بوگون (پنجشنبه، ۱۱-عقرب ۲ نومبر) گه تینگ، پاکستان حکومتی اوشبو مملکت ده قانونی حجتسیز افغانستانلیک قاچقینلر نینگ جبر دن چیقریش جریانینی باشلهگن، معلوماتلر گه بناً، پاکستان پولیسی بو مملکت نینگ تورلی شهرلری ده افغانستانلیک قاچقینلر نینگ اویلری گه باستیریب کیریب و اولر نی قولگه آلماقده.
پاکستان دولتی نینگ بو قراری، خلقارا انسان حقلری تشکیلاتلری و مملکتلر اینیقسه امریکا نینگ مناسبتی بیلن روپهره بولگن.
امریکا قوشمه ایالتلری تشقی ایشلر وزیرلیگی نینگ سوزلاوچیسی متیو میلر، اوتگن کونی مطبوعاتی ییغیلیش ده یینه بیر بار افغانستان قوشنیلری جمله دن پاکستان دن، افغانستانلیک قاچقینلر نینگ جبر دن چیقریش جریانی گه چیک قوییشینی طلب قیلگن.
شونینگدیک، پاکستان ده سیاسی سیمالر دن بیرقطاری و انسان حقلری تشکیلاتی، اوشبو مملکت دن افغانستانلیک قاچقینلر نینگ جبر دن چیقریش قراری گه قرشیلیک کورسهتیب، پاکستان عالی محکمهسی گه مکتوب یوللب بو مملکت نینگ وقتینچهلیک حکومتی بوندهی قرارنی عملگه آشیریش گه صلاحیتی یوق و مذکور مملکت عالی محکمهسی دن بوتوغریده اقدام قیلیشینی سورهگنلر.
بیزلرنینگ فیسبوک صحیفهمیزگه باش اورینگ!
پاکستان ده سیاسی فعال و اوشبو مکتوب نی امضالهگنلر دن محسن داور، بوتوغری ده ایکس صحیفهسیده یازیشیچه: «بیز اساسی قانون نینگ ۱۸۴-مادهسی و ۳-بندی اساسی ده، عالی محکمه گه دادخواهیلیک مکتوب یوللـهدیک، افغانستانلیکلر شامل قاچقینلرنی چیقریش قراری، عالی کمیته و وقتینچهلیک دولت نی قیینچیلیککه دوچ قیلهدی.»
پاکستان حکومتی نینگ اقداملری و قرارلری نی آلهدیگن عالی محکمه، بوتوغریده حاضرگچه فکر_ملاحظه بیلدیرمهگن.
پاکستان ده ییتکیرمه فعاللری دن طاهرخان، پاکستان سیاسی فعاللری تامانیدن محکمه گه یوللنگن مکتوب اهمیتی خصوصیده سلاموطندار گه ایتیشیچه: «قانونچیلردن بیرقطاری، بو ایش نی وقتینچهلیک حکومت نینگ صلاحیتی دن یوقاری دیب بیلهدیلر، بیراق بو مسئله محکمه ده بحث گه آلینهدی و محکمه بوتوغریده نیمه قرار آلهدی، کوتیش کیرهک.»
برچهسی بیلن، پاکستان دولتی اوشبو مملکت دهگی قانونی حجتسیز قاچقینلر نی جبر دن چیقریش گه قرار قیلگن؛ بیراق کینگی باسقیچلر ده، باشقه قاچقینلر نینگ هم چیقریشی اوستیگه تاکید ایتگن؛ بو مسئله پاکستان ده افغانستانلیک باشقه قاچقینلر نینگ خواطری گه سبب بولگن.
پاکستان ده اروپا و امریکا قوشمه ایالتلری گه انتقال بیریلیش نی کوتهیاتگن قاچقینلر گه کوره، بو قرار اولر نینگ خواطری گه سبب بولگن.
بیزلرنینگ «ایکس» ترماغی ده هم تعقیب قیلینگ!
آسترالیا گه انتقال بیریش نی کوتهیاتگنلردن بیرقطاری، بیرلشگن ملتلر تشکیلاتی و آسترالیا حکومتی گه مکتوب یوللب، قیینچیلیکلری حلی اوچون اقدام قیلیشلرینی سورهگنلر.
اوشبو قاچقینلردن نومان وحید نینگ سلاموطندار گه ایتیشیچه: «قیین بیر احوال ده تیریکچیلیک قیلماقدهمیز، تشقری چیقهی آلمهی میز و بالهلریمیز پولیس دن قورقیب بقیرهدیلر، تیریکچیلیک قیلیش قیین و افغانستان گه هم قیتهی آلمهی میز.»
پاکستان دهگی افغانستانلیک قاچقینلردن باشقه بیری نازنین برآتی گه کوره: «دنیا همجمعیت و بیرلشگن ملتلر تشکیلاتی دن یاردم بیریشلرینی ایستهی میز، کیچهلر اویخیله آلمهی میز، کیلهجک ده تقدیریمیز نیمه بولیشی دن خواطر ده میز.»
عینحالده، سونگی کونلرده پاکستان دن کوپ سان ده قاچقینلر نینگ قیتیشی اوچون، ننگرهار ده تورخم بندری و قندهار ده اسپینبولدک_چمن بندری ده اولر نینگ قیینچیلیکلری حلی و منطقهلری گه انتقال بیریش اوچون تیارگرلیک کوریلگن.
اسلام امیرلیگی سوزلاوچیسی ذبیحالله مجاهد گه کوره، پاکستان دن افغانستانلیک قاچقینلر نی جبر دن چیقرمسلیک اوچون اسلام امیرلیگی نینگ سعیوحرکتلری نتیجه بیرمهگن و اولر قاچقینلر گه قولیلیک و امکانیت یرهتیش مقصدیده سعیوحرکت قیلماقدهلر.
اسلام امیرلیگی سوزلاوچیسی نینگ سلاموطندار گه ایتیشیچه: «افسوس بیلن قاچقینلرنی جبر دن چیقرماقدهلر، پاکستان حکومتی بیلن مذاکرهلریمیز نتیجه بیرمهدی، اسلام امیرلیگی تامانیدن اسپینبولدک و تورخم بندرلری ده تیارگرلیک کوریلگن.»
ایتیش کیرهک، پاکستان حکومتی اوشبو مملکت ده ناقانونی شکلده تیریکچیلیک قیلهیاتگن قاچقینلر؛ که سانلری بیر میلیون ۷۰۰ مینگ کیشی دییلگن، جبر دن چیقریش نی اعلام قیلگن.