صناعت و فرهنگ یورتی بولمیش هرات ده، بیر قطار قیزلر قلم و رنگ بیلن حیاتلری یولیگه ینگی رنگ و معنا نی بیریشگه قرار آلگنلر. اولرنینگ ایتیشلریچه، مالی و عایلهوی حمایتلری بولمهگنی بیلن، صناعتی بیر گالری آچگنلر که بو ییرده، هم نقاشلیکنی اورگنهدیلر و همده دیوارلرگه رنگ-برنگ چیرایلی دیزاینلرنی چیزهدیلر.
یسنا عظیمی، کوپینچه قیزیقیش بیلن هرات بیلیم یورتینینگ صناعت فاکولتهسیگه یول تاپگن؛ بیراق تعلیمی چیکلاولر سبب تحصیلینی دوام بیره آلمهگن. اونینگ ایتیشیچه، اوشبو توسیقلیک او و باشقه قیزلر اوچون ینگی بیر یولنی باشلشلریگه سبب بولگن که، صناعتی بیر تیمنی تشکیل بیریب، رنگلر آرهسیدن آرزولرینی ایزلش و صناعتی اثرلرنی تولید قیله آلیش توغریسیده، مستقل صناعتی بیر گالری دایرهسیده قیزلرنینگ صناعتی استعدادلری رواجلنیشی اوچون تینچ و آرام بیر فضانی یرهتگنلر.
مذکو کیچیک گالریده، قریب ۲۵-۳۰ یاش آرهسیده بولگن قیزلر تورلی مهارتلرنی اورگهنیش اوچون ییغیلگنلر. اولر آماتور و حرفهای بولگن ایکی سطحده گروپی شکلده نقاشلیک صناعتینی اورگهنیش و اورگهتیش بیلن شغللنگنلر.
بیزلرنینگ فیسبوک صحیفهمیزگه باش اورینگ!
یسنا عظیمینینگ کوپهیتیریشیچه، گرچند قیینچیلیکلر بیلن روپهرهلر؛ بیرق صناعتی ایشلریگه دوام بیرهدیلر. «گرچند بو تیمنینگ صناعتی لایحهلری اهالی تامانیدن تحسین بولیب و قدرلنگن؛ بیراق عملده ینه هم جدی قیینچیلیکلر بیلن روپهره دیر.»
اوشبو تیمنینگ ینگی فعالیتلریده، هرات شهری مکتبلریدهگی دیوارلرنی رنگلش لایحهلری عملگه آشیریلیشی دیر که، اولر صناعتی فعالیتلرینی باشده اجتماعی ترماقلرده نمایشگه قویگنلر و بو یول آرقهلی اهالینینگ قیزیقیشی بیلن روپهره بولیب و کیین مکتبلر ایچیدهگی دیوالر گه نقاشلیک قیلیش اوچون مکتبلر تامانیدن پیشنهادلر قولگه کیلتیرگنلر.
یسنانینگ اورغولشیچه: «دیوارلرگه نقاشلیک قیلیشدن مقصدلری، ایجابی پیغاملرنی انتقال بیریش، انگیزه یرهتیش و رنگ و صناعت آرقهلی اوقووچیلر اینیقسه قیزلرنینگ روحیهسینی آشیریش دیر. دیزاینلرینی تیمی شکلده دیزاین قیلهدیلر و آلتی کیشیلیک بیر گوره آرقهلی عملگه آشیریلهدی.»
اونینگ کوپهیتیریشیچه، دیوارلرگه نقاشلیکنینگ فقط ایچکی مکانلر بیلن چیکلنگنی، رسمی یا-ده نادولتی نهادلر تامانیدن مالی حمایت یوقلیگی، صناعتی اوسکونهلر تیارلنیشیده عایلهلرنینگ مالی امکانیتی یوقلیگی، تیریک موجودلر اثرلرینینگ نمایشگه قوییلیشی تقیقلنگنی، عمومی کورگزمهلرنینگ اوتکزیلیشی و بودجه یوقلیگی، اوشبو صناعتی تیمنینگ روپهره بولگن اساسی قیینچیلیکلریدن دیر.
لیکن مذکور برچه قیینچیلیکلر و توسیقلیکلر بولگنی بیرحالده، اوشبو گروه اعضاسی ینه هم قیزیقیب ایشلریگه دوام بیرهدیلر و اولرنینگ ایشانچیگه کوره، بو یول آرقهلی آرزولریگه ییتیشه آلهدیلر.
اوشبو تیم اعضالریدن بیری شبانه طاهری دیر. او صناعت خصوصیدهگی تعلیمینی «استادکمالالدین بهزاد» مکتبیدن باشلهگن. شبانه طاهرینینگ ایتیشیچه: «بیزلر باشده شوق و علاقه بیلن بو ایشگه باشلهدیک و رنگلردن فایدهلنیش و بیر نرسهنی بیان قیلهدیگن دیزاینلر بیلن پیاملریمیزنی انتقال بیریشگه حرکت قیلدیک؛ بیراق یول اورتهسیده ینه هم تیریک موجودلرنینگ نقاشلیک قیلینیشی منع بولگنی کبی کوپینچه قیینچیلیکلر بیلن روپهره بولدیک؛ لیکن تیمیمیز رنگلر یاردمی بیلن اوقووچیلرگه یخشی روحی فضانی یرهتیشگه سعیوحرکت قیلگن.»
بیزلرنینگ «ایکس» ترماغی ده هم تعقیب قیلینگ!
شبانهنینگ کوپهیتیریشیچه: «شرایطگه تسلیم بولیش ایستمهیمن؛ دوام بیره آلیشمیز قدر دوام بیریش ایستهیمن. بیر کونی چیکلاوسیز شکلده صناعتی اثرلریمنینگ نمایشگه قوییش نی آرزو قیلهمن.»
اوشبو گروه اعضالریدن باشقه بیری و صناعت فاکولتهسیده تحصیلینی دوام بیره آلمهی و بو تیمگه قوشیلگن زیبا حلیمی، دیوارلرگه نقاشلیک قیلیشنی حیاتینینگ یخشی وقتلریدن بیری دیب و ایتیشیچه: «اوقووچیلر نقاشلیگیمیز نی کوریب و خورسند بولگنلرینی کورگنیمیزده، جودهیم خوش بولهمیز و بیزلرگه یخشی بیر حسنی بیرهدی و شو رقم ایشیمیزنی شوق بیلن دوام بیرهمیز.»
شوندهی بیرحالده، هرات معلومات و مدنیت ریاستینینگ صناعت و فرهنگ آمری حمیدالله غیاثینینگ ایتیشیچه، کورگزمهلرنی اوتکزیش بیلن صناعتچیلرنینگ صناعتی فعالیتلریدن حمایت قیلهدیلر.
اونینگ کوپهیتیریشیچه: «صناعتی تیملردن حمایت قیلیش اوچون کورگزمهلرنی اوتکزهمیز و اولرنینگ فعالیتلریگه زمینه یرهتگنمیز که اولر صناعتی فعالیتلرینی دوام بیرسینلر.»
هرات معلومات و مدنیت ریاستینینگ صناعت و فرهنگ آمری، صناعتچیلر فعالیتی توغریسیده ایتیشیچه، اولر اسلامی قاعده-قانون اساسیدهگی بو کبی نرسهلردن حمایت قیلیشگه متعهد دیر و اورغولشیچه، دیوارلر و عمومی منظرهلرگه تیریک موجودلرنینگ صورتیدن فایدهلنیشگه رخصت بیریلمهیدی.
سونگی ییللرده اقتصادی و سیاسی اوزگریشلر افغانستاننینگ صناعتی فضاسیگه چقور تاثیرلری بولگنی بیرحالده، اوشبو قیزلر صناعتی گالرینی آچگنلر. صناعتچیلردن کوپ قطاری، مملکتنی ترک قیلیشگه مجبور بولیشگن یا-ده اوز نیازلرینی تامینلش اوچون باشقه ایشلرگه یوز کیلتیرگنلر.
