خصوصی مکتب اوقووچی‌سی عبدالرووف آتلی ۹ یاشیده بولگن باله بیر آی آلدین مکتب تامان باره‌دیگن پیت‌ده حربی کیم‌لی آدم اوغیرلاوچی‌لر تامانیدن اوغیرلنگن، لیکن واقعه‌دن بیر آی اوتیش بیلن هم بلخ ولایتی نینگ پولیس و خوفسیزلیک کوچ‌لری هیچ‌بیر یوتوق قولگه کیلتیره آلمه‌گن.
۹ یاشیده بولگن عبدالرووف آتلی باله نینگ اوغیرلنگنی باعث، مزارشریف شهریده حیات کیچیره‌دیگن تورکمن‌لر ناراضلیک بیلدیریب مملکت جمهور رئیسی، ایچکی ایش‌لر وزیرلیگی و ملی خوفسیزلیک ریاستیدن قضیه‌نی جدی شکلده تیکشیریشی‌نی سوره‌گن‌لر.
عبدالروف نینگ آته‌سی محمد نبی نی ایتیشیچه، آدم اوغیرلاوچی‌لر تلیفون آرقه‌لی صحبت قیلیب، اوغلی آزاد ایتیلیشی اوچون ۱ یریم میلیون دالر ایسته‌گن‌لر.
اونینگ کوپه‌یتیریشیچه، آدم اوغیرلاوچی‌لر وایبر آرقه‌لی اوغلی دن ویدیو یوبارگنلر، اینگ سونگ اوزه‌تیلگن ویدیو ده اوغلی نینگ بدنیده کییمی بولمه‌گن و رنجر تیپی موترگه باغلیق بولگن و اوغلی ناله و فریاد بیلن آته‌سیدن یاردم ایسته‌گن.
ناراضچی‌لر، عبدالروف نینگ آزاد ایتیلیشی‌نی سوره‌ب، اگر ده امنیتی نهادلر تیزلیکده عبدالروف نی آدم اوغیرلاوچی‌لر قولیدن آزاد ایتمه‌گن حالده، شمال نینگ ۹ ولایتیده ناراضلیک نمایش اوتکزیشدن قورقیتگنلر.
انه‌شوحالده، شمال زونی تورکمن‌لر کینگشی باشلیغی عبدالصمد حارث، عبدالروف نینگ آزاد قیلینیشی خصوصیده مرکزی و محلی حکومت نینگ دقت‌سیزلیگی دن تنقید قیلیب و حاضر گچه حکومت اوغیرلنگن باله حقیده هیچ‌قنده‌ی معلومات عایله سیگه بیرمه‌گنینی بیلدیرگن.
جناب حارث، عبدالروف آتلی ۹ یاشر باله‌نی حکومت، آدم اوغیرلاوچی‌لر قولیدن آزاد ایتمه‌گن حالده بوتون افغانستان ولایت‌لریده ناراضلیک نمایش گه قول اوریب و تجارتی بندرلرنی باغلشدن قورقیتگن.
بیراق، بلخ حاکمی سوزلاوچیسی منیر فرهاد نینگ ایتیشیچه، عبدالروف آدم اوغیرلاوچی‌لر قولیدن آزاد قیلیش اوچون سعی و حرکت‌لرنی دوامی بار.
