیچه، ساتیله‌دیگن دارولر صفت‌سیز دیر و حاضرگچه طبیعی آفت‌لر گه قرشی کوره‌ش زمینه‌سیده، محلی مسئوللر آرقه‌لی هیچ قنده‌ی یاردم قولگه کیلتیرمه‌گن. «ایکینچیلیک ریاستی حاضرگچه دارو بیرمه‌گن. بازاردن ساتیب آلگنیمیز دارولر ایسه صفت‌سیز و تاریخی اوتگن دیر. بیزلر گه دارو یاردم بیریلگی صورت‌ده حاصلاتی‌میز گه زیان ییتیشمه‌یدی. بو ییل انارلردن برچه‌سی یاریلدی، حتا یریمی سالم قالمه‌گن. انارلر گه آفت ییتیشمه‌گنی صورت‌ده، ۲۰-۲۵ خروار محصول قولگه کیلیتره‌میز، عکسینچه حالده ۵-۱۰ خروار بوله‌دی. هیچ کیم بو انارلر نی آلمه‌یدی و اوز خره‌جتی‌میز نی هم چیقره آلمه‌یمیز.»
شونده‌ی بیرحالده، قندهار ده انار ساتیب آله‌دیگنلردن قطاری نینگ ایتیشلریچه، هیچ کیم یاریلگن و زیان کورگن انار نی آلمه‌یدی. انار ساتیب آله‌دیگنلردن گل‌احمد نینگ ایتیشیچه، یاریلگن انار نی آلمه‌یمن؛ چونکه، بو کبی انارلر نینگ کسل‌لیککه سبب بولیشی ممکن. «انار ساتیب آلیش پیتده، کوره‌من که یخشی بولسین، یاریق بولمه‌سین و خراب بولمه‌سین. یاریق انار نی ایسه بازارده باشقه انار قالمه‌گنی‌ده آله‌من، یخشی انار نینگ فرقی پوستی‌ده دیر. یاریق انار ایچیده میکروب و توپراق کیره‌دی.»
ایکینچیلیک بوییچه ایش بیلرمان‌لری، انارلر یاریلیشی نی هوا نینگ اوزگریشی عنوان قیلگنلر. ایکینچیلیک ایش بیلرمان‌لریدن بیری شاه‌محمد نینگ ایتیشیچه، هوا نینگ بیردن اوزگریشی، کوپراق سوو بیریلیشی، قاره و آق کیمیاوی کود‌دن قوللنیلیشی و درخت‌ده میوه‌لر نینگ کوپ قالیشی، انار محصولی یاریلیشی نینگ اصلی سبب‌لریدن حساب‌لنه‌دی. مذکور ایکینچیلیک ایش بیلرمان نینگ کوپه‌یتیریشیچه، اوشبو کسل‌لیکلر آلدی آلینیشی اوچون، درخت‌لر نینگ منظم شکلده سووغاریلیشی و میوه‌لر نینگ ییتیشگنی پیتده، درخت‌لر نینگ بیردن سووغاریلمه‌سلیگی کیره‌ک.
شونده‌ی بیرحالده، قندهار ایکینچیلیک ریاستی مسئوللری باغدارلر قیین‌چیلیگی نی تصدیق‌لب بیراق ایتیشلریچه، اوشبو ولایت نینگ قریب برچه تومن‌لریده باغدارلر گه معلومات بیریلیب و شونینگدیک ایکینچیلر گه کیمیاوی کود و دارو ترقه‌تیلگن دیر.
بیزلرنینگ فیسبوک صحیفه‌میزگه باش اورینگ!
قندهار ایکینچیلیک ریاستی سوزلاوچیسی ننگیالی سمون نینگ ایتیشیچه: «ایکینچیلیک ریاستی نینگ مسلکی ایشلاوچیلری دایم باغدارلر و ایکینچیلر یانیگه باره‌دیلر و حتا تومن‌لر گه کیته‌دیلر. بو توغریده اولر گه سیمینارلر هم یولگه قویه‌دیلر و باغدارلر گه دارو‌دن قنده‌ی قوللنیش تعلیملری بیریلگن دیر.»
قندهار ایکینچیلیک ریاستی نینگ معلوماتی اساسیده، بو ییل مذکور ولایت باغلریدن ۲۸۰ مینگ تُن انار قولگه کیلگن که، اوتگن ییل گه قره‌گنده ۱۰ فایز کوپه‌یگنی نی کورسته‌دی.
ایتیش کیره‌ک که، قندهار ولایتی نینگ انار محصولی‌دن کوپینچه‌سی پاکستان، هندوستان، قزاقستان، چین، بیرلشگن عرب امیرلیکلری و باشقه بیر قطار اروپایی مملکت‌لر گه صادر بوله‌دی.
